Tơ̆ hơnih plang song pham kơ Khoa hơlen lăng pham, Hnam pơgang Đa tơring Tây Nguyên, ƀok Nguyễn Trọng Tân (xăh Trường Xuân, dêh char Lâm Đồng) tŏk bŏk tơ oei gô bơngai đei grŭp pham khăi plang song pham vă dŏng hơkăn sư. Ƀok tơroi, hơkăn sư đei jĭ pơplei tơpu kon, lơ ‘măng năm khăm mă lei ƀak si athei sŏng sa tơmam bek ‘lơ̆ng vă hơtŏk kơsô̆ pham yua kơ pham tŏ sĕt ưh kơ gơh răih, mă lei hơkăn sư ‘noh găh grŭp pham khăi kơna ưh kơ đei pham ƀet tơmơ̆t.

“Ƀak si athei krao hơvơn bơngai lơ̆m hnam tŏk plang song pham, tơdăh ưh kơ đei grŭp pham ‘noh tơplih, plang song pham đang bơih ‘noh ƀak si athei dang ei lơ̆m hơnih mong pham kŭm ưh kơ đei grŭp pham ‘noh mă tơplih kơna dang ei athei ƀĭch gô. Ƀĭch gô ‘noh gơnang đơ̆ng păih kâu lak ƀô̆ krao hơvơn ‘noh ‘năr brei đei 1 ‘nu, năr ‘nâu đei dơ̆ng 1 ‘nu truh dơ̆ng.”

Lơ̆m hơnih hơmet kơ Khoa hơmet hơioh jĭ, yă Đào Thị Mai oei tơ̆ xăh Ea Knốp, dêh char Đắk Lắk ba mon drŏ kăn 8 sơnăm đei ưh kơ măh pham đơ̆ng nge (Thalassemia) năm ƀet tơmơ̆t pham. Prăt 3 sơnăm kơ âu, rim khei bre yă sâu sư ‘noh năm tơ̆ hnam pơgang vă ƀet tơmơ̆t 2 tơpu pham. ‘Măng âu, pham ưh kơ măh, yă athei gơnang kơ dôm bơngai jang tơgŭm asong pham.

“Ƀơ̆t hiơ̆ ưh kơ đei pham mon hơmren jĭ jơ̆ng ti, klak tih, hơving măt. Ĭnh athei ba mon 1 khei 1 ‘măng tơ̆ Hnam pơgang đa khoa tơring Tây Nguyên. Khei ‘năr âu, hnam pơgang ưh kơ măh pham ĭnh athei apĭnh pham đơ̆ng đe duch hnam trưng đại học Y dược plang song pham tơgŭm.”

Kiơ̆ kơ ƀak si ƀác sĩ Đặng Việt Nam – Khoa hơmet hơioh jĭ, Hnam pơgang Đa khoa Tơring Tây Nguyên, hơdrô̆ khoa dang ei hơmet ăn dang 100 ‘nu hơioh đei jĭ pham ưh kơ măh đơ̆ng nge. Jô̆ păh lăp 1 ‘nu hơioh jĭ kăl kơ ƀet tơmơ̆t 1–1,5 khei 1 ‘măng, đei bơngai ăl athei ƀet tơmơ̆t 2–3 giĕng 1 ‘măng. Mĭnh ‘măng, dang 40–50 ‘nu mon kăl kơ ƀet tơmơ̆t, lơ hơioh athei iŏk 2–3 tơpu pham, hơtŏ dang vă jê̆ 1 kơlich pham.

“‘Meh vă pham tŏk lơ mă lei ưh kơ đei pham. Ưh kơ sĭ 1 ‘nu mon 1 tơpu pham mă đei mon ƀet tơmơ̆t 2 truh 3 tơpu. Yua kơ dôm mon kơpal kơ 10 sơnăm kơsô̆ kĭ hơioh lơ, kơsô̆ pham ƀet tơmơ̆t kăl 1 ‘măng kŭm lơ kiơ̆. Jing ‘meh vă dang ei tŏk bŏk tôch kơ kăl.”

Jô̆ păh lăp rim khei, dôm hnam pơgang lơ̆m dêh char Đắk Lắk kăl vă jê̆ 2.000 tơpu pham vă kơ̆p kư̆u păng hơmet jĭ, lơ̆m noh Hnam pơgang Đa khoa Tơring Tây Nguyên lơ hloh. Hơnih jang găh Pham păng ƀet tơmơ̆t pham kăl tŏ sĕt tôch ai 500 tơpu pham mong răk vă vei sơđơ̆ng tơ jră hăm tơdrong kăl dei dei. Mă lei, đơ̆ng blŭng khei 7 truh dang ei, kơsô̆ pham sơng iŏk ưh kơ măh, pơm ăn tơdrong ưh kơ măh pham jing kơtang.

Tơ̆ hơnăp tơdrong pham mong răk pơyua ăn kơ̆p kư̆u păng hơmet jĭ tơ̆ dôm hnam pơgang ưh kơ măh kơtang, Anih vei lăng kon pơlei dêh char Đắk Lắk hlôi đei hla ar hơtŏk loi dơ̆ng tơdrong jang krao hơvơn plang song pham tơgŭm. Hơdai hăm ‘noh, Hnam pơgang Đa khoa tơring Tây Nguyên kŭm đei kơthơ krao hơvơn kon pơlei vang plang song pham tơgŭm. Ƀak si H’Nương Niê - Kơdră Khoa hơlen lăng pham, Hnam pơgang Đa khoa tơring Tây Nguyên roi tơbăt:

“Khoa kŭm hlôi roi tơbăt hăm Khŭl kơdră vei lăng Hnam pơgang vă vang jang tơgŭm dôm trong jang, mă hơdrol ‘noh Khoa gô sơng iŏk pham tơ̆ Khoa đơ̆ng năr mônh truh năr 5 păng jang ‘năr dơ̆ng hloi, mă 2 ‘noh jang hơdai hăm Hơnih jang găh pham, ƀet tơmơ̆t pham vă krao hơvơn plang song pham tơgŭm; mă 3 ‘noh krao hơvơn đĭ đăng  đoàn viên công đoàn lơ̆m hnam pơgang vang plang song pham dŏng bơngai. Hnam pơgang hlôi đei kơsô̆ pham vă pơyua ăn dôm bơngai jĭ kơ̆p kư̆u tơ̆ hnam pơgang”.

Lơ̆m khei ‘năr ưh kơ măh pham pơdui đunh, tơdrong mơ̆t jang tơtom đơ̆ng khŭl kơdră chĕp kơ̆l, anih jang pơgang păng tơpôl ‘noh jĭ tơdrong tơm tơchơ̆t vă pơvei tơdrong hơrih ăn kơ hrĕng ‘nu bơngai jĭ. Mĭnh tơpu pham asong ăn ưh khan lăp tơgŭm yak hloh tơdrong krê hơmơt ƀơ̆t măt mă oei jing tơdrong ‘lơ̆ng ‘mêm mơnat păr ang jơhngơ̆m đon vang tơgŭm băl lơ̆m tơpôl.