Đơ̆ng ‘năr 16/11 truh dang ei, Trong gre 27C đei 52 anih teh hơlih, 35 anih teh hơlih găn đĭ trong hloi. Dêh char Khánh Hòa athei găn lê̆ gre kơdâu tơ̆ trong krang âu vă vei lăng sơđơ̆ng păng pơgơ̆r bơ̆jang hơmet ming. Ưh lăp hăm trong gre 27C đĕch, ‘mi tih, đak lip oei găn lơ trong yak vih vât tơ̆ lơ tơring kơ dêh char Khánh Hòa, mă loi jĭ trong gre teh păng trong gre treng. Akŏm đĭ đăng hiong răm găh trong gre dang 1.970 ti hlak jên.

Lăp đơ̆ng rŏng kơ đak hrŏ, dôm tơring hlôi akŏm tơmam, gre, khul bơngai jang vă hơmet pơ ‘lơ̆ng, akŏm sek tơlang dôm anih đei teh hơlih tơ̆ trong gre dêh char, trong gre tơ̆ xăh. Truh dang ei 28/29 tŏ trong đei teh hơlih gre gơ̆h kơdâu vih vât dơ̆ng bơih. Hơdrô̆ Trong gre 27C oei hơmet ming dơ̆ng, yoa teh krang kơnê̆, hơmet pơmat tat păng oei hơnơ̆ng đei teh hơlih./.