Kơdră chĕp pơgơ̆r Kuô̆k hô̆i Trần Thanh Mẫn tơbăt, ‘nou ‘măng mă blŭng Kuô̆k hô̆i pơgơ̆r hop akŏm pơma dơnuh. Ƀok sơkơ̆t hơdăh hlôi đei Kơdră chĕp pơgơ̆r Teh đak Hồ Chí Minh pơrô̆ jang kiơ̆ đơ̆ng sơnăm 1946. Kơdră chĕp pơgơ̆r teh đak Hồ Chí Minh jei hlôi dăr lăng tơ̆ dôm tơring kăl găh mŭk drăm, tơpôl, yak năm tơjê̆ kon pơlei, tơklep hăm kon pơlei, vă băt hlôh kon pơlei. Kơdră chĕp pơgơ̆r Kuô̆k hô̆i rim jăl jang jei hlôi lăng kơjăp tơdrong dăr lăng vă pơjing hơyak pran, tơ iung pơjing păng vei lăng Teh đak. Găh dăr lăng hrei ou ‘noh vă pơjing hơyak pran atŏk tơ iung teh đak lơ̆m chăl hle, Chăl atŏk tơ iung kơ hơdrĕch hơdrung.

Khei năr ou ki, Kuô̆k hô̆i jăl XV lăng ba kơjăp truh bơ̆ jang dăr lăng, lơ ‘măng pơgơ̆r năm dăr lăng hlôi đei iung jang kiơ̆ kơjăp, ‘lơ̆ng păng đei tơroi tơbăt hơdăh hăm Kơdră tang măt Kuô̆k hô̆i, bơngai tăh hla păng kon pơlei. Kiơ̆ kơ ‘noh, bơ̆jang tơ iung pơjing, pơm pơkeh trong pơkăp găh bơ̆ jang dăr lăng đei lăng kơjăp hăm iung jang hơdoi kơjăp, tơtom ƀar păh rim hơnih bơ̆ jang kơ Kuô̆k hô̆i, Khul kơdră chĕp pơgơ̆r teh đak, kơ Hơnih bơ̆ jang Trung ương Mặt trận Tổ quốc, Hơnih xek tơlang kon pơlei, Viện kiểm sát nhân dân, hơnih bơ̆ jang jên hu Teh đak, hơnih jang dăr lăng, rim hơnih jang chih kơtơ̆ng ang tơ̆ Trung ương păng tơring.

Kiơ̆ đơ̆ng Kơdră chĕp pơgơ̆r Kuô̆k hô̆i, bơ̆ jang hơpĭnh hơlen hlôi jing trong jang dăr lăng bơ̆ jang ‘lơ̆ng kơ Kuô̆k hô̆i. Tơ̆ rim ‘măng hop akŏm jei đei pơgơ̆r chă hơpĭnh hơlen păng tơl nơ̆r hơpĭnh. Jơnŭm vei lăng kon kông, rim Hơnih bơ̆ jang kơ Kuô̆k hô̆i đei pơgơ̆r ‘măng tơblang hơdăh găh dôm tơdrong mă bơngai tăh hla, kon pơlei lăng truh.

Lơ̆m khei năr ou ki, Kuô̆k hô̆i ling lang yak hơdoi hăm Khul kơdră chĕp pơgơ̆r Teh đak. Hăm tơdrong chĕp pơgơ̆r đơ̆ng Đảng ‘moi kiơ̆ trong bơ̆ jang, trong tơlĕch ăn trŏ lăp, pơchoh trong atŏk tơ iung mŭk drăm-tơpôl, vei lăng sơđơ̆ng, sơđơ̆ng teh đak. ‘Moi kiơ̆ kơ ‘noh, Khul kơdră chĕp pơgơ̆r teh đak pơtruh ăn Khôi luơ̆t, Tơdrong tơchơ̆t vă Khul kơdră chĕp pơgơ̆r Kuô̆k hô̆i, Kuô̆k hô̆i tơchơ̆t dôm tơdrong pơkăp, tơ iung pơjing khôi luơ̆t, tơdrong tơchơ̆t dôm tơdrong kăl kơ Teh đak.

Kơdră chĕp pơgơ̆r Kuô̆k hô̆i tơbăt, tơ̆ ‘măng hop akŏm tơjê̆ ou, Kuô̆k hô̆i jăl XV hlôi pơjing rim khôi luơ̆t, tơdrong tơchơ̆t atŭm hăm tơplih ‘nao Khôi luơ̆t pơjing rim tơdrong tơchơ̆t kơ Khôi luơ̆t, lơ̆m ou pơjao tơdrong hơdăh ăn Khul kơdră chĕp pơgơ̆r teh đak păng khul kơdră chĕp pơgơ̆r tơring kiơ̆ nơ̆r pơrô̆ đơ̆ng Tổng bí thư Tô Lâm hăm trong jang, tơring tơchơ̆t, tơring bơ̆ jang, tơring chiu pŭ hơnăp jang.“Pơm lơ liơ vă tơdrong bơ̆ jang tơring ƀar kâp sơđơ̆ng ƀlep trong tơlĕch ăn lơ̆m khei năr kơnh, vă tơdrong jang dăr lăng Kuô̆k hô̆i, Hơnih bơ̆ jang Kuô̆k hô̆i iung jang ‘lơ̆ng vă dăr lăng hơlen khôi luơ̆t, tơdrong tơchơ̆t. Pơtih gia 1 sơnăm đei ƀar ‘măng năm dăr lăng đơ̆ng Kuô̆k hô̆i, 2 ‘măng dăr lăng Hơnih bơ̆ jang Kuô̆k hô̆i. Truh ou kơnh, bơ̆n lăp iung jang mĭnh ‘măng dăr lăng kơ Kuô̆k hô̆i, mă lei Hơnih bơ̆ jang Kuô̆k hô̆i kăl năm dăr lăng lơ ‘măng, hơnơ̆ng, truh hloi năm dăr lăng hăt hot vă kơ ƀôh dôm tơdrong tim mă lăp, tơtom hơmet pơ ‘lơ̆ng tơnap tap”.

Kơdră chĕp pơgơ̆r Kuô̆k hô̆i tơbăt, Hơnih bơ̆ jang Kuô̆k hô̆i gô hơnơ̆ng tơgoăt iŏk nơ̆r tơgop đơ̆ng rim kơdră tang măt Kuôk hô̆i, vă truh ou kơnh hơmet ming Khôi luơ̆t bơ̆ jang dăr lăng kơ Kuô̆k hô̆i păng Jơnŭm vei lăng kon pơlei pơtruh ăn Kuô̆k hô̆i lăng hơlen, pơdrơ̆ng kiơ̆ tơ̆ ‘Măng hop akŏm mă 10, Kuô̆k hô̆i jăl XV vă sơđơ̆ng rim tơdrong tơchơ̆t dăr lăng đei jang kiơ̆ ‘lơ̆ng.

Kơdră chĕp pơgơ̆r Kuôk hô̆i Trần Thanh Mẫn pơma hơdăh, tơlĕch jang kiơ̆ kơjăp dôm nơ̆r pơma tơ̆ hop akŏm blŭng ‘Măng hop akŏm mă 8, Kuô̆k hô̆i jăl XV, Tổng Bí thư Tô Lâm hlôi pơma hơdăh: Kăl hrôih chă tơchĕng hơlen, sơkơ̆t hơdăh trong jang, trong pơgơ̆r dăr lăng đơ̆ng Kuô̆k hô̆i trŏ lăp hăm yan ou, veh ver lei lăi hăm tơdrong bơ̆ jang kơ rim Hơnih bơ̆ jang Teh đak anai pơm ăn brăh brư. Hơnơ̆ng atŏk kơtang bơ̆ jang ‘lơ̆ng hơpĭnh, tơl nơ̆r hơpĭnh, tơblang hơdăh, dăr lăng hơlen hla bơar tơchơ̆t khôi luơ̆t, lăng kơ jăp dăr lăng hơlen, pơrô̆ pơrôp tơdrong jang kiơ̆ rim nơ̆r chă athei đơ̆ng rŏng dăr lăng. Kơdră chĕp pơgơ̆r Kuô̆k hô̆i Trần Thanh Mẫn lui akhan:“Hop akŏm pơma dơnuh sơng iŏk đei lơ nơ̆r tơgop tôch ‘lơ̆ng hơ iă đơ̆ng rim kơdră tang măt Kuô̆k hô̆i, rim bơngai joăt jang, khoa hŏk, bơngai jang chă tơchĕng hơlen, tơgop kơtang lơ̆m tơdrong pơm pơkeh tơdrong tơchơ̆t đei ƀơm truh bơ̆ jang dăr lăng lơ̆m jăl ‘nao kơ teh đak, tơgop pơtrŭt kơtang atŏk tơ iung mŭk drăm, sơđơ̆ng teh đak, tơ iung pơjing khul jang chinh trĭ rơgoh ‘lơ̆ng, pran kơjăp iăp kơtang, tang găn sa pơgơ̆m pơjĭp, pơm tơdrong glăi ou to”.