Lơ hơnih ming man, tơring kơdrơ̆m đei tơ iung pơjing ming man lơ sơnăm mă lei ưh kơ đei bơngai mơ̆t oei. Hơnih bơ̆ jang rơkăh, dôm hơnih ming man teh đak tơmơ̆t jên jang prăh prang ... Tơdrong mă ou ưh khan lăp pơm hiong răm kon jên bơ̆ jang teh đak mă oei pơm tơjur jơhngơ̆m đon lui yom đơ̆ng kon pơlei hăm trong chĕp pơgơ̆r đơ̆ng Đảng, tơdrong vei lăng đơ̆ng Teh đak.

Mĭnh lơ̆m dôm tơdrong tơm pơm ăn bơ̆ jang pơkom, tang găn pơhoach brăh brư tim mă kơjăp ‘noh kơ yuơ tơdrong tơchơ̆t tim mă trŏ lăp.Khôi luơ̆t jang kiơ̆ pơkom, tang găn pơhoach brăh brư oei tim mă trŏ lăp hăm tơdrong hơrih sa yan ou kơ yuơ rim tơdrong tơchơ̆t oei kiơ̆ pơkăp ăn, tim mă đei tơdrong tơchơ̆t chiu pŭ kơna pơm ăn truh jang kiơ̆ tim mă ‘lơ̆ng, găh lơ oei gômơ̆ng kiơ̆ jơhngơ̆m đon tơchĕng đơ̆ng bơngai chĕp kơ̆l hơnih jang păng mơ̆ng kiơ̆ rim bơngai kang ƀô̆, rim bơngai, ŭnh hnam. Ƀok Hoàng Văn Cường, Kơdră jang lơ̆m Hơnih bơ̆ jang Mŭk drăm păng Jên hu kơ Kuô̆k hô̆i tơgop nơ̆r:“Tơpă yan ou mưh bơ̆n tơlĕch jang kiơ̆ Khôi luơ̆t jang kiơ̆ pơkom, tang găn pơhoach brăh brư jĭ lăp vă pơm pơ trŏ đĕch ‘noh lơ, vă kơ ƀlep hăm tơdrong tơchơ̆t đĕch. Tơ̆ tơring, tơ̆ hơnih bơ̆ jang lơ̆m rim tơring đei dôm tơdrong yă kiơ brăh brư, dôm tơdrong yă kiơ tim mă ‘lơ̆ng ‘noh iung jang sơnăm đơ̆ng rŏng hlôi akŏm lơ̆m tơdrong ‘noh hloi ‘noh tim mă đei”.

Tơ̆ hơnăp tơdrong ‘nou, Hơnih bơ̆ jang Kuô̆k hô̆i hlôi drơ̆ng mĭnh nơ̆r pơtruh ăn Kuô̆k hô̆i lăng hơlen, hơmet ming đĭ đăng Khôi luơ̆t jang kiơ̆ pơkom, tang găn brăh brư tơ̆ ‘Măng hop akŏm mă 10 truh ou kơnh. Tơdrong tơm ‘noh pơjing đei trong jang chinh trĭ trŏ lăp tôm toong, kơjăp ‘lơ̆ng ăn iung jang kiơ̆ pơkom tơ̆ rim hơnih bơ̆ jang, tơdrong jang, rim kang ƀô̆, đang viên păng kon pơlei, pơjing đei tơdrong tơplih kăl hloh găh tơdrong ‘lơ̆ng lơ̆m jang kiơ̆ pơkom, tang găn pơghoach brăh brư. Kiơ̆ đơ̆ng Bơngai tang măt Bùi Hoài Sơn, Khul kơdră tang măt Kuô̆k hô̆i pơlei tơm Hà Nội, vă rim tơdrong tơchơ̆t Khôi luơ̆t ưh khan lăp lơ̆m hla bơar mă oei kăl đei trong jang dăr lăng hơlen kơjăp:“Kăl đei tơdrong pơkăp chiu pŭ, adoi nhen rim trong jang dăr lăng, lăng hơlen hơdăh. Đơ̆ng noh, tơmơ̆t hloi lơ̆m bơ̆ jang pôk hơpăh hăm tơdrong xek tơlang pơm glăi mă trŏ lăp, mă ƀlep bơngai, ƀlep hơnăp jang. Đĭ đăng tơdrong ‘noh kăl đei jang kiơ̆ ‘lơ̆ng vă pơjing đei tơdrong vang tơgŭm djru ăn tơdrong joăt hăm pơkom, đei jing tơdrong joăt pơkom, lơ̆m ou đei hloi trong pơchoh ăn hơrih sa ‘lơ̆ng, hơnăp jang ‘lơ̆ng tơpă”.

Trong vă pơjing Khôi luơ̆t Pơkom, tang găn pơhoach brăh brư hơmet ming truh ou kơnh hơmŏ lăng gô pơjing đei mĭnh tơdrong tơchơ̆t khôi luơ̆t hơdăh hloh, jơnei hloh, pơm hơtŏk jơhngơ̆m đon jang kiơ̆ ‘lơ̆ng păng hơnăp vang iung jang kơ tang đơ̆ng pơđĭ lơ̆m tơpôl găh bơ̆ jang pơkom, tang găn pơhoach brăh brư, ba teh đak yak mơ̆t lơ̆m chăl atŏk tơ iung kơjăp ‘lơ̆ng.