Dôm năr ou ki, tơ̆ Hơnih ƀuh kăt akŏm Nhơn Bình, (găh Công ty Pơm tơlĕch Tơmam drăm sa Quy Nhơn) phương Quy Nhơn Đông, bơ̆ jang dăr lăng nhŭng răt tơmơ̆t đei iung jang kơtang. Hơdrol vă tơmơ̆t lơ̆m hơnih ƀuh kăt, nhŭng đei chơ akŏm lê̆ mĭnh hơnih găh ‘ngoăih. Tơ̆ ou, bơngai tơ-‘ngla tĕch tơroi tơbăt găh nhŭng ou răt đơ̆ng yơ păng nhŭng tĕch ou lơ dôm yơ. Khul bơ̆ jang iung jang dăr lăng hơlen. Ƀok Nguyễn Quang Thái, Kơ iĕng Kơdră chĕp pơgơ̆r Kŏng ty tơbăt, ‘ngoăih dăr lăng đơ̆ng kang ƀô̆ bơ̆ jang vei lăng kon tơrong, hơnih mơdro sa jei đei iung jang dăr lăng hơlen kơjăp găh tơdrong ƀuh kăt rơgoh ‘lơ̆ng:“Tơdăh ƀôh nhŭng đei tơdrong jĭ ‘noh kŏng ty gô tơroi tơbăt ăn hơnih bơ̆ jang pơgang vei lăng kon tơrong vă hơmet pơ ‘lơ̆ng kiơ̆ tơdrong tơchơ̆t.”

Kiơ̆ đơ̆ng yă Nguyễn Thị Ngân Hà, Hơnih khăm lăng hơlen păng ming hơmet kon tơrong jĭ găh Hơnih vei lăng Rong kon tơrong păng Jang pơgang vei lăng kon tơrong dêh char Gia Lai, tơdrong jĭ klak chroh nhŭng châu Phi tŏk bŏk đei ƀôh tơdrong ưh kơ gan sơđơ̆ng. Lăp lơ̆m mĭnh khei ou ki, Gia Lai hlôi đei 5 hơnih rong kon tơrong đei jĭ, akŏp hlôi đei kơ hrĕng tŏ nhŭng jĭ klak chroh. Kơ yuơ lơ loh, trong bơ̆ jang dăr lăng ƀuh kăt, sơđơ̆ng rơgoh ‘nhĕm nhŭng, sa roi iung jang kơhret hloh.“Nhôn dăr lăng răt tơmơ̆t nhŭng đơ̆ng 9 jơ pơ gê, khăm lăng hơlen truh 9 jơ gơmăng, păng nhôn lăng hơlen dơ̆ng đĭ đăng vă sơđơ̆ng mưh truh 1 jơ 30 pơnĭt pơgê đơ̆ng rŏng ƀuh kăt ‘lơ̆ng păng hơdrol vă ba truh tơ̆ hơnih ƀuh kăt ‘noh nhŭng ‘lơ̆ng ưh kơ đei jĭ păng tĕch mơdro ‘nhĕm rơgoh ‘lơ̆ng.” 

Lơ̆m dêh char Gia Lai hrei ou đei 11 hơnih ƀuh kăt nhŭng akŏm păng vă jê̆ 800 hơnih ƀuh kăt kơdih kơdih. Hơnih bơ̆ jang kơ dêh char Gia Lai hlôi păng tŏk bŏk pơrô̆ athei rim tơring atŏk kơtang dăr lăng, lăng hơlen tơ̆ rim hơnih ƀuh kăt, adoi nhen rim hơnih tĕch mơdro kon tơrong, kon kơlap lơ̆m dêh char. Tơlĕch jang pơrô̆ pơrôp kơtang rim trong tang găn hơlou pơrang jĭ truh tơ̆ kon pơlei, mă kăl hăm dôm ŭnh hnam rong kon tơrong. Tơdrong tơm ‘noh pơm hơtŏk jơhngơ̆m đon hlôh vao lơ̆m kon pơlei pơla găh tơdrong hli hlơt hơmơt tơt đơ̆ng pơrang jĭ, mă kăl rim tơdrong chă chơ pơdŭ, tĕch răt nhŭng păng ‘nhĕm nhŭng răt klĕnh đơ̆ng teh đak đe, ‘nou jing tơdrong hơmơt kơtang pơm ăn tơpoh lang să pơrang jĭ.

Ƀok Huỳnh Ngọc Diệp, Kơdră chĕp pơgơ̆r Hơnih bơ̆ jang vei lăng Rong kon tơrong păng Jang pơgang vei lăng kon tơrong dêh char Gia Lai tơbăt.“Lơ̆m jơ ‘năr đei pơrang jĭ nhen hrei ou, nhôn hlôi pơrô̆ athei Hơnih jang vei lăng rong kon tơrong jang pơgang vei lăng kon tơrong rim tơring iung jang hơdoi hăm khul kơdră chĕp pơgơ̆r rim tơring vă atŏk kơtang bơ̆ jang dăr lăng hơlen tơdrong jang ƀuh kăt iĕ tơ̆ tơring tim mă pơjing hơnih ƀuh kăt să akŏm mĭnh ƀôt. Lơ̆m jơ ‘năr răt tơmơ̆t nhŭng đei ƀôh nhŭng jĭ ‘noh nhôn athei ăn kron hơdrô̆ hloi. Đơ̆ng rŏng ‘noh gô mơ̆ng kiơ̆ dăr lăng hơlen tơdrong jĭ, mă kăl hăm jĭ klak chroh nhŭng châu Phi nhôn iung jang hơmet pơ ‘lơ̆ng kiơ̆ tơdrong tơchơ̆t nhen pơlôch hŭt ou to kiơ̆ tơdrong tơchơ̆t.”

‘Ngoăih dăr lăng hơnih ƀuh kăt, atŏk kơtang khăm lăng hơlen pơrang jĭ vă tang găn pơrang jĭ klak chroh tơpoh lang să, đơ̆ng khei 7, dêh char Gia Lai hlôi pơjing 4 hơnih gak dăr lăng hơlen pơrang jĭ kon tơrong tơ̆ rim tơring kăl, tơgop vei lăng kơjăp iăp kơtang lơ̆m bơ̆ jang dăr lăng hơlen...