Jang sa iŏk đei jô̆ hơtŏ măt bơngai sơnăm 2025 iŏk đei dang 5.000 dolar Mi, lơ hloh pơtăm ‘măng pơtêng hăm sơnăm 2020, mơ̆t lơ̆m khul jang sa iŏk đei jơnei lơ. Dôm tơdrong iŏk đei jơnei ‘noh tơgop pơjing đei hơyak pran kơjăp ba teh đak bơ̆n mơ̆t lơ̆m chăl ‘nao, vă iung jang kiơ̆ trong tơlĕch jang tŏk 2 kơsô̆ lơ̆m jăl jang 2026-2030 păng đei jing teh đak atŏk tơ iung jang sa iŏk đei lơ lơ̆m sơnăm 2045.

Lăp đon hăm trong sơkơ̆t hơdăh găh tơdrong jang mŭk drăm păng iŏk đei jơnei jang kiơ̆ trong tơlĕch jang Kăl đei chih tơbăt hăm Trong vă pơjing Tơdrong bơ̆ jang kăl, Phó Giáo sư-Tiến sỹ Trần Hoàng Ngân, kơdră tang măt Kuô̆k hô̆i jăl XV akhan: kơsô̆ hre teh đak bơ̆n sơnăm 2025 lăp pă 36% (pơtêng hăm tơdra hơdrol ‘noh 60%), jĭ tơdrong hơ iă hloh, tơƀôh hơdăh tơdrong chĕp pơgơr ‘lơ̆ng, tơgum ăn hơmet pơ ‘lơ̆ng jơhngơ̆m đon lui yom kơtang đơ̆ng rim bơngai tơmơ̆t jên jang păng rim khul bơ̆ jang atŭm plĕnh teh lơ̆m tơdrong jang jên hu Việt Nam. Adoi rim trong proh hơmet ‘lơ̆ng lơ̆m thuê̆-tơlĕch yoa kon jên bơ̆ jang teh đak, jĭ tơdrong kăl hloh vă proh hơmet pơ ‘lơ̆ng kon jên jang ăn tơmơ̆t jên jang atŏk tơ iung. Ƀok Trần Hoàng Ngân hơlen:“Hăm trong proh hơmet ăn tơmơ̆t jên jang atok tơ iung lăp 2, 8 triu ti hlak jên ‘noh hơtuch jăl jang ou bơ̆n hlôi iŏk đei jơnei 3,4 triu ti hlak jên ăn tơmơ̆t jên jang găh tơdrong jang mŭk drăm-tơpôl. ‘Nou kiơ̆ kơ ĭnh iŏk đei jơnei kơtang hloh. Gơnơm đơ̆ng noh, bơ̆n hlôi tơmơ̆t jên jang ming man trong gre rĕnh, trong tơter đak dơsĭ, rim dơnŏk đak dơsĭ, cham gre păr, trong ver 4 Hà Nội, trong ver 3 pơlei tơm Hồ Chí Minh păng lơ hơnih jang ming man hnam trương pơtho pơhrăm, hnam pơgang đei tơmơ̆t jên jang.”

Găh tơdrong tŏk GDP, tơdăh ưh kơ jô̆ sơnăm 2021, ‘noh sơnăm đei ƀơm kơnê̆ đơ̆ng jĭ hơbuh Covid-19, lei tŏk mŭk drăm kơ teh đak bơ̆n iŏk đei 7,2% lơ̆m 4 sơăm hơnơ̆ng. Sơnăm 2025, tech mơdro tơ̆ teh đak đe kơ Việt Nam tơdra hơdrol iŏk đei hloh 900 ti USD. ‘Nou jing iŏk đei lơ hloh. Đơ̆ng mĭnh teh đak jang mŭk drăm dơnuh hin, truh dang ei teh đak bơ̆n hlôi jing teh đak jang mŭk drăm lơ̆m Khul 20 teh đak đei tơdrong jang sa mơdro sa kơtang lơ̆m apŭng plĕnh teh.

Hăm trong tơlĕch ăn ‘lơ̆ng hơ iă ‘noh atŏk tơ iung tĕnh koăng păng kơjăp ‘lơ̆ng, dôm tơdrong iŏk đei jơnei găh atŏk tơ iung mŭk drăm kơ teh đak bơ̆n hlôi tơƀôh hơdăh găh tơdrong jang tơpôl păng tơdrong gơh hơgei găh kon bơngai. Kơsô̆ atŏk tơ iung kon bơngai kơ Việt Nam đei hơmet pơ ‘lơ̆ng kơtang, tŏk 37 kơnao, tŏk truh hơnih dơ̆ng mă 46 lơ̆m kơƀang chih tơbăt hơrih sa hơnŭk hơnoa lơ̆m plei teh sơnăm 2025, kơtang hloh pơtêng hăm rim teh đak jang sa đei iŏk yoa dôm ăi. Tiến sỹ mŭk drăm Lê Duy Bình hơlen hơdăh:“Trong tŏk mŭk drăm kơ bơ̆n ưh khan lăp hơdrô̆ tŏk găh mŭk drăm ‘noh tơklep kơjăp hăm ‘noh jĭ atŏk tơ iung găh kon bơngai, lăng kon bơngai jing tơm hloh, lăng cham char jĭ tơm hloh, lăng khul đơ̆ng rŏng jing trong tơlĕch ăn vă hơdrin vă kơ bơ̆n đei mĭnh trong jang tŏk mŭk drăm kơjăp ‘lơ̆ng, pơjing đei mĭnh cham char ‘lơ̆ng hơ iă ăn kôn mon kon sou bơ̆n đơ̆ng rŏng ou kơnh”.

