Đơ̆ng rŏng 30 sơnăm jô̆ đơ̆ng tơdrong pơvei ‘lơ̆ng păng 25 sơnăm tơlĕch jang Tơdrong tơchơ̆t BTA, tĕch mơdro 2 pang hlôi tŏk pran pơđĭ găh lơ păng ‘lơ̆ng, jing 1 tơdrong ‘lơ̆ng gĭt kăl pơtrŭt mŭk drăm tŏk, pơjing tơdrong jang păng hơtŏk loi dơ̆ng jang hơdai tĕch mơdro đơ̆ng 2 mŭk drăm đei tơdrong tơgŭm băl lơ. Dang ei Mi dơ̆ng hơnih kơsô̆ 11 lơ̆m kơsô̆ dôm teh đak tơmơ̆t jên jang lơ̆m Việt nam hăm 1-500 tơdrong jang păng akŏm jên pơm hla ar hloh 12 ti USD. Tơplơ̆ dơ̆ng, Việt Nam đei 266 tơdrong jang tơmơ̆t jên jang tơ̆ Mi hăm akŏm kơsô̆ jên pơm hla ar dang 1,4 ti USD. Găh tĕch mơdro sơnăm 2025, akŏm jên tĕch tơmam đei hloh 140 ti USD, tŏk vă jê̆ 300 ‘măng pơting hăm 30 sơnăm hơdrol.

Tơ̆ Hop akŏm, dôm bơngai tang măt hlôi pơma dơnuh jrŭ găh mŭk drăm tĕch mơdro Việt Nam - Mi, akŏm găh tơdrong jang tơgŭm thuê̆ păng trong jang tang găn, vei lăng tĕch mơdro, tơgop pơm ‘lơ̆ng tơdrong hlôh vao atŭm, pơtrŭt jang hơdai tơpă đơ̆ng dôm pang ƀơm truh; kiơ̆ đơ̆ng noh pơih să jang hơdai păng hơmet ming tơdrong ‘lơ̆ng ăn pơvei mŭk drăm tĕch mơdro Việt Nam- Mi hơtŏk tơiung sơđơ̆ng, kơjăp păng vang đei yua lơ̆m jăl jang đơ̆ng rŏng dơ̆ng.