Đơ̆ng rŏng kơ ‘mi tih đak tơjroh tôch dêh tơter đak krong Đa Nhim, ‘nhŏng Nguyễn Quốc Bảo, tơ̆ xăh Đơn Dương, Lâm Đồng, oei ƀôh hli lơ̆m jơhngâm đĕch. Hnam kơmĭl 4.000m2 đei kơjă hlŏh 1,6 ti hlak jên kơ unh hnam răm kơ đak tơjroh hŭt. ‘Nhŏng tơhôih: “Đon adrin jang xa, kơbăt dôm yơ jên tuh đĭ tơ̆ âu, ba kŭm pă đei jên vă jang xa bơih. Dang ei ba athei tuh dơ̆ng teh tôch kơ hiong jên”.

Dôm unh hnam pơtăm ‘nhot kiơ̆ trong pơtăm thoi so tơter đak krong Đa Nhim kŭm oei kơrŭn jơhngâm choh jang dơ̆ng đơ̆ng rŏng kơ ‘mi tih, đak lơ̆p. Oei chĕp ‘nhik choh, sir chă đing dôm jĭt met ƀŭ tơ̆ hơla teh vă tơruih ‘nhot, ‘nhŏng Hồ Việt Linh, tơ̆ plei Tân Lập 1, xăh Ka Đô, ăn tơbăt, hlŏh 6.000m2 ‘nhot hla lăt unh hnam ‘nhŏng vă jê̆ kăt tĕch bơih tơtă hiong đĭ yoa đơ̆ng ‘mi tih đak tơjroh. Pơgar ‘nhot dang ei tĕh dơ̆k kơlơ̆p truh kơ met hloi. Vă choh jang, pơtăm ming dơ̆ng hiong kơ băt dang yơ năr jang, jên vă pơtăm: “Đei ƀôt hiong đĭ, đei ƀôt ‘nŏh teh dơ̆k kơlơ̆p. Dang ei athei jang hơmet dar deh dơ̆ng. Oei đei yă kiơ, tơmam kiơ oei gơ̆h yoa ‘nŏh iŏk yă ‘nei, oei yă kiơ pă gơ̆h yoa bơih ‘nŏh hŭt, tơplih ming dơ̆ng. Dang ei athei tơplih ming ƀek, tơplih ming tơlei, ko tôm tĕch. Teh ‘nŏh tam mă gơ̆h choh hơmet athei gô ‘năr prăng, teh hrĕng ‘mơ̆i gơ̆h jang”.

Hiong răm tôch dêh ‘nŏh jĭ nơ̆r đei pơma mưh bou truh tơring pơtăm 'nhot tơm tơter đak krong Đa Nhim pơdui truh tơ̆ dôm xăh: D'Ran, Ka Đô, Đơn Dương, Quảng Lập kơ dêh char Lâm Đồng. Kŭm hăm teh pơtăm dôm kơloăi 'nhot oei kăt tĕch, hiong răm kŭm tôch lơ hăm bơngai pơtăm 'nhot hăm kơmăy kơ mŏk 'nao tơ̆ tơring âu yoa hnam kơlư̆i, hnam kơmĭl hăm jên jang 1 sao tŏk truh kơ hrĕng triu hlak jên.

Tơ̆ hơnăp tơdrong hiong răm đơ̆ng bơngai pơtăm ‘nhot, anih choh jang sa păng khŭl kơdră chĕp kơ̆l rim tơring pơtăm ‘nhot tơm kơ dêh char Lâm Đồng hlôi tơlĕch dôm trong jang tơgŭm kon pơlei jang chŭn ‘nhot, tơlĕch trong tơgŭm vă bơngai pơtăm ‘nhot tơiung dơ̆ng tơdrong choh jang sa.

Ƀok Trần Hùng Dũng, Kơdră Anih vei lăng kon pơlei xăh Đơn Dương, dêh char Lâm Đồng ăn tơbăt: “Ƀơ̆t măt dang ei xăh hơnơ̆ng krao hơvơn kon pơlei kơchăng choh hơmet ming teh đei ƀơm ưh kơ ‘lơ̆ng đơ̆ng ‘mi tih đak lơ̆p âu ki păng vă chă rơih dơ̆ng kơloăi ‘long pơtăm mă lăp. Mă loi ‘noh vă pơyua ăn Tết Nguyên đán, chă rơih iŏk kơloăi ‘long pơtăm, dôm kơloăi ‘nhot kơđeh năr vă tom kăt tĕch ƀât Tết Nguyên đán. Găh trong jang đunh đai kơnh ‘nŏh hơnơ̆ng choh hơmet ming păng đei trong jang tŏk đunh, rơđăh rơđong păng akŏm jên, tơmam vă tơiung ming dơ̆ng pơgar chŭn ‘nhot tơm tơ̆ xăh Đơn Dương”./.