Atŭm hăm rim tơdrong jang muk drăm anai, tơdrong jang khpa hŏk kmăi kmŏk, tơplih ‘nao tơchăr păng tơplih kơsô̆ kơ teh đak bơ̆n jei đei hơ yak pran tĕnh koăng. Kơsô̆ tơplih ‘nao tơchăr lơ̆m plei teh sơnăm 2025 kơ Việt Nam dơ̆ng mă 44/139 teh đak. Kmăi kmŏk kơsô̆ atŏk tơ iung kơtang, jơ̆p jang; găh  Internet di động găh lơ̆m TOP 20 apung plĕnh teh. Tĕch mơdro tơmam drăm điên tư atŏk tơ iung tĕnh koăng, tŏk jô̆ hơtŏ 20% lơ̆m sơnăm. Đơ̆ng tơdrong yan ou bơ̆ jang kơ hơnih mơdro sa, ƀok Nguyễn Hữu Sơn, Kơdră chĕp pơgơ̆r Grŭp jang ATS pơma tơbăt jơhngơ̆m đon:“Bơ̆n ƀôh hơdăh tơdrong hơdrin, iung jang đĭ ai đơ̆ng Khul kơdră Teh đak, pơjing rơvơn ăn hơnih mơdro sa, ‘nou jĭ tơdrong tôch kơ ‘lơ̆ng. Bơ̆ jang lơ̆m tơdrong jang kmăi kmŏk jên hu, ĭnh ƀôh tơdrong jang ou kơ Việt Nam tŏk bŏk đei iung jang hơ iă hăm tŏk tôch tĕnh koăng, tŏk bŏk vang mơ̆t hơdoi lơ̆m trong jang păng trong tơlĕch jang atŏk tơ iung kmăi kmŏk kơsô̆, jên hu kơsô̆”.

Tôch lăp đon hăm trong hơlen iŏk đei jơnei đei chih tơbăt hăm Trong vă pơjing tơdrong Tơchơ̆t: “Rim trong tơlĕch jang, bơ̆ jang tơgŭm djru đei pơjing đơ̆ng tơdrong hơpơi ‘meh vă, đei iŏk yoa lơ̆ng hơ iă păng tơdrong hơnŭk hơnoa kơ Kon pơlei, sơđơ̆ng tơpăt, hơdăh. Lăng tơdrong lăp đon, lui yom đơ̆ng kon pơlei, hơnih mơdro sa pơm ‘long pơtŏ hơlen kang ƀô̆ bơ̆ jang ‘lơ̆ng. Pơm hơtŏk jơhngơ̆m đon plang ăn kơ yuơ kơ teh đak, atŏk kơtang jơhngơ̆m đon hơdrin, pơ̆n tơchĕng, pơ̆n iung jang păng chiu pŭ tơ̆ hơnăp dôm tơdrong jang atŭm”, yă Lưu Thị Thanh Mẫu, Kơ iĕng Kơdră Khul bơngai mơdro sa sơnăm mơlôh Việt Nam pơma tơbăt jơhngơ̆m đon hơpơi ‘meh vă: “Atŭm hăm tơdrong iung jang đơ̆ng Khul kơdră điên tư, atŭm hăm bơ̆ jang kiơ̆ lơ̆m kơsô̆ păng atŏk kơtang bơ̆ jang ‘lơ̆ng đơ̆ng rim tơring ‘noh kiơ̆ kơ ĭnh, khul kơdră kơpal păng khul kơdră chĕp pơgơ̆r teh đak gô tơlĕch jang kiơ̆ tĕnh koăng Tơdrong tơchơ̆t 66 păng Tơdrong tơchơ̆t 68 đơ̆ng Hơnih tơm Chinh trĭ. Lơ lŏh tơdrong ƀar păh trong tơlĕch jang păng jang kiơ̆ trong dôm tơdrong yan ou gô pơm hơtŏk jang mŭk drăm kơ teh đak bơ̆n atŏk tơ iung nhen Tổng Bí thư hlôi pơma hơdăh ‘nou jĭ chăl atŏk tơ iung kơtang kơ hơdrĕch hơdrung. Bơ̆n gô iung jang hơdoi vă pơjing đei tơdrong jang muk drăm hơbĕch hơbal, ba Việt Nam atŏk tơ iung jing teh đak jang mŭk drăm dơ̆ng hơlou lơ̆m apŭng plĕnh teh”.

 Lơ̆m khei ‘năr atŏk tơ iung mŭk drăm kơ teh đak 5 sơnăm ou ki, oei đei dôm tơdrong tim mă hơ iă kăl hơmet pơ ‘lơ̆ng păng dôm trong hơlen ƀôh hơdăh đei chih tơbăt hơdăh lơ̆m Trong vă pơjing Tơdrong tơchơ̆t kơ Đảng. Mă lei, hăm tơdrong iŏk đei jơnei tih tên lơ̆m atŏk tơ iung mŭk drăm mă teh đak bơ̆n iŏk đei lơ̆m 5 sơnăm ou ki, hăm jơhngơ̆m đon hơdrin tơplih ‘nao, hăm jơhngơ̆m pran tơgoăt tơgoăl pôm nơ̆r ƀơ̆r đon păng hơpơi ‘meh vă atŏk tơ iung kơtang, hơdrĕch hơdrung Việt Nam tŏk bŏk iung yak pran kơjăp iăp kơtang năm truh chăl hle-chăl kơ atŏk tơ iung pơdrŏng, hơnŭk hơnoa, vang mơ̆t hơdoi păng pơm tơm kơdih.