Tơ̆ ƀuôn Kniết, tơring Ea Ktur, dêh char Dak Lăk, unh hnam mŏ H’Lô̆i Êban (hơdrung Êđê) pơgơ̆r et tŏk hnam chơt hơ iă ‘nă hal atŭm hăm kơdrơ̆m kon pơlei vang năm. Pơbŭng hnam ‘nao ‘lơ̆ng liĕm, hăm kon jên ming man 400 triu hlak jên, đei ming man tŏk bŏk lơ̆m mir pơgar chehphe plei triu trao, tơmang lăng tơ̆ hơvĕn chŭn na "trăp prong" ƀlĭk ƀlăk, pơjing đei cham char ‘lơ̆ng rŏ, phĭ tơtŏ dơnŏ ‘lơ̆ng.

Mŏ H’Lô̆i tơroi: Sơ̆ ‘noh ŭnh hnam dơnuh, đei Teh đak tơgŭm ăn rơmo yŏng, su đei 2 tŏ kon; ŭnh hnam tĕch kon iŏk jên răt rong nhŭng yŏng, ‘nao tĕch đei 50 triu hlak jên. Dang ei, tơdrong jang sa đei iŏk yoa tơm kơ ŭnh hnam ‘noh 6 sao chehphe, pơtăm hrou bơ̆n tiu păng sêu riêng. Kon kơdră hlôi keh đang pơm ƀô̆ đô̆i, kon drŏ kăn tŏk bok oei hŏk. Đei đăi tơdrong hơrih sa sơđơ̆ng dơ̆ng kơjăp nhen hrei ou, H’Lô̆i tơbăt:“Bơnê kơ đe mih ma kŏng ang hlôi vei lăng păng năng tông nông gia kon pơlei, vei lăng sơđơ̆ng dơ̆ng kơjăp pơlei pơla. Kŏng ang hlôi chă pơtho ăn kon pơlei pơm kiơ̆ ƀlep trong bơ̆ jang đơ̆ng Đảng, jang sa hơdrin. Nhen ŭnh hnam nhôn dou, đơ̆ng ŭnh hnam dơnuh hlôi yak hloh tơnap tap. Chephe, tiu tĕch măt păng đei mơ̆n sâu riêng, rong dơ̆ng rơmo, nhŭng kơna ŭnh ham mă pơm đei hnam ou”.

Mŏ H’Nhân Niê oei tơ̆ ƀuôn Kram tơring Ea Ktur tơbăt, rim sơnăm kŏng ang jei pơgơ̆r tơdrong jang Đĭ đăng kon pơlei vang vei lăng sơđơ̆ng Teh đak. Kiơ̆ đơ̆ng noh, tơgŭm ăn kon pơlei băt hơdăh dôm tơdrong hơlĕnh pơdăr đơ̆ng khul pơm tơdrong yoch, pơchôih, chere tơdrong tơgoăt pôm ƀơ̆r đon hơdrĕch hơdrung. Kŏng ang jei tơƀôh hơdăh dôm trong hơlĕnh pơdăr đơ̆ng khul kơnê̆ hơlĕnh pơdăr tơgar iŏk mŭk drăm ‘moi kiơ̆ kiơ̆ lơ̆m mạng, tơdrong đe tơdăm pơglăi sơđơ̆ng trong nơnăm ... Mŏ H’Nhân Niê sơkơ̆t hơdăh, đe drŏ kăn oei tơ̆ tơring Ea Ktur ling lang yak hơdoi hăm tơdrong jang “Đĭ đăng kon pơlei vang vei lăng Sơđơ̆ng Teh đak”.“Pơmai oh bơ̆n oei tơ̆ hnam chă pơtho khan ăn kôn mon kon hơ ‘lơ̆p ‘nĕ mơ̆t lăng lơ̆m mạng tơpôl like păng chă pơtrŭh nơ̆r đe dăh mă pơm kiơ̆ khul kơnê̆ pơhlŭ pơdôr tơjră phă pơrăm teh đak, phă pơrăm pơlei pơla. Nhôn hơnơ̆ng chă pơtho khan ăn kôn mon kon sou, mưh yak tơ̆ trong gre, ăp tôm sơnăm ‘mơ̆i mă gơh vơ̆r gre. Lơ̆m khul drŏ kăn jei pơtho khan ăn kôn mon kon sou, pơmai oh koeng ƀôt ‘nĕ mơ̆ng dôm bơngai oei tơ̆ teh đak đe chă pơhlŭ pơdôr pơm tơdrong glăi ou to”.

Jĭ Mŭk sư chĕp pơgơ̆r Khul lui Tin lành tơring Ea Ktur, ƀok Y Djan Êban oei tơ̆ ƀuôn Kniết, tơring Ea Ktur - Bơngai tang măt Jơnŭm vei lăng kon pơlei dêh char Dak Lăk tơbăt: tơdrong hơrih sa kơ kon pơlei phĭ tơtŏ dơnŏ ‘lơ̆ng dơ̆ng kơjăp, lui kơjăp, chă hơkŭm ou to hiôk hian jei gơnơm đơ̆ng khul kŏng ang vei lăng năng tông tơnăp.“Ba ƀôh kŏng ang đơ̆ng tơring truh tơ̆ dêh char vang iung jang vei lăng teh đak păng tơgŭm ăn kon pơlei đei tơdrong hơrih sa sơđơ̆ng dơ̆ng kơjăp. Pơtih gia, tơdăh ưh kơ đei kŏng ang lei kon pơlei hao gre tơ̆ trong kơdou kư̆ kă, gômơ̆ng kơ vă kơ yuơ ưh kơ hlôh vao; đei tơdrong chă tơtơ̆m preh dih băl, tơhil dih băl kơtang đơ̆ng noh pơm ăn đei hloi tơdrong anai. Tơdrong jang tơm kơ Kŏng ang ‘noh vei lăng sơđơ̆ng Teh đak, mă ƀar ‘noh vei lăng năng tông pơlei pơla. ‘Nou jing tơdrong jang kăl hloh, gĭt kăl hloh”.

Hăm 23 sơnăm tơklep kơjăp hăm bơ̆ jang Kŏng ang, Trung tá Y Sila Êban, Kơdră Khul Vei lăng sơđơ̆ng kơ Kŏng ang tơring Ea Ktur, dêh char Dak Lăk hưch hanh hơmanh bơnê kơ yuơ hlôi tơgop tŏ sĕt lơ̆m bơ̆ jang vei lăng sơđơ̆ng teh đak, sơđơ̆ng dơ̆ng kơjăp tơdrong hơrih sa tơpôl tơ̆ pơlei pơla.“Dang ei, ba jei đei kon drŏ nglo tŏk bŏk hŏk bơ̆ jang kŏng ang, kiơ̆ yok rok jơ̆ng ba. Hơpơi ăn kon pơlei ‘nĕ chă mơ̆ng kiơ̆ đe chă pơhlŭ pơdôr pơm tơdrong glăi, mă lei dăh hơdrin jang sa pơtăm, vei lăng năng tông chehphe, tiu mă tơnăp vă atŏk tơ iung mŭk drăm ŭnh hnam”.

Đơ̆ng blŭng sơnăm ou truh dang ei, tơ̆ tơring Ea Ktur, Khul jang Hơdruh tơdăm Kŏng ang kon pơlei găh Hơnih tơm Kŏng ang iung jang hơdoi hăm rim hơnih bơ̆ jang tơ̆ Dak Lăk pơgơ̆r Tơdrong jang “Vih hăm pơlei pơla”. Atŭm hăm lăng ba, pôk tơmam drăm ăn ŭnh hnam đei bơngai lôch dŏng teh đak, tơdrong jang ou hlôi ming man đei 3 hnam hop akom pơlei, tơgŭm ming man 1 pơbŭng hnam 19/8, 1 tŏ hnam ‘Mêm mơnat; pơjao 1 tơdrong jang “Hơnih kmăi tĭnh ăn kơ oh” păng pôk ăn 100 tơnô̆ kon jên hŏk nơ̆r Anh, 20 tong gre tang vang ăn hŏk tro … Trung tá Du Lê – Kơdră chĕp pơgơ̆r Kŏng ang tơring Ea Ktur tơbăt, tơlĕch rim ‘măng Iung jang kơtang iung tơdrŭt, tơchă rôp khul pơm yoch vei lăng sơđơ̆ng dơ̆ng kơjăp ăn rim tơdrong pơgơ̆r Tơbăt 80 sơnăm Kĕch mang Khei Tơhngam, Quốc khánh 2/9 păng Hop akŏm tih kơ Đảng rim hơnih, rim khul hơnơ̆ng năm pơtrui dăr joang vei lăng năng tông ‘long pơtăm ăn kon pơlei.“ ‘Măng mă ou ‘noh kŏng ang iung jang kơtang tang găn khul yoch lơ̆m ‘măng iung jang kơtang hloh, sơđơ̆ng dơ̆ng kơjăp lơ̆m pơyan phĕ sâu riêng, pơyan plei pơlou. ‘Nhŏng oh năm pơtrui hơlen hơdăh dôm tơdrong lơ̆m tơring, tơƀơ̆p pơma dơnuh hăm dôm bơngai chĕp kơ̆l khul lui, dôm bơngai đei kon pơlei lui yom lơ̆m tơring kon kông, pơtho khan ăn kon pơlei vei lăng kơjăp mŭk drăm, ‘long pơtăm kơdih. ‘Ngoăih kơ ‘noh iung jang hơdoi hăm kŏng ang, tơdăh ƀôh dôm bơngai hlĭch ‘noh tơtom tơroi tơbăt ăn kŏng ang tơring hloi”.

Năm dơ̆ng tơ̆ Ea Ktur, Dak Lăk lơ̆m dôm năr khei Tơhngam nuih mơng, mĭnh groi jơk ƀlĭk kơ mir pơgar chehphe, tiu, sâu riêng plei triu trăo ... tơƀăt hơdăh ăn tơdrong hơrih sa phĭ tơtŏ dơnŏ ‘lơ̆ng dơ̆ng kơjăp. Vă pơlei pơla Ea Ktur atŏk tơ iung, rim khul Kŏng ang hlôi păng tŏk bŏk yak hơdoi hăm kon pơlei lơ̆m tơdrong oei sa pơma dơnuh, jang sa; vei kơjăp sơđơ̆ng, tang găn đe pơm tơdrong vă chere Tơgoăt tơgoăt tơgoăl pôm nơ̆r ƀơ̆r đon hơdrĕch hơdrung, vei lăng năng tông sơđơ̆ng dơ̆ng kơjăp, hơnŭk hơnoa ăn rim ŭnh hnam, pơlei pơla.