‘Nâu jĭ hop akŏm mă blŭng, kŭm jing Hop akŏm pơlong năng hơdrol tơ̆ Lâm Đồng, đei pơih trư̆k tuyê̆n truh tơ̆ 123 anih pơih pơdăh tơ̆ xăh, phường, tơring gĭt kăl lơ̆m dêh char. Đảng ƀô̆ xăh Đơn Dương đei pơjing kiơ̆ đơ̆ng tơmât hơdai đảng ƀô̆ dôm xăh Đạ Ròn, Tu Tra păng thĭ trơ̆n Thạnh Mỹ, akŏm đĭ đăng đei vă jê̆ 1.200 ‘nu đảng viên.

Hop akŏm hlôi pơma nuh păng tơchơ̆t trong jang, đon pơhnŏng, tơdrong vă jang tơm lơ̆m jăl truh, khŏm pơjing xăh Đơn Dương jang tŏk tôm tơdrong, pran kơjăp. Adrih hơtŏk iŏk yoa jô̆ păh lăp kiơ̆ kơ̆l bơngai ƀât hơtuch jăl jang đei vă jê̆ 100 triu hlak jên 1 sơnăm; unh hnam tơnuh pă hơla kơ 0,2%.

Pơma tơ̆ hop akŏm, Phó Thủ tướng Nguyễn Hòa Bình akhan, trong jang hŭt lê̆ apŭng, tơmât hơdai dôm xăh pơma atŭm jĭ trong jang tih, gĭt kăl đơ̆ng Trung ương. Đơn Dương oei dơ̆ng tơ̆ hơnăp tơdrong iung jang ‘nao, 1 tơdrong ‘lơ̆ng ‘nao. Phó Thủ tướng lui, Đảng ƀô̆, Khul kơdră pơgơ̆r păng kon pơlei dôm hơdrĕch hơdrung xăh Đơn Dương gô bơ̆ jang đei jơnei tơdrong Tơchơ̆t đơ̆ng Hop akŏm, pơjing Đơn Dương jing 1 anih ang hơdăh găh tơring tơrang ‘lơ̆ng rŏ tơ̆ dêh char Lâm Đồng./.