Lơ̆m noh, Luơ̆t Asong jang (tơplih hơmet) hăm lơ tơplih kăp gĭt, kăt tơjur kơtang gah hla bar ưh kăl; pơm kơđeh dôm jĭt tơdrong jang tĕch pơdro kiơ̆ pơkăp; asong jang kơtang hloh ăn kơmăi kơmŏk hơgei 'nao, tơplih 'nao gơh hơgei, jang mŭk drăm rơgoh 'lơ̆ng; pơm trong hiôk ăn hơnih asong jang đơ̆ng teh đak đe... Kuô̆k hô̆i adoi hơlen Tơchơ̆t gah minh ƀar tơdrong jang tih, kăp gĭt lơ̆m tơring teh kơ Hơnih tơm Hà Nội; Tơchơ̆t hơmet tơplih minh ƀar tơdrong kăp gĭt vă hơtŏk pơlei tơm Hồ Chí Minh; minh ƀar tơchơ̆t vă hơtŏk pơlei tơm Đà Nẵng. Gah minh ƀar tơchơ̆t jang pơklaih tơnap tap, tơhlăk tơhlĭn lơ̆m pơgơ̆r jang kiơ̆ Luơ̆t groi teh, Kuô̆k hô̆i hơlen Tơchơ̆t hơmet ăn dôm tơdrong mă Teh đak thu iŏk teh 'măn ăn tơdrong jang vei sơđơ̆ng tơpôl, păng hơtŏk mŭk drăm – tơpôl, tơguăt hăm tơchơ̆t hrŭ 'mong, tơgŭm, asong oei xa, ưh kơ jô̆ hăm minh ƀar tơdrong kăl.

Gah tơdrong jang pơgang hơmet jĭ jăn, kiơ̆ Tơchơ̆t đơ̆ng Kuôk hô̆i, đơ̆ng năr 1/1/2026, bơngai tơjê̆ hin dơnuh păng bơngai đơ̆ng 75 sơnăm tŏk tơ̆ kơpal đei kla tôm jên khăm hơmet jĭ; hăm grŭp bơngai kue, jang xa jên khei tŏ sĕt đei xa tơgŭm gah jên hơmet jĭ jăn. Đơ̆ng sơnăm 2030 gô pơtơm pơm kiơ̆ pơkăp ưh iŏk jên hơmet jĭ jăn tơ̆ hnam pơgang. Kuô̆k hô̆i adoi hơlen Tơchơ̆t kĭ pơkăp asong jang kiơ̆ Tơdrong pơkăp jang kơ teh đak gah tơring tơrang 'nao, tơjur hin dơnuh  sơđơ̆ng 'lơ̆ng păng hơtŏk mŭk drăm – tơpôl tơring kon pơlei kon kông păng groi kông jăl sơnăm 2026 – 2035; atŭm hăm minh ƀar luơ̆t, tơchơ̆t kăp gĭt nai.