Lơ̆m ‘măng ‘mi tih đak lơ̆p hơtuch khei 11 âu ki, tơring pơ tăm ‘nhot tơm kơ dêh char Lâm Đồng hiong răm kơtang. Kŭm hăm rơbâu hek tar ‘nhot, ƀum, plei tŏk bŏk iŏk yua đei ôm, klĭ đĭ ‘noh jĭ hnam hơ drao, hnam kơmĭl, teh đei đak jroh hoch pơm ăn tơdrong tơiung ming dơ̆ng choh jang sa đơ̆ng bơngai pơtăm ‘nhot đĭ pơmat ‘noh sa roi pơmat hloh dơ̆ng. Hiong pơgoh ‘noh jĭ nơ̆r tơroi ăn tơring tơm pơtăm ‘nhot, ƀum, plei tơ ter thong đak krong Đa Nhim pơdui đunh klĕch dôm xăh: D'Ran, Ka Đô, Đơn Dương, Quảng Lập kơ dêh char Lâm Đồng.

Kŭm hăm teh pơtăm dôm kơloăi ‘nhot tŏk bŏk tih, plei, hiong răm kơtang hloh hăm bơngai pơtăm ‘nhot kơmăy kơmŏk ‘nao tơ̆ tơring âu yua hnam hơdrao, hnam kơmĭl hăm tơmơ̆t jên jang ăn 1.000m2 tŏk truh kơhrĕng triê̆u hlak jên. Tơ̆ hơnăp hiong răm đơ̆ng bơngai pơtăm, anih choh jang sa păng khŭl kơdră rim xăh pơtăm ‘nhot tơm kơ dêh char Lâm Đồng kŭm hlôi tơlĕch tơdrong jang pơtrŭt choh jang sa, asong tŏk iŏk jên choh jang sa vă tơgŭm kon pơlei tơiung ming jang sa.