‘Măng hop akŏm mă 10 jang đei lơ tơdrong tôch ‘lơ̆ng, hăm khôi luơ̆t, tơdrong tơchơ̆t đei drơ̆ng nơ̆r lơ hlŏh đơ̆ng sơ̆ truh dang ei. Tơdrong jang chih pơjing luơ̆t lơ̆m hop akŏm mă 10 đei tơƀôh hơdăh kiơ̆ tơdrong tơchơ̆t 66 đơ̆ng Anih tơm Chinh trĭ hăm nơ̆r athei đĭ sơnăm 2025 ‘nŏh hơmet pơ ‘lơ̆ng rim tơdrong oei tơhlăk găh trong pơgơ̆r, 2027 trong pơgơ̆r jang gơ̆h jang kiơ̆ hiôk sơđơ̆ng kiơ̆ đơ̆ng khul kơdră pơgơ̆r tơring 2 tăl, 2028 hơmet kĕh rim khôi luơ̆t găh tơmât jên jang xa, tĕch mơdro, vang tơgop hơnhăk anih tơmât jên jang kơ Việt Nam mât lơ̆m grŭp 3 teh đak dơ̆ng hơdrol kơ ASEAN.

Găh đon pơhnŏng jang tŏk 2 kơsô̆ đơ̆ng sơnăm 2026 tơƀôh hơdăh đon hơpơi 'mĕh jang tŏk pran, khŏm bơ̆ jang tôch ai đơ̆ng rim anih ạng chinh trĭ lơ̆m chăl jang tŏk ‘nao kơ teh đak. Trong jang tơm 'nŏh hơnơ̆ng pơ 'nhŏ ăn tơdrong jang tŏk tơklep hăm vei sơđơ̆ng mŭk drăm lơ̆m teh đak, pơjing hơyak tŏk pran 'lơ̆ng găh trong pơgơ̆r jang păng pơjing anih tơmât jên jang, tĕch mơdro hiôk hian, sơđơ̆ng 'lơ̆ng, rơđăh rơđong. Khul kơdră teh đak athei hơtŏk hrĕnh tơdrong tơlĕch dôm hla ar pơtho păng bơ̆ jang đei yoa hrơ̆ch 'lơ̆ng dôm khôi luơ̆t păng tơdrong tơchơ̆t đei Quốc hội drơ̆ng nơ̆r, pơm ‘lơ̆ng ăn dôm trong tơgŭm 'nao gơ̆h tơmât yoa hrôih lơ̆m tơdrong arih xa.