Pơma tơ