Pơtôch dăr lăng hơlen xek tơlang nơ̆r tơgop đơ̆ng bơngai tăh hla pơtruh ăn ‘măng hop akŏm mă 9, Kuô̆k hô̆i jăl XV; pơtôch bơ̆ jang sơng pơma dơnuh hăm kon pơlei, xek tơlang kơthơ tơkêng păng xek tơlang tơkêng đơ̆ng kon pơlei sơnăm 2025. Mĭnh lơ̆m dôm tơdrong đei rim kơdră tang măt Kuô̆k hô̆i lăng kơjăp ‘noh dôm trong tơlĕch jang kơtang vă tang găn sa pơgơ̆m pơjĭp jơnei lơ̆m khei năr kơnh. Rim kơdră tang măt pơma hơdăh, sơnăm 2025, bơ̆ jang tang găn sa pơgơ̆m pơjĭp hlôi iŏk đei jơnei hơ iă. Tơdrong ƀôh, xek tơlang sa pơgơ̆m pơjĭp, pơm tơdrong glăi ‘moi kiơ̆ rim ‘măng bơ̆ jang dăr lăng hơlen, hơnơ̆ng iung jang kơtang hloh dơ̆ng. Bơ̆ jang dăr lăng, tơchơ̆t rôp, xek tơlang rim tơdrong sa pơgơ̆m pơjĭp đei iung jang ƀlep hăm tơdrong tơchơ̆t kơ khôi luơ̆t. Lơ tơdrong sa pơgơ̆m pơjĭp kơtang, pơm hiong răm tôch kơ dêh hơnơ̆ng đei xek tơlang; pơm glăi kơ lơ kang ƀô̆, kơdră chĕp pơgơ̆r, lơ̆m ou đei hloi kơdră chĕp pơgơ̆r găh lơ̆m Hơnih tơm bơ̆ jang chinh trĭ, Ban Bí thư vei lăng đei pơm hơdăh. Bơ̆ jang iŏk tơvih mŭk drăm sa pơgơ̆m pơjĭp lơ̆m jăl jang dăr lăng iŏk đei jơnei hơ iă. Rim kơdră tang măt athei hơnơ̆ng tơlĕch jang kiơ̆ kơtang dăr lăng tơdrong chĕp pơgơ̆r, tang găn hơlou sa pơgơ̆m pơjĭp đơ̆ng hrôih, đơ̆ng hơtaih.