Jơ livestream đei pơgơ̆r hăm tơdrong vang pơgơ̆r đơ̆ng Hơp tak xah Choh jang sa rơngoh Krông Pach, kon pơlei, khul đoàn viên hơdruh tơdăm tơring atŭm hăm mĭnh ƀar hơnih mơdro sa vang tơgŭm djru logistics păng chơ pơdŭ. Tơdrong pơgơ̆r đei pơdăh lơ̆m lơ trong hơyuh pơdăh. Iung pơma tơ̆ jơ pơgơ̆r livestream, Bí thư Đảng ủy tơring Ea Knuêc Ngô Thị Minh Trinh pơma hơdăh:“Tơdrong tơm kơ pơgơ̆r livestream ou ưh khan lăp pơdơ̆h ƀơ̆t tơdrong tĕch răt sâu riêng, mă kăl hloh ‘noh tơƀôh tơbăt um rup, tơmam drăm kăl kơ pơlei pơla; pơtrŭt kon pơlei vang iung jang kiơ̆ ‘măng tơplih kơsô̆, đơ̆ng tơdrong hŏk tĕch mơdro trư̆k tuyên truh tơƀôh tơbăt dôm tơdrong joăt joe kơ tơring; adoi sơkơ̆t hơdăh tơdrong ‘lơ̆ng kơ tơmam drăm choh jang sa Dak Lăk lơ̆m hơnih tĕch răt.”

‘Ngoăih đei ƀôh kang bang kơ̆l đơ̆ng Ƀĭ thư tơring, mĭnh ƀar ‘nu kon pơlei jei vang năm tơƀôh tơbăt tơmam drăm. Yă Hoàng Thị Nguyên, 70 sơnăm, oei sa lơ̆m thôn Tân Sơn, tơring Ea Knuếc chơt hơ iă tơroi tơbăt mưh ‘măng mă blŭng chĕp micro pơma tơroi tơbăt tơmam drăm pơlei pơla kơdih ƀơ̆t jơ ‘năr pơdăh kơtă:“Đei păh đảng uỷ tơring, bí thư atŭm hăm rim hơnih bơ̆ jang tơring bơ̆n pơgơ̆r lơ lou, mă đơ̆ng 70 sơnăm ră bơih mă lei ba oei kơrŭn đĭ jơhngơ̆m vang năm vă rim kôn mon kon sou chơt hơ iă ‘nă hal kơ ŭnh hnam kăl hơdrin lơ liơ vă đei lơ sâu riêng tĕch mơdro tơ̆ teh đak đe păng ba hưch hanh hơmanh bơnê kơ kôn mon kon sou kơdih ‘noh jing tơdrong chơt hiôk hloh”

Hăm kon pơlei, tơdrong khul kơdră chĕp pơgơ̆r tơring ưh khan yak hơdoi hăm tơdrong tơchơ̆t dăh mă hla bơar, mă hăm vang iung jang hloi, hlôi ba kang ƀô̆ oei tơjê̆ hăm kon pơlei păng tơklep hăm kon pơlei hloh dơ̆ng. Tơdrong kơdră chĕp pơgơ̆r tơring atŭm hăm kon pơlei “pơdăh rapor” ‘noh trong jang tôch hơ iă vă lang să jơhngơ̆m đon tơplih ‘nao tơchăr, adoi hơmet pơ ‘lơ̆ng jơhngơ̆m đon lui yom dih băl kơtang ƀar păh kon pơlei hăm khul kơdră chĕp pơgơ̆r teh đak. Ƀok Mai Đình Thọ, Kơdră chĕp pơgơ̆r Hơp tak xah Choh jang sa rơgoh Krông Pach, hôn bơnê kơtang trong tơchăr ou:“Ba tôch lăp đon hăm mĭnh ‘nu drŏ kăn Bí thư tơring ưh khan lăp akŏm lơ̆m bơ̆ jang chĕp pơgơ̆r tơ̆ tơring mă oei lăng ba kơjăp truh tơdrong tơgŭm djru kon pơlei ‘moi kiơ̆ trong tơchăr tĕch tơmam drăm online. Trong jang ou tơgŭm ăn kon pơlei ƀôh hơdăh jang kiơ̆ trong hle, pơm hơtŏk kơjă tơmam drăm păng hơnhăk đei iŏk yoa kơjăp hloh dơ̆ng. Kiơ̆ kơ ĭnh, mĭnh ‘nu drŏ kăn Bí thư lơ lou mĭnh păh gơh hơgei, mĭnh păh gơ̆h găt băt ‘mêm kơ eng kon pơlei, tơpă yak hơdoi hăm kon pơlei choh jang sa vă twochă trong ‘lơ̆ng hơ iă hloh ăn kon pơlei, lăng ba truh tôm tơdrong hơrih sa kơ kon pơlei lơ lou.”

Jơ pơgơ̆r pơm ăn rơbou ‘nu bơngai lăng păng kĭ pơkăp răt iŏk tơmam drăm. Ưh khan lăp hơdrô̆ tơgŭm djru tĕch mơdro tơmam drăm ăn kon pơlei, tơdrong pơgơ̆r ou oei tơgŭm ăn kon pơlei ƀôh tom măt hŏk pơhrăm kiơ̆ trong tơƀôh tơbăt, tĕch mơdro tơmam drăm hăm kmăi kmŏk kơsô̆, pơjing đei tơdrong joăt pơm tơlĕch-tĕch mơdro tơklep hăm hơnih tĕch răt gơh hơgei.

Găh tơdrong Bí thư tơring Ea Knuêc, dêh char Dak Lăk vang pơgơ̆r livestream tĕch sâu riêng năr ou đei lăng jĭ trong jang hơdăh lơ̆m tơlĕch jang kiơ̆ Tơdrong Tơchơ̆t 57-NQ/TW găh pơm hơtŏk kơtang jang kiơ̆ khoa hŏk kmăi kmŏk păng tơplih kơsô̆, adoi tơƀôh hơdăh nơ̆r pơkăp “tơjê̆ kon pơlei, tơklep hăm kon pơlei” hăm tơdrong jang yan ou đơ̆ng kơdră chĕp pơgơ̆r tơring mưh iung jang kiơ̆ trong khul kơdră chĕp pơgơ̆r tơring 2 kâp.