Dôm năr ou, Quân đoàn 34 (Hơnih tơm Ƀô̆ đô̆i vei lăng sơlam teh đak) tŏk bŏk hrơ̆p minh ‘măng tơlĕch jang ming man 100 pơbŭng hnam ăn rim ŭnh hnam tơ̆ Gia Lai păng Dak Lăk hiong răm hnam oei lơ̆m ‘măng ‘mi kial đak hơbông ou ki, lơ̆m ou 70 pơbŭng hnam tơ̆ Gia Lai păng 30 pơbŭng hnam tơ̆ Dak Lăk. Lăp đơ̆ng rŏng iŏk đei nơr athei, hloh 600 ‘nu kang ƀô̆, ƀô̆ đô̆i atŭm hăm lơ kmăi kmŏk, gre hlôi iung yak năm truh tơ̆ tơring, pơjao khul jang iŏk jang dôm tơdrong, iung jang hơdoi hăm kơdră tơring păng ŭnh hnam kon pơlei vă tĕnh koăng dăr lăng, pơjing trong jang păng pơgơ̆r jang ming man, sơđơ̆ng ƀlep kih thuơ̆t, kơjăp ‘lơ̆ng păng keh đang; Đại tá Phạm Hồng Sơn, Kơ iĕng Kơdră jang chĭnh trĭ Hnam trương Quân sự Quân đoàn 34 tơbăt, đĭ đămng khul, truh hloi đe ƀok thây pơgang kơ hơnih ou, jei đei ăn iung năm jang vă vei lăng năng tông jơhngơ̆m pran jăng grăng akou ăn ƀô̆ đô̆i păng bơ̆ jang ‘lơ̆ng. Quân đoàn 34 tơlech trong jang ming man keh đang rim hnam oei hơdrol kơ năr 20/1/2026, tơgŭm ăn kon pơlei hrôih sơđơ̆ng hơrih sa păng tom sơng Têt lơ̆m pơbŭng hnam ‘nao.