Mă hơdăh, tơ̆ dêh char Gia Lai đei 674 tŏ hnam đei păk hơlih kăl athei man dơ̆ng, găh lơ yua đơ̆ng ƀơm ưh kơ ‘lơ̆ng đơ̆ng kial hơbŭt kơsô̆ 13. Pơđĭ kơsô̆ hnam kăl kơ man ‘nao hlôi đei tơlĕch jang. Lơ̆m noh, 451 tŏ hnam hlôi pơm đang dăh mă vă jê̆ đang. Kơsô̆ hnam uơ oei dơ̆ng oei găh lơ lơ̆m dôm tơring oei hle, teh đĭ hơmet tôm păng tŏk bŏk đei tơlĕch jang ming man. Gia Lai pơkăp pơm đang pơđĭ hnam man hơdrol kơ ‘năr 25/1/2026. Găh hơmet ming hnam oei, lơ̆m dêh char đei 31.000 tŏ hnam kăl kơ pơm. Truh dang ei, vă jê̆ 90% đĭ pơm đang. Uơ oei dơ̆ng gô đei pơm đang lơ̆m khei 12/2025 păng pơtôch hơdrol kơ ‘năr 15/01/2026. Tơdrong jang đei lăng tôch kơ hrĕnh.

Kơdră chĕp kơ̆l Anih vei lăng kon pơlei dêh char Gia Lai tơbăt tơdrong ‘nâu đei đăi gơnang đơ̆ng tơdrong kơchăng lăp đơ̆ng rŏng ‘mi kial hơbŭt kơsô̆ 13, ƀơ̆t dêh char tơmơ̆t yua dơ̆ng tơdrong jang tơgŭm sut hnam pơgia, hnam hiah hiot ăn dôm ŭnh hnam đei hiong răm, ưh kơ hiong khei ‘năr pơjing trong jang tơgŭm plơ̆ng. Dêh char Gia Lai vei sơđơ̆ng jên jang ‘moi kiơ̆ jên jang mong hiă Trung ương hlôi asong, hăm jên đơ̆ng tơpôl vang tơgop kiơ̆ Mặt trận Tổ quốc Việt Nam păng dôm jên trŏ luơ̆t nai hai. Hơdai hăm jên hu, khŭl lĭnh ƀô̆ đô̆i păng Kŏng an pơm hơnăp jang tơm lơ̆m hơdrin iŏk jang, pơm hnam, chơ bơ̆n tơmam ming man.