Đơ̆ng rŏng mĭnh sơnăm pơma đam hăm păh tĕch răt, truh khei 8 sơnăm ou, Kŏng ty Pơm tơlĕch-Tĕch mơdro-Mơdro sa Việt Thắng, tơring Ea Kar, dêh char Dak Lăk hlôi tĕch hlot 25.000 tŏ chơ khŏ như̆a ƀot lơ̆m hnam năm tơ̆ teh đak Mi.

Lơ loh, đơ̆ng rŏng lơ sơnăm pơjei kĕ hăm chơ khŏ như̆a tơ̆ Trung Quốc, Philipine păng mĭnh ƀar teh đak tơ̆ Đông Nam Á, Hơnih mơdro sa gah lơ̆m tơring kơ dêh char Dak Lăk hlôi kĕ yak truh tơring hơtăih plăih kơjung hloh.

Yă Nguyễn Thị Dung, Kơdră chĕp pơgơ̆r Kŏng ty tơbăt, vă pơjei kĕ tơ̆ hơnih tĕch răt tơm dơnơm apŭng plĕnh teh nhen teh đak Mi, ‘ngoăih kmăi kmŏk ‘lơ̆ng, chĕp pơgơ̆r hơgei, hơnih mơdro sa kăl hmŏ ăn ‘lơ̆ng găh kon jên jang vă kĕ pơm tơlĕch tơmam drăm, trŏ lăp tôm tơdrong pơkăp tĕch răt dih băl hăm rim hơnih hle. Jĭ hơnih jang ‘lơ̆ng prăt 20 sơnăm kơ rim hơnih mong jên tơ̆ tơring, yă Dung lui akhan, Việt Thắng gô đei tôm kon jên jang.“Mưh tơmoi apĭnh răt iŏk dơ̆ng tơmam drăm ‘noh Việt Thắng kăl pơih să hnam kmăi păng răt dơ̆ng kmăi kmŏk vă kĕ pơm tơlĕch đei tôm ƀlep pơkăp dih băl răt iŏk dôm yơ ‘noh. Pŭn ai tơpă mơ̆n đei Agribank Hơnih jang tơ̆ Dak Lăk ling lang yak hơdoi tơgŭm djru, pơjing rơvơn vă kơ nhôn gơh chă tŏk iŏk jên tơmơ̆t jang răt kmăi kmŏk păng pơm hnam kmăi. Hơnih mong jên ăn tŏk iŏk ‘lơ̆ng hơ iă, pơm hla bơar koăng păng rim ‘măng iŏk ba hre tôch kơ ƀônh”.

Hăm Kŏng ty Mơdro sa tĕch mơdro tơ̆ teh đak đe Thế Kỷ, tơring Dray Bhăng, dêh char Dak Lăk, iung jang đơ̆ng rong kon tơrong truh đei jing mĭnh hơnih mơdro sa tĕch mơdro tơ̆ teh đak đe, jei tơƀôh hơdăh tơdrong kăl đơ̆ng kon jên tŏk iŏk păng trong tơmơ̆t jên jang trŏ lăp. Yă Lê Thị Tuyết Sương, Kơdră chĕp pơgơ̆r Kŏng ty tơbăt, tơdrong rơvơn kơ Kŏng ty ‘noh gơh kiơ̆ yok rok jơ̆ng jang rong kon tơrong đơ̆ng sơ̆ ki, đei asong tŏk iŏk jên, đơ̆ng rŏng ‘noh tơmơ̆t jên jang ăn tĕch mơdro tơ̆ teh đak đe.“Akŏp kon jên ĭnh tŏk bŏk tŏk iŏk đơ̆ng hơnih mong jên ‘noh 3 ti hlak jên. ‘Măng blŭng ba tŏk iŏk kiơ̆ kơ bruh, vă chă ming man hơdroong, răt kon tơrong rong, đơ̆k hiĕm. Lăp đơ̆ng rŏng iŏk tơvih đei kon jên đơ̆ng rong iĕr klo hơkăn mă tơmơ̆t jên jang mơdro sa tơ̆ găh ‘ngoăih”.

Hăm tơdrong tơm kơ tơring groi teh choh jang sa ‘noh kăl hloh, găh lơ hơnih mơdro sa, ŭnh hnam mơdro sa tơ̆ Dak Lăk hlôi pơjing tơdrong jang sa đơ̆ng choh jang sa dăh mă tơmơ̆t jên jang choh jang sa atŭm hăm trong mơdro sa 'noh tơm hloh. Kơ yuơ lơ loh, kon jên tŏk iŏk tơmơ̆t jang choh jang sa jing trong jang kăl hloh lơ̆m tơgŭm ăn atŏk tơ iung mŭk drăm ŭnh hnam, kiơ̆ Tơdrong tơchơ̆t 68 đơ̆ng Hơnih tơm Chinh trĭ. Păng vă iung jang hơnăp jang ou, ‘ngoăih rim hơnih sơdrai, hơnih jang, hơnih mong jên oei iung jang hăm khul tơpôl pơjing kơ hrĕng khul tŏk iŏk jên tơ̆ rim pơlei pơla. Yă H Ley Sia Êban, kang ƀô̆ vei lăng drŏ kăn tơring Dray Bhăng, dêh char Dak Lăk tơbăt, ‘moi kiơ̆ rim khul tơpôl tơ̆ tơring, rim khul tŏk iŏk jên hlôi tơgŭm ăn kon pơlei jang sa iŏk đei jơnei kơjăp.“Hloh đơ̆ng pơjing khul tŏk iŏk jên ‘noh rim bơngai lơ̆m khul adoi nhen kon pơlei hlôi năm chă tŏk iŏk hiôk hloh, đei kon jên tơmơ̆t jang sa ou to. Hloh dơ̆ng, Agribank jei hlôi pơih să ăn tŏk iŏk lơ hloh dơ̆ng vă tơgăl ăn tơdrong ‘meh vă pơih să mơdro sa kơ kon pơlei. Mưh đei kon jên jang ‘noh kon pơlei mă pơ̆n chă mơdro sa, atŏk tơ iung mŭk drăm kơ ŭnh hnam”.

Kiơ̆ đơ̆ng ƀok Lê Văn Thịnh, Kơdră chĕp pơgơ̆r Agribank Hơnih sơdrai Dak Lăk, lơ̆m khei năr Dak Lăk hlôi tơƀưh hăm đak dơsĭ, tơdrong tĕch mơdro tơmam drăm choh jang sa tơ̆ teh đak đe kơ dêh char sa roi đei rơvơn hloh dơ̆ng, hơnih mong jên jei gô hơmet ming dôm tơdrong pơkăp tơtom vă tơgŭm djru iung jang dôm tơdrong rơvơn ou.“Truh ou kơnh  nhôn đei trong jang hơdăh, akom lơ̆m dôm tơmoi đei ƀơm truh tĕch mơdro tơmam drăm choh jang sa tơ̆ teh đak đe. ‘Nou jĭ mĭnh lơ̆m dôm tơdrong tơm kơ dêh char Dak Lăk. Dang ei hlôi đei tơdrong pơkăp dih băl păng tŏk bŏk pơm hla bơar kiơ̆ trong bơ̆ jang. Tơchĕng hơlou lơ̆m sơnăm 2025 ou ‘noh jei tŏk lơ, hơdrin iung jang keh đang lơ hloh trong pơprŏ jang đơ̆ng Hơnih tơm jang jên hu pơjao ăn”.

Ưh kơ lăp hơdrô̆ ăn tŏk iŏk kon jên jang, rim hơnih mong jên tơ̆ Dak Lăk hlôi păng tŏk bŏk “Yak hơdoi” jơnei hăm hơnih mơdro sa păng kon pơlei. Đơ̆ng dôm tơdrong pơkăp tĕch tơlĕch tơmam drăm choh jang sa năm tơ̆ teh đak đe truh dôm trong jang mŭk drăm ŭnh hnam tơ̆ rim pơlei pơla, đĭ đăng tŏk bŏk tơgop atŏk tơ iung kơjăp ‘lơ̆ng mŭk drăm tơring, pơm hơtŏk tơdrong hơrih sa ăn kon pơlei păng sơkơ̆t hơdăh hơnăp jang tơm kơ tơdrong jang mŭk drăm ŭnh hnam.