Hnam hŏk hôp pơlei plei Tơng Ju, phường Ea Kao rơ ông re chĭng chêng, păng tơdra hơsoang kră sơ̆, hơmet ăn vă sơng khŭl tơmoi lơ̆m pơyan tơmang lăng mă blŭng đơ̆ng rŏng tơmơ̆t hơdai. Tŏk bŏk re jơva djơ djrĭng, yă H’Yam Bkrong - Kơdră vei lăng Hơp tak xăh tanh brai vai khăn Tơng Bông, kơdră grŭp tơmang lăng tơpôl plei Tơng Ju - chhôk hơiă yua kơ pơđĭ 10 pơlei tă kơ đei hơdai trĕng lăng găh hơtŏk tơdrong jang joăt joe ngăl. Tơdrong tơgoăt tơmam pran đơ̆ng dôm pơlei vă hơtŏk tơiung tơmang lăng tơpôl kŭm hlôi đei tơmơ̆t lơ̆m tơdrong tơchơ̆t Hop akŏm Đảng bộ phường.

“Nhôn đei trong ‘noh jĭ vă anih jang tơdrong jang đơ̆ng bơ̆n đei chĕp vei ‘noh pơih lăm pơtho tơdrong jang, mă 2 dơ̆ng ‘noh jĭ hơtŏk tơiung tơmang lăng tơpôl ‘noh kon pơlei vang hơdai băl jang, vă kơ đe truh năm lăng tơdrong joăt joe đơ̆ng bơ̆n nhen tanh brai vai khăn, pơđih tơdrô ge, chraih mul meo kră sơ̆, vang jang vă kơbăt tơdrong jang choh jang sa đang kơ ‘noh tôn chĭng chêng, tơmam sa. Ƀơ̆t mă tơmơ̆t hơdai nhôn ƀôh kơsô̆ pơlei kon kông tŏk dơ̆ng 2 păh tơklep hơdai hăm băl gô pran hloh.

Kiơ̆ kơ hla ar roi tơbăt chĭnh trĭ Hop akŏm Đảng bộ dêh char Đắk Lắk ‘măng mă XVIII, jăl jang, 2025-2030, dêh char gô hơtŏk tơiung pran dôm tơmam tơmang lăng tơm, đei yua nhen tơmang lăng cham char đak dơsĭ - bri tơ̆ dôm pơgar bri ‘long teh đak, dôm hơnih vei lăng cham char bri brăh, hơtŏk tơiung tơmam tơmang lăng tơpôl, choh jang sa păng tơring tơrang; chă lăng, jang tơdrong jang joăt joe. Ƀok Nay Khang, bơngai Ê Đê, plei Độc Lập B, xăh Suối Trai, dêh har Đắk Lắk lui akhan plei sư gô đei iŏk yua hăm trong vă jang hơtŏk tơiung đơ̆ng dêh char ‘nao, ƀơ̆t oei lơ̆m hơdral cham char bri brăh - choh jang sa đơ̆ng dôm tơring sầu riêng să sap tơ̆ păih Pơmơ̆t Đắk Lắk, tơklep hơdai Hơnih vei lăng cham char bri brăh Ea Sô, dơnâu đak Krong Ba Hạ, hơnih vei lăng Krong Trai păng jur tơ̆ đak dơsĭ Phú Yên:

“Tơmơ̆t hơdai ‘noh jĭ trŏ lăp pơih să hơnih vă pơgơ̆r hơtŏk tơiung mŭk drăm, đei bri, đei kông, đei đak krong, đei đak dơsĭ vă hơtŏk tơiung tơdrong hơrih sa kon pơlei kon kông vă ƀrư̆ ƀrư̆ yak tŏk. Bơ̆n jing chăl ‘nao bơih, chăl jang tŏk kơ drĕch hơdrŭng.”

Kŭm nhen ƀok Nay Khang, ƀok Sô Văn Sứt, bơngai Chăm H’roi, bơngai đe lui yom pơlei Ma Y, xăh Sơn Hòa akhan, tơdrong tơmơ̆t hơdai hlôi pơm ăn dôm pơlei pơla đơ̆ng bri truh đak dơsĭ jing tơ jê̆ hloh. Păng kiơ̆ đơ̆ng tơdrong tơjê̆ ‘noh, pơlei pơla gô đei lơ tơdrong hiôk hơtŏk tơiung:

“Sơ̆ kŭm tơmơ̆t hơdai Khánh Hòa, Phú Yên, mă lei chăl doh sơ̆ trong nơnăm, tơdrong kơtơ̆ng ang pơma dơnuh tam mă hơtŏk tơiung, truh dang ei kơmăy kơsô̆ đĭ lơ̆m tơpôl ‘noh ĭnh tơchĕng jơnei ‘lơ̆ng hơiă. Sa roi rĭ tơjê̆ băl păng thim tơdrong jang sa hơtŏk tơiung ‘noh sa roi kơjăp hloh, hơgei hloh vă hơtŏk tơiung teh đak yak tŏk ‘lơ̆ng ‘nao pơting hăm chăl hle.”

Tơdrong chơt hơiă vih hơdai mĭnh pôm hnam tih Đắk Lắk ưh khan lăp jing tơdrong chơt hơiă tơ̆ hơnăp 1 trong jang đei tơdrong kach mang, pơih ăn tơdrong hiôk hơtŏk tơiung ‘nao. Kiơ̆ kơ yă Cao Thị Hòa An – Phŏ Bí thư Anih jang Đảng dêh char, Kơdră Jơnŭm pơgơ̆r kon pơlei dêh char Đắk Lắk, ‘nâu oei jing jơnei đơ̆ng tơdrong pơgơ̆p jơhnơr hơrih đơ̆ng dôm sơnăm iung tơblăh. Yă An tơroi tơdrong hrĭ jơhngơ̆m ƀơ̆t vang truh Hop akŏm Đảng bộ xăh kăn kư̆ kach mang Yang Mao:

“Vang truh Hop akŏm đang, ĭnh jur ƀôh đei 1 ‘nu drŏ kăn rŏ lăng hloh 80 sơnăm păng đei grăt 60 sơnăm Đảng, sư truh hăm ĭnh, sư pơma ‘noh: Kon ăi, mĕ kơtơ̆ng kon ‘noh jĭ bơngai Phú Yên, mĕ hiôk chơt dêh păng tôch kơ hơiă đei tơbơ̆p kon. Kơtơ̆ng mĕ pơma, plei nuih ĭnh sư tơnŏ hiôk, đak măt ĭnh prơ̆ lĕch. Mĕ pơma dơ̆ng ‘noh lơ̆m tơblăh vang, Đắk Lắk - Phú Yên tôch kơ mat băl, mĕ đei lơ buăl ‘noh bơngai Phú Yên kơna mĕ ‘mêm kơ bơngai Phú Yên dêh. ‘Noh jĭ tơdrong pran đơ̆ng tơdrong pôm nơ̆r ƀơ̆r đon, đơ̆ng tơmơ̆t hơdai păng đơ̆ng đon lui gĭt kăl găh tơdrong joăt joe đơ̆ng dôm yơ jơhnơr”.

Tơdrong tơmơ̆t hơdai anih bơ̆jang tơ̆ Đắk Lắk tŏk bŏk tơƀôh hơdăh đei yua ưh khan lăp tơ̆ hla ar đĕch, mă lơ̆m rim tơdrong hơrih kơ kon pơlei. Đơ̆ng dôm pơlei pơla hơtăih băl dôm jĭt kilômet, dang ei oei hơdai 1 pôm hnam, kon pơlei ưh khan lăp jê̆ khŭl kơdră chĕp kơ̆l hloh, mă oei jê̆ băl hlôi vang tơroi, tơgŭm băl tơdrong hiôk, vang pơih trong jang sa ‘nao. “Hnam tih” Đắk Lắk yua thoi noh jing hơnih gơning kơjăp ăn rim tơpôl tơring ‘nâu.