Tơdrong hrŭ ăn, iŏk tơvih teh hơnơ̆ng jĭ “tơhlăk tơhlĭn” kơtang hloh mưh hơlen sơkơ̆t hơdăh kơjă teh pơdui đunh, tơdrong pơm hla bơar tơnap tap pơm ăn lơ tơdrong jang hiơ hiơ̆ keh đang. Dêh char jei tơjră muh măt tơdrong hơmơt ưh kơ iŏk đei thuê̆ đơ̆ng kon jên iŏk yoa teh tơ̆ tơring găh Pơmơ̆t, pơm kơnê̆ truh tơdrong proh hơmet kon jên jang ăn sơnăm 2025. Atŭm hăm ‘noh, tơ̆ lơ tơring, phương ‘nao đơ̆ng rŏng proh hơmet hơnih bơ̆ jang tim mă hơmet pơ ‘lơ̆ng khul bơ̆ jang, tim mă tôm tơdrong pơjao jang vă sơng iŏk dăh mă chĕp pơgơ̆r vei lăng tơdrong jang. Sơnăm 2026, dêh char Gia Lai tơlĕch vă jang iŏk tơlĕch kon jên jang 100% trong tơlĕch ăn. Ƀok Thái Đại Ngọc- Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Gia Lai, athei rim hơnih jang, rim tơring kăl đei trong jang hơdăh vă hơmet pơ ‘lơ̆ng rim tơdrong tơhlăk tơhlĭn, hơmet pơ ‘lơ̆ng păng hơvơn khul jang tơmơ̆t jang tơgŭm djru ăn atok tơ iung mŭk drăm tơpôl.