Tơ̆ sơnăm ‘ngoăih kơ 70, rim pơgê, yă Nguyễn Thị Hoàng Minh, oei tơ̆ Kueng kơphô̆ 12, phường Buôn Ma Thuột, dêh char Đắk Lắk oei hơnơ̆ng truh tơ̆ lăm pơtâp gym jê̆ hnam vă pơtâp jơhngơ̆m pran. Yă Minh tơroi, hơdrol ki yă hlôi ‘nhoen tơdrong pơtâp gym ‘noh hoach jên păng ưh kơ trŏ lăp hăm bơngai kră. Mă lei ƀơ̆t jơhngơ̆m pran tơ jur, hơnơ̆ng jĭ kơting, yă khŏm pơhrăm dôm ƀai trŏ lăp. Păng đơ̆ng noh, lăm gym jing hơnih tơgŭm yă pơhrăm hơkâu jăn, pơm hiôk jơhngơ̆m, tơklep dơ̆ng hăm kon sâu păng bôl buăl.

“Ĭnh truh tơ̆ lăm gym âu đei hloh 1 sơnăm bơih. Blŭng a ‘noh đe bơngai pơhrăm đei tơgŭm păng pơhrăm ăn kơ ĭnh pơtâp lăp ai. Đơ̆ng rŏng kơ brŏk đơ̆ng pơtâp ‘noh ĭnh ƀôh hơkâu hiôk, jăng, hơbĕch hơbal”.

Oei hăm ƀok Vũ Ngọc Dững, oei tơ̆ phường Tuy Hòa, dêh char Đắk Lắk, teh sŏk iĕr ‘noh tơdrong chơt hai, trong vă sư pơhrăm jơhngơ̆m pran đơ̆ng rŏng kơ pơdơh hưu hai. Hloh 10 sơnăm teh sŏk iĕr, sư hlôi iŏk đei 1,2 tơmam hơpăh tơ̆ rim jăl, mă lei tơdrong pơm ăn kơ sư chhôk hloh ‘noh jĭ đei hơkăn sư ling lang vang hơdai hăm sư tơ̆ cham pơtâp.

“Hơdrol ki ‘noh ĭnh teh ƀŏng ƀan, păh ƀŏng lŏng păng đă ƀŏng lŏng. Mă lei iŏk đơ̆ng tơdrong teh sŏk iĕr đe teh lơ ‘noh hloh đăm jĭt sơnăm ĭnh pơtơm tơplih jing teh sŏk iĕr. Đơ̆ng noh truh dang ei kŭm vang pơlong lơ jơnei. Lơ̆m ŭnh hnam ‘noh hơkăn ĭnh dai vang pơngôi môn ‘nâu, găh lơ yua kơ jơhngơ̆m pran ‘noh tơm”.

Tơdăh nhen gym dăh mă teh sŏk iĕr đei cham pơtâp, lăm pơtâp păng tơmam ‘noh dôm môn nhen pơtâp hơkâu kiơ̆ kơ yuăn khan dưỡng sinh ‘noh đei lơ bơngai kră rơih iŏk yua kơ pơtâp ƀônh. Ưh kơ kăl tơmam, dôm ƀai pơtâp lăp ai, hơdai hăm jơ̆ng ti păng vei lăng dui jơhngơ̆m tơgŭm bơngai pơtâp tep hiôk hloh, dă ƀiơ̆ kơ jĭ bơ̆n kơting, hơtŏk jơhngơ̆m pran plei nuih, trong dui jơhngơ̆m, trong klak.

Hrei ‘nâu, tơ̆ dêh char Đắk Lắk, lơ kâu lak ƀô̆ pơtâp dưỡng sinh đei pơjing păng pơvei hơnơ̆ng, pơm hơnih ngôi pơchơt đei yua ăn bơngai kră. Ưh khan lăp hơtŏk ‘lơ̆ng jơhngơ̆m pran, ‘moi kiơ̆ pơhrăm kâu lak ƀô̆, dôm bơngai lơ̆m khŭl oei đei tơdrong hiôk tơƀơ̆p băl, tơroi băl tơdrong hlôh vao vei lăng jơhngơ̆m pran sơnăm kră, pơm tơdrong chơt hơiă păng jơhngơ̆m hiôk. ‘Nâu kŭm jing tơdrong ‘lơ̆ng tơgŭm môn âu păr ang jơ̆p jang đơ̆ng pơlei tơm truh tơring tơrang. Yă Huỳnh Thị Ba Lan, Kâu lak ƀô̆ Dưỡng sinh phường Buôn Hồ, roi tơbăt:

“Kâu lak ƀô̆ dưỡng sinh nhôn đei 37 ‘nu, blŭng a ‘noh pơtâp vă kơ chơt, hơtŏk ‘lơ̆ng jơhngơ̆m pran. Đơ̆ng rŏng ‘noh phường pơjing kâu lak ƀô̆ păng krao hơvơn đĭ đăng đe mŏ oh vang akŏm, hơnhăk ăn tơdrong chơt găh jơhngơ̆m đon păng jơhngơ̆m pran. Mưh tơ̆  phường đei tơdrong jang ‘noh mŏ oh vang akŏm păng kŭm hơnơ̆ng năm tơƀơ̆p hăm kâu lak ƀô̆ tơplŏng kơdâu kơ dêh char Đắk Lắk.

Hăm tơdrong kăl “Hơrih chơt, hơrih pran, hơrih đei yua”, dôm kâu lak ƀô̆ bơngai kră lơ̆m dêh char hlôi pơjing trong pơhrăm, pơgơ̆r dôm ƀai pơtâp trŏ lăp hăm jơhngơ̆m pran, ‘meh vă păng tơdrong hiôk đơ̆ng rim bơngai. Kiơ̆ đơ̆ng noh, tơdrong pơtâp hơkâu jăn đơ̆ng bơngai kră roi ‘năr roi hơtŏk tơiung, tơgop hơtŏk ‘lơ̆ng jơhngơ̆m pran păng tơklep hơdai tơpôl. Kiơ̆ kơ yă Triệu Thị Ngoan, Kơdră vei lăng Khŭl bơngai kră dêh char Đắk Lắk, đơ̆ng rŏng tơmơ̆t hơdai, mă đơ̆ng tam mă sơđơ̆ng găh pơgơ̆r mă lei tơ̆ dôm khŭl tơring hơdrol ki, dôm tơdrong pơtâp hơkâu đơ̆ng bơngai kră oei đei pơvei hơnơ̆ng.

“Mă đơ̆ng dang ei Khŭl bơngai kră tam mă đei pơjing tơ̆ 102 xăh, phường ‘nao mă lei lơ khŭl tơring so ‘noh oei pơvei tơdrong jang păng pơgơ̆r lơ tơdrong jang ‘lơ̆ng hơiă nhen pơgơ̆r joh ayŏ kơdŏ soang, tơplŏng kơdâu, pơtâp dưỡng sinh, pơlong păh ƀŏng lŏng hơ iơch... vă sơng bơngai kră vang akŏm. Kiơ̆ đơ̆ng noh bơngai kră đei pơhrăm jơhngơ̆m pran, hơrih chơt, hơrih pran, hơrih hiôk chơt”.

Hrei ‘nâu, dêh char Đắk Lắk đei vă jê̆ 290 rơbâu ‘nu bơngai kră. Kŭm hăm tơdrong hơtŏk tơiung pran kơtang đơ̆ng dôm tơdrong pơtâp hơkâu jăn păng dôm tơdrong đei yua ‘lơ̆ng hơnhăk ăn, roi ‘năr roi lơ bơngai kră hơdrin vang pơtâp pơhrăm. Dôm cham ngôi pơchơt ‘noh ưh khan lăp tơgŭm đe sư pran jăng,hiôk mă oei păr ang jơhngơ̆m đon hơrih ‘lơ̆ng, hơrih chơt - pran - đei yua.