Jĭ mĭnh lơ̆m 4 tơring ưh kơ đei jang kiơ̆ hơgrop kiơ̆ tơdrong tơchơ̆t proh hơmet hơnih bơ̆ jang, tơring Quảng Hoà đei dêh char Lâm Đồng pơjao pơgia 55 ƀiên chê̆. Mă lei, đơ̆ng rŏng hloh 1 khei bơ̆ jang, tơring lăp đei 32 ƀiên chê̆. Ƀok Hoàng Trung Diện, Kơdră chĕp pơgơ̆r Hơnih vei lăng kon pơlei tơring Quảng Hòa tơbăt, tơdrong mă ou pơm ăn truh “lon” hơnih păng “chă pơklep” lơ̆m tơmơ̆t kang ƀô̆ tŏk bơ̆ jang:“Mă kăl lơ̆m pôk hơtŏk kang ƀô̆ chĕp pơgơ̆r rim hơnih bơ̆ jang. Hơnih jang dang ei tim mă đei kơ iĕng kơdră chĕp pơgơ̆r păng tim mă đei kơdră chĕp pơgơ̆r hơnih jang, lăp đei 2 ‘nu kang ƀô̆ ‘noh kang ƀô̆ joăt jang bơ̆ jang proh hơmet hla bơar, kang ƀô̆ bơ̆ jang vei lăng jên bơ̆ jang. Hơnih bơ̆ jang vei lăng kon pơlei tơring pôk tơmơ̆t mĭnh ƀar ‘nu kơdră lơ̆m Đảng adoi nhen păh Jơnŭm vei lăng kon pơlei iung jang tơgŭm ăn Hơnih vei lăng kon pơlei tơring lơ̆m chĕp pơgơ̆r bơ̆ jang”.

Lơ̆m mă đei tơring Quảng Hòa tŏk bŏk ưh kơ măh ƀiên chê̆ ‘noh tơring Krông Nô, dêh char Lâm Đồng tă tŏk bŏk “tơnap proh ăn” mưh lăp tơ̆ Hơnih bơ̆ jang vei lăng Joh ayŏ Đă ƀŏng lŏng tơplŏng kơdou tơring hlôi đei truh 26 ‘nu kang ƀô̆. Ƀok Huỳnh Long Quốc, Kơdră chĕp pơgơ̆r Hơnih vei lăng kon pơlei tơring tơbăt, lăp đơ̆ng rŏng jang kiơ̆ hơgrop pêng tơring jing mĭnh, ‘noh đei: Tơring Dak Drô, Tân Thành păng thĭ trân Dak Mâm (apŭng Krông Nô, dêh char Dak Nông so), tơring Krông Nô hle sơng iŏk hloi Hơnih bơ̆ jang vei lăng Joh ayŏ kơdŏ soang Đă ƀŏng lŏng tơplŏng kơdou đơ̆ng apŭng so, pơm ăn truh bơngai ‘noh lơ, tơdrong jang ‘noh tŏ sĕt: “Dang ei tơdrong bơ̆ jang ‘noh ưh kơ đei, đe ‘nhŏng oh tôch pơngơ̆t. Rim tơring anai đei pơjing dôm hơnih bơ̆ jang pơm hla bơar lơ loh lơ liơ mă ưh kơ klăh asong ‘nhŏng oh năm bơ̆ jang tơ̆ tơring anai, dang ei 26 ‘nu ưh kơ đei tơdrong jang yă kiơ. Đei sa jên khei mă lei ưh kơ bơ̆ jang yă kiơ, hơpơi dêh char đei trong tơgŭm djru ăn tơring vă hơmet pơ ‘lơ̆ng tơdrong ‘nou”.

Đơ̆ng rŏng khei blŭng bơ̆ jang kiơ̆ khul kơdră chĕp pơgơ̆r tơring 2 kâp, dêh char Lâm Đồng dơ̆ng mă 4 lơ̆m teh đak găh tơdrong lăp đon bơ̆ jang ‘lơ̆ng tơdrong bơ̆ jang teh đak. Mă lei, tơdrong proh hơmet kang ƀô̆ tim mă “ƀlep bơngai, ƀlep tơdrong jang”, “đei tơring rơkăh, đei tơring ưh kơ măh” kang ƀô̆ joăt jang hlôi pơm ăn tơdrong bơ̆ jang kơ khul kang ƀô̆ tơring tim mă iŏk đei ƀlep nhen tơdrong hơpơi ‘meh vă. Mă hơdăh dêh char đei 93 tơring, phương ưh kơ đei kang ƀô̆ joăt jang găh bơ̆ jang kmăi kmŏk kơtơ̆ng ang pơre nơ̆r; 60 tơring, phương ưh kơ măh kang ƀô̆ bơ̆ jang vei lăng mŭk drăm bri brăh păng cham char; 33 tơring, phương ưh kơ măh kang ƀô̆ bơ̆ jang lơ̆m tơdrong jang vei lăng tơ iung pơjing ming man…

Vă hơmet pơ ‘lơ̆ng, dêh char Lâm Đồng hlôi iung jang ăn kang ƀô̆năm bơ̆ jang ‘măng blŭng hăm 260 ‘nu kang ƀô̆ joăt jang kơ dêh char năm bơ̆ jang tơgŭm ăn tơring. Atŭm hăm ‘noh dêh char jei pơjing 12 khul bơ̆ jang năm truh hloi tơ̆ tơring, phương tơgŭm djru hơmet pơ ‘lơ̆ng tơnap tap, tơhlăk tơhlĭn kơ khul kơdră chĕp pơgơ̆r tơring. Sở Nội vụ hăm Ban Pháp chế Jơnŭm vei lăng kon pơlei dêh char Lâm Đồng jei tŏk bŏk pơjing trong pơprŏ jang pơtruh ăn kơdră kơpal hơnơ̆ng pơjao dơ̆ng khul jang ƀiên chê̆ vă khul kơdră chĕp pơgơ̆r tơring gơh pôk tơmơ̆t, tơplih bơ̆ jang kang ƀô̆ trŏ lăp hăm tơdrong bơ̆ jang.

Ƀok Đỗ Văn Chung, Kơdră chĕp pơgơ̆r Sở Nội vụ dêh char Lâm Đồng tơbăt, dêh char oei tŏk bŏk atŏk kơtang bơ̆ jang proh hơmet, hơmet ming khul kơdră chĕp pơgơ̆r tơ̆ rim tơring vă tơdrong bơ̆ jang khul kơdră chĕp pơgơ̆r 2 kâp tơpă kơtoei bơ̆ jang gơh hơgei jơnei kơjăp:“Ƀơ̆t măt dăr lăng hơlen 124 tơring, phương, tơring kăl đei dôm bơngai joăt jang hơdăh vă pôk hơtŏk. Mă blŭng ‘noh mơ̆ng kiơ̆ khul kơdră lơ̆m tơring chă proh ăn ƀlep bơngai. Mă ƀar ‘noh hơlen lăng dôm tơring hơdrol ou ki vă pôk tơmơ̆t, pơjao năm jang vă tơring ou tơgŭm ăn tơring to đơ̆ng noh mă pôk tơmơ̆t”.

Tơtom ƀôh hơdăh tơdrong “ưh kơ trŏ lăp, hơnăp jang ưh kơ ƀlep” - “đei tơring rơkăh, đei tơring ưh kơ măh” kang ƀô̆ tơ̆ tơring, dêh char Lâm Đồng tŏk bŏk hơnơ̆ng iung jang kơtang vă khul kơdră chĕp pơgơ̆r tơring roi năr roi trŏ lăp, kang ƀô̆ bơ̆ jang ƀlep tơdrong jang, ƀlep hơnăp jang kơdih păng kon pơlei sơng iŏk đei tơdrong tơgŭm ăn trŏ lăp.