Năr 8/12, Ƀan châ̆p hanh Đảng ƀô̆ dêh char Quảng Ngãi pơgơ̆r Hop akŏm 'măng mă 2, tơlĕch sơkơ̆t hơdah tơdrong jang sơnăm 2025, sơkơ̆t hơdah sơnong jang tơm ăn sơnăm 2026 păng pơma đam, tơchơ̆t dôm tơdrong jang kăp gĭt lơ̆m sơnong jang po. Sơnăm 2025, dêh char Quảng Ngãi hăt hot pơkăp anih jang hanh chĭnh, pơgơ̆r jơnŭm jang păng tơlĕch dôm tơchơ̆t jang kơ jơnŭm pơgơ̆r tơring 2 tăl, dar deh pơm jang sơđơ̆ng, kloh klĕch; pơgơ̆r jang đei jơnei hop akŏm đảng ƀô̆ dôm jăl jang păng Hop akŏm bơngai jang tang măt ăn Đảng ƀô̆ dêh char 'măng mă 1, jăl jang 2025-2030.

Sơnăm 2025, tơmam drăm đei pơm tơlĕch lơ̆m dêh char đei hloh 92 rơbou tih hlj, tŏk hloh 10%, dơ̆ng hơlou kơ tơring Pơbah Tŏk bŏk păng Tây Nguyên; dơ̆ng mă 6 lơ̆m 34 dêh char, pơlei tơm lơ̆m jơ̆p teh đak. Dêh char pơm jang tơnăp tơdrong pơyua ăn tơpôl, keh đang tơdrong jang sut lê̆ hnam pơgia, hnam hyah hyok; tơdrong jang tơjur hin dơnuh đei jơnei kăp gĭt; vei sơđơ̆ng kơjăp tơpôl hơrih xa; vei sơđơ̆ng chinh trĭ, vei sơđơ̆ng tơdrong hơrih tơ̆ tơring.