‘Năr 28/8, tơ̆ Anih jang kơ Trung ương Đảng, Grŭp jang kơsô̆ 2 kơ Anih tơm Chinh trĭ yoa Thủ tướng Phạm Minh Chính pơgơ̆r bơ̆ jang hăm Khul kơdră chĕp kơ̆l Đảng plt Hải Phòng păng Anih chĕp kơ̆l Đảng dêh char Quảng Ngãi, vang tơgop nơ̆r ăn Hla ar chih kăl păng tơdrong rơih hơmet bơngai jang chĕp kơ̆l vă tơroi lơ̆m Hop akŏm Đảng ƀô̆ jăl jang 2025 - 2030.

Pơma pơtôch jơ bơ̆jang, Thủ tướng Phạm Minh Chính lăp đon hăm hla ar chih kăl vă tơroi lơ̆m Hop akŏm Đảng ƀô̆ Hải Phòng păng Quảng Ngãi lơ̆m jăl jang truh, atŭm hăm ‘nŏh tơƀôh hơdăh tơdrong ưh tam ‘lơ̆ng, yoa kiơ păng chih iok ƀai hŏk kăl. Trong pơgơ̆r jang, tơdrong vă jang đơ̆ng 2025 - 2030 hlôi tơƀôh hơdăh đon pơhnŏng chinh trĭ, trong vă jang tŏk păng chih hơdăh dôm trong jang tih đơ̆ng Đảng. Thủ tướng athei khul kơdră chĕp kơ̆l Đảng 2 tơring hơnơ̆ng chih iŏk nơ̆r tơgop, hơmet pơ ‘lơ̆ng hla ar kăl, tơdrong vă jang, khul jang, tơmam, jên vă jang, đon pơhnŏng vă gơ̆h tơlĕch jang hloi đơ̆ng rŏng kơ Hop akŏm.