Truh dang ei, Anih vei lăng pôk rơih kơ dêh char Đắk Lắk hlôi tơlĕch tơdrong Hơgăt bơ̆ jang; Trong vă pơgơ̆r pôk rơih; Tơchơ̆t pơjing dôm khul jang đei: Khul hơmet tơmam, Khul roi tơbăt, Khul vei sơđơ̆ng păng Khul jang pơgang, Khul sek tơlang dôm tơdrong tơkêng, Khul pơvih pơvăn, Khul pơgơ̆r jang hrĕnh; pơjing trang roi tơbăt hăm điên tư kơ Anih vei lăng pôk rơih dêh char.

Anih pơgơ̆r pôk rơih kơ dêh char Đắk Lắk hlôi pơgơ̆r Hop akŏm tơlĕch trong pơgơ̆r pôk rơih kiơ̆ trong pơgơ̆r kơtă tơ̆ Anih chĕp kơ̆l Đảng dêh char păng pơih trư̆k tuyê̆n tơ̆ 102 xăh, phường hăm hlŏh 10.000 ‘nu bơngai tang măt vang akŏm. Jơnŭm pơgơ̆r kon pơlei dêh char pơgơ̆r pơtâp pơhrăm găh tơdrong pôk rơih ăn 48 xăh, phường păih Hơlĕch Đắk Lắk hăm dang 400 ‘nu bơngai tang măt vang akŏm. Anih MTTQ Việt Nam dêh char hơmet lơ tơdrong păng pơgơ̆r pơma nuh hơlen năng ‘măng mă mônh lơ̆m ‘năr 8/12.

Đĭ đăng xăh, phường tơlĕch jang tơtom dôm tơdrong ƀơm truh tơdrong pôk rơih kiơ̆ tơdrong hơgăt; jang đang tơdrong rơih hơmet bơngai jang păng klăih song kơsô̆ bơngai vă lĕch pơjei pơm Bơngai tang măt Jơnŭm pơgơ̆r kon pơlei tơ̆ xăh păng pơgơ̆r đang hop akŏm pơma nuh hơlen năng 'măng mă mônh bơih.