Lơ̆m dêh char Dak Lăk đei 639 pơbŭng hnam hơlih kăl ming man ‘nao; 880 pơbŭng hnam hư răm kơtang păng 5.240 pơbŭng hnam hư răm păh ai, kial hlơk pơbŭng kăl ming hơmet. Truh dang ei, Dak Lăk hlôi iung jang ming man ‘nao 176 pơbŭng hnam; tơchĕng hơlou lơ̆m giĕng ou hơnơ̆ng iung jang ming man vă jê̆ 450 pơbŭng hnam păng dang 233 pơbŭng hnam dơ̆ng lơ̆m giĕng truh ou kơnh. Hơdrô̆ hnam ming hơmet hlôi jang keh đang; hăm chă ming hơmet hư răm kơtang, dang 70% tŏk bŏk vă jê̆ keh đang, pă uơ oei, găh lơ rim ŭnh hnam hơdro po, gô đei khul kong ang, ƀô̆ đô̆i, Quân khu 5 tơgum djru ming hơmet keh đang hơdrol năr 31/12.

Ƀok Tạ Anh Tuấn, Kơdră chĕp pơgơ̆r Hơnih vei lăng kon pơlei dêh char Dak Lăk tơbăt, ‘ngoăih iung jang kơtang ming man păng ming hơmet hnam oei, dêh char tŏk bŏk hơlen hơdăh hăm 47 ŭnh hnam ăn năm oei tơ̆ hơnih hle kơ yuơ hơnih so găh lơ̆m bro teh hơlih tơdrŭt. ‘Nou jĭ dôm khul iung jang đunh ƀiơ̆ pơtêng hăm dôm trong jang anai kiơ̆ trong pơrô̆ jang đơ̆ng Thủ tướng Teh đak. Dêh char tơlĕch ăn ƀar hơyak dăr lăng hơlen ming man keh đang, ‘noh jang keh đang hơdrol năr 31/12/2025 păng keh đang hơdrol năr 31/1/2026. Vă iung jang hrơ̆p mĭnh ‘măng, dêh char hlôi chă hơvơn đei hloh 200 ti hlak jên đơ̆ng dôm bơngai tơgŭm djru ăn ming man hnam ‘nao păng ming hơmet hnam ăn kon pơlei. Atŭm hăm ‘noh, Dak Lăk tơlĕch tơdrong jang tơ iung pơjing ming man dang 330 hnam hop akom pơlei atŭm hăm kơ ‘nơp kơ ‘mi kial đak lip, hăm kon jên jang 600 triu hlak jên. Dêh char apĭnh Khul kơdră Teh đak tơgŭm ăn 500 ti hlak jên; pă dôm yơ gô hơnơ̆ng chă hơvơn rim hơnih mơdro sa păng rim hơnih bơ̆ jang, rim bơngai đei jơhngơ̆m đon ‘lơ̆ng tơgum djru.