Đơ̆ng khei 11, dôm Hơnih jang Ki thuơ̆t choh jang sa tơring - hơdrol sơ̆ vei lăng tơgŭm joăt jang ăn kơ 124 xăh, phường păng tơring gĭt kăl tơ̆ Lâm Đồng – pơtơm pơdơh bơ̆jang. ‘Nhŏng Nguyễn Cát Tiên, kang ƀô̆ găh Hơnih jang ki thuơ̆t choh jang sa tơring Đạ Huoai so, đei ăn năm bơ̆jang tơ̆ xăh Cát Tiên. ‘Nhŏng tơroi ƀôh blŭng a oei pơvĭnh, tam mă joăt mă lei tơtĕnh sơđơ̆ng:

“Ƀơ̆t đei klăih song ăn năm jang tơ̆ xăh ‘noh kŭm pơvĭnh, kŭm dai tơtăm, mă lei đei ‘nhŏng oh kơdră chĕp kơ̆l tơring bơngơ̆t truh, vang tơgŭm hăm ĭnh dă ƀiơ̆ kơ bơngơ̆t ƀiơ̆. Yua kơ kŭm klăih song ăn tơring apŭng Cát Tiên so. Lơ̆m tơring đĭ băt hơdăh đĭ tơdrong tơ̆ tơring hơyơ pơm tơlĕch yă kiơ, rong kon kiơ kơna kŭm hơmet ăn dôm hơyak ngăl bơih lăp mơ̆t iŏk hơnăp jang păng bơ̆jang kiơ̆ đĕh”.

Kiơ̆ kơ Tơdrong jang kơ dêh char Lâm Đồng, lơ̆m akŏm kơsô̆ hloh 300 ‘nu bơngai jang kơ teh đak tơ̆ dôm Hơnih jang tơring, lăp 10 ‘nu tơplih ăn năm jang tơ̆ dôm hơnih joăt jang kơ Hơnih jang Pơtrŭt choh jang sa dêh char. 302 kang ƀô̆ uơ oei dơ̆ng đei ăn năm jang tơ̆ dôm anih jang tơdrong jang teh đak tơ̆ xăh vă iŏk jang hơnăp jang bơngai jang pơtrŭt choh jang sa tơring - bơngai jang kơtă pơtho kon pơlei jang chŭn mir jang sa, jang kiơ̆ yan âu rim tơring. ‘Nhŏng Võ Trung Linh, Phŏ kơdră vei lăng Hơnih jang ki thuơ̆t choh jang sa tơring Đạ Huoai hơdrol ki, dang ei bơ̆jang tơ̆ xăh Cát Tiên 2, tơbăt tơdrong ăn năm jang tơ̆ xăh ưh kơ pơm ăn lơ tơ sŭl yua kơ găh lơ kang ƀô̆ tă kơ đĭ joăt tơring ngăl bơih:

“Mă blŭng ĭnh oei vei chơ̆n jơhngơ̆m lơ̆m tơdrong jang choh jang sa, bơ̆jang kiơ̆ hơnăp jang pơtrŭt choh jang sa tơdrong jang ‘long pơtăm kon tơrong. Jơhngơ̆m đon ‘noh oei hơnơ̆ng pơtho kon pơlei rim tơdrong găh ki thuơ̆t ‘long pơtăm, kon tơrong. Dang ei klăih song ăn bơ̆jang tơ̆ tơring kŭm găh lơ ‘noh klăih song ‘nhŏng oh tơ̆ tơring hơyơ ‘noh vih tơ̆ hơnih hơdrol ki đĭ bơ̆jang, ĭnh đĭ băt hơdăh tơdrong hiôk tơ̆ tơring ‘noh bơih jô̆ hloi găh tơdrong jang ‘long pơtăm, kon tơrong. Kơna ƀơ̆t năm vih tơ̆ tơring ‘noh ‘nhŏng oh hơnơ̆ng hơtŏk hloh dơ̆ng mă ưh kơ đei tơdrong kiơ tơhlăk hloi”.

Kiơ̆ hơlen lăng đơ̆ng anih choh jang sa Lâm Đồng, tơdrong khŭl jang pơtrŭt choh jang sa năm tơ̆ xăh bơ̆jang pơm kơđeh jơ năr tơgŭm kon pơlei jang chŭn mir, hơtŏk tơdrong kĕ tơjră hrôih hăm pơrang jĭ tơ̆ ‘long pơtăm - kon tơrong păng pơm tơdrong hiôk vă kon pơlei gơh băt hrĕnh hloh hăm khoa hŏk ki thuơ̆t, mă loi ‘noh jĭ lơ̆m khei ‘năr dêh char tŏk bŏk tŭn pran choh jang sa kơmăy kơmŏk ‘nao. Ƀok Phạm Công Bá, Kơdră Hơnih vei lăng găh Kơtơ̆ng ang - Pơhrăm, Hơnih pơtrŭt choh jang sa dêh char Lâm Đồng, tơƀôh hơdăh tơdrong tơplih tơdrong jang pơgơ̆r ưh kơ pơm tơklăh tơdrong jang:

“Nhôn hơnơ̆ng bơ̆jang kiơ̆ tơdrong jang pơhrăm dôm kang ƀô̆ tơ̆ tơring băt hơdăh dôm trong joăt jang, mă loi ‘noh jĭ hơiŏk ‘lơ̆ng tơdrong jang pơvih ăn pơm lăp hăm tơdrong hiôk pơtrŭt choh jang sa lơ̆m tơdrong ‘nao. Mă đơ̆ng đei jing tơdrong jang tơ̆ dêh char dăh mă tơ̆ xăh ‘noh tơdrong jang pơtrŭt choh jang sa oei hiôk, oei đei tơdrong pơgơ̆r kơjăp đơ̆ng Anih tơm vei lăng găh Choh jang sa păng Cham char, tơdrong pơtho ki thuơ̆t tôch kơ jăp, ‘lơ̆ng, đĭ jơhngơ̆m đơ̆ng Hơnih Pơtrŭt choh jang sa teh đak. Kơlih thoi noh nhôn lui ngeh akhan pơtrŭt choh jang sa tơ̆ xăh ‘noh jĭ anih jang tơ̆ tơring gĭt kăl hloh, bơngai jang tơgŭm bơ̆jang kiơ̆ dôm hơnăp jang pơtrŭt choh jang sa klĕp truh tơring”.

Tơdrong proh hơmet dơ̆ng pơđĭ khŭl bơngai jang pơtrŭt choh jang sa, ăn kang ƀô̆ vih tơ̆ xăh ưh khan lăp pơm tŏ sĕt bơngai jang mă oei tơgŭm Lâm Đồng năm jê̆ hloh tơdrong hơgăt pơjing tơdrong choh jang sa ‘nao, kơjăp. Hăm khŭl jang ki thuơ̆t kơtă hơnih, bơngai hlôh vao găh choh jang sa đei hơmĕng gô truh hăm kon pơlei choh jang sa hrĕnh hloh, jê̆ hloh păng đei yua hloh lơ̆m dôm sơnăm truh.

Tơdrong proh hơmet đĭ đăng khul jang pơtrŭt choh jang sa, ăn kang ƀô̆ vih jang tơ̆ tơring ưh khan lăp vă tơgop găh pơm kơtoei khul bơ̆ jang mă oei pơjing hơyak pran vă rim tơring tơlech jang jơnei Trong jang kăl atŏk tơ iung pơtrŭt choh jang sa truh sơnăm 2030, lăng truh sơnăm 2050. Mă lei, atŭm hăm tơdrong hơmŏ, tơdrong tơplih trong bơ̆ jang jei tơlĕch ăn lơ tơdrong pơkoel hle: pơm hơtŏk tơdrong bơ̆ jang gơh hơgei kang ƀô̆ tơring, sơđơ̆ng hơnih bơ̆ jang, pơm hơtŏk bơ̆ jang ‘lơ̆ng pơvih pơvăn pơtrŭt choh jang sa păng pơm pơkeh dôm tơdrong tơchơ̆t.

‘Nou jei jing dôm tơdrong tŏk bŏk đei lơ tơring pơtruh nơ̆r apĭnh athei ăn kơ Trung ương. Ƀok Lê Quốc Thanh - Kơdră chĕp pơgơ̆r Hơnih tơm Pơtrŭt choh jang sa Teh đak tơroi tơbăt găh dôm trong jang tơlĕch jang kiơ̆ trong jang pơtrŭt choh jang sa lơ̆m jăl ‘nao.

- Ƀok ăi, mưh tơlĕch jang kiơ̆ trong jang khul kơdră chĕp pơgơ̆r 2 kâp, ƀơ̆t yơ tơdrong tơhlăk tơhlĭn hloh lơ̆m tơdrong proh hơmet dơ̆ng khul jang pơtrŭt choh jang sa?

Ƀok Lê Quốc Thanh: Mưh bơ̆n tơlĕch jang kiơ̆ trong jang khul kơdră chĕp pơgơ̆r tơring 2 kâp ‘noh tơdrong proh hơnet khul bơ jang pơtrŭt choh jang sa đei tôch kơ lơ tơdrong tơlĕch ăn. Mă kăl hơdrol ou ki đei mĭnh khul bơ̆ jang, hơnih jang pơtrŭt choh jang sa kơ apŭng - ‘nou ji khul bơ̆ jang găh pơtho tơbăt kmăi kmŏk tơm ăn kơ tơring.

Mưh hơmet ming ‘noh rim tơring jei mơsuơ̆l mơsoăl găh tơdrong ăn rim hơnih jang ou lơ liơ. Rim tơring vei kơjăp rim hơnih jang kơ apŭng, krao ‘noh akhan hơnih jang kơ tơring. Mă lei Hơnih tơm Pơtrŭt choh jang sa Teh đak ƀôh bơ̆n oei đei mĭnh khul pơtrŭt choh jang sa sơlam.

Ƀok Tổng Bí thư hlôi pơrô̆ athei pơm lơ liơ vă ăn khul ou yak tơjê̆ hăm kon pơlei, tơklep hăm kon pơlei hloh dơ̆ng. Tơdrong tơchơ̆t 60 đei pơjing tơm ‘noh tơdrong hơmet ming khul jang ou kiơ̆ trong pơrô̆ jang. Bơ̆ jang pơtrŭt choh jang sa ‘noh kăl tơjê̆ hăm kon pơlei, tơklep hăm kon pơlei păng yak hơdoi hloi hăm kon pơlei choh jang sa. ‘Nou jĭ tơdrong kăl hloh lơ̆m bơ̆ jang pơtrŭt choh jang sa păng jing tơdrong rơvơn tih tên hloh hăm khul jang pơtrŭt choh jang sa.

- Hrei ou khul pơtrŭt choh jang sa tơring kăl iŏk jang hloi lơ tơdrong jang. Kiơ̆ kơ ih, ‘nou jing tơdrong kăl hloh mă kang ƀô̆ pơtrŭt choh jang sa tơring kăl iung jang hloi ah?

Ƀok Lê Quốc Thanh: Rŏ năng vă pơma bơ̆n lăng găh ‘ngoăih ‘noh đơ̆ng 1-2, đei ‘măng 3 ‘nu kang ƀô̆ pơtrŭt choh jang sa tơ̆ lơ̆m mĭnh tơring ‘noh nhen lĕ tơdrong bơ̆ jang mơmat mă keh đang. Mă lei, bơ̆n hlôi tơ iung pơjing mĭnh khul ăn bơ̆ jang pơtrŭt choh jang sa ou bơih. Pơtrŭt choh jang sa ưh khan lăp hơdrô̆ mĭnh ‘nu mă lei vang iung jang hơdoi hăm rim khul anai hloi. Ƀok Tổng Bí thư đei nơ̆r pơrô̆ athei ‘noh ưh kơ pơjao hloi ăn khul pơtrŭt choh jang sa, păng khul kơdră chĕp pơgơ̆r tơring jei vang iung jang hloi.

Kơdră chĕp pơgơ̆r Hơnih vei lăng kon pơlei tơring atŭm hăm khul pơtrŭt choh jang sa, 2 dăh mă 3 ‘nu kang ƀô̆ pơtrŭt choh jang sa tơ̆ tơring ‘noh iung jang kăl hloh. Mă lei ‘ngoăih kơ ‘noh bơ̆n đei tôch kơ lơ khul jang anai hai: Hơnih mơdro sa đei tơdrong jang pơtrŭt choh jang sa; khul pơtrŭt choh jang sa pơlei pơla - dôm khul jang, rim bơngai bơ̆ jang chă tơchĕng hơlen, pơtho tơbăt kmăi kmŏk, bơngai lăp đon hăm tơdrong jang ou; khul jang hơvơh pơtrŭt choh jang sa pơlei pơla nhen Ƀĭ thư pơlei, thôn trơng tơdăh tơring proh hơmet ăn.

Bơ̆n tơgoăt dih băl jing mĭnh khul jang pơtrŭt choh jang sa.Lơ loh rŏ khan lăp hơdrô̆ ƀar ‘nu bơngai jang pơtrŭt choh jang sa, mă lei oei đei truh kơ mơjĭt ‘nu bơngai lơ̆m minh hơp tak xah; kơdih kon pơlei jang pơtrut choh jang sa; khul hơdruh tơdăm, drŏ kăn jei vang iung jang. Trong jang pơtrŭt choh jang sa ou jĭ trong jang hle hloh.

- Ƀok ăi, tơpă yan ou đei dôm tơdrong tơnap tap mưh ăn kang ƀô̆ năm bơ̆ jang tơ̆ tơring: trong yak hơtăih, tơdrong bơ̆ jang tim mă sơđơ̆ng, iŏk jang hloi lơ tơdrong jang. Trong jang kơjăp ‘lơ̆ng vă rơ̆t jơ̆ng păng pơjing jơhngơưm pran ăn khul pơtrŭt choh jang sa tơ̆ tơring ‘noh yă kiơ hŏ ƀok?

Ƀok Lê Quốc Thanh: Rŏ năng vă chă pơma ‘noh tim mă lăh đei ,khul pơtrŭt choh jang sa đei sơđơ̆ng jơhngơ̆m nhen dang ei. Mă blŭng ‘noh bơ̆n hlôi sơkơ̆t hơdăh hơnih jang pơtrŭt choh jang sa tơring, jĭ mĭnh hơnih jang đei Teh đak ăn sa jên khei vă pơvih pơvăn ăn tơdrong bơ̆ jang đei Teh đak pơjao ăn.

Mă ƀar ‘noh gơ̆h lang să tơdrong jang tơdăh bơ̆n iung jang ‘lơ̆ng jang hơdoi teh đak hăm kon pơlei, tơgoăt jang hơdoi ‘lơ̆ng hăm hơnih mơdro sa. Nhôn hlôi iok đei lơ nơ̆r chă apĭnh athei đơ̆ng hơnih mơdro sa ‘meh vă vang iung jang hơdoi hăm khul jang pơtrŭt choh jang sa păng klăh asong dih băl dôm tơdrong đei iŏk yoa sa hơpăh. Tơdăh bơngai bơ̆ jang pơtrŭt choh jang sa jang ‘lơ̆ng, ‘noh ‘ngoăih kon jên khei oei gơh jang dôm tơdrong jang đe hơvơh ou to păng gơh đei iok yoa sa hơpăh đơ̆ng đe hơpăh ăn. Bơ̆n tôch kơ lui tơdăh jang tơnăp lei ưh kơ jor gơ̆h đei iŏk yoa sa hơpăh đơ̆ng tơdrong jang ou lơ̆m khei ‘năr hrei ‘nou.

- Ƀok ăi, tơdrong hơmet ming Tơdrong tơchơ̆t 83 tok bŏk đei lơ tơring hơmŏ tơgŭm ăn hơmet ming tơtom, hơmet ming dôm tơdrong tơhlăk tơhlĭn lơ̆m iung jang chĕp pơgơ̆r trong jang pơtrŭt choh jang sa hle? Ih tơroi mă hơdăh hloh dơ̆ng găh tơdrong tơplih ou năng? 

Ƀok Lê Quốc Thanh: ‘Nou jĭ trong đei tơlĕch ăn hăm pơtrŭt choh jang sa Teh đak adoi nhen Hơnih tơm vei lăng Choh jang sa păng Cham char. Bơ̆n tŏk bŏk hơmet ming dơ̆ng khul kơdră chĕp pơgơ̆r tơring 2 kâp atum hăm rim tơdrong tơchơ̆t ‘nao, mă kăl lơ̆m khei ‘năr jăl sơnăm jang kiơ̆ Tơdrong tơchơ̆t 57 găh tơplih ‘nao tơchăr păng tơplih kơsô̆. Bơ̆n kăl pơjing đei dôm hla bơar tơchơ̆t lei lăi, lơ̆m ou đei Tơdrong tơchơ̆t 83 găh bơ̆ jang pơtrŭt choh jang sa.

Nhôn tok bŏk vă tơ iung pơjing minh tơdrong jang pơm lơ liơ vă iung jang lei lăi dih băl lơ̆m khei ‘năr bơ̆ jang khul kơdră chep pơgơ̆r tơring 2 kâp, lơ̆m khei ‘năr bơ̆n proh hơmet khul jang, lơ̆m khei năr jang kiơ̆ rim tơdrong tơchơ̆t păng trong tơlĕch jang tih tên đơ̆ng Đảng păng Teh đak. Nhôn gô apĭnh jet tơgoăt iŏk lơ nơ̆r tơgop đơ̆ng rim pang jang hơdoi vă tơ iung pơjing đei dôm trong jang kơ dôm bơngai bơ̆ jang pơtrŭt choh jang sa trŏ lăp, rŏ năng gô chih tơmơt hloi lơ̆m khei ‘năr hơmet ming Tơdrong tơchơ̆t 83 ou.

- Lei ah, bơnê kơ ih hlôi ‘măn jơ ‘năr chă pơma dơnuh ou hơ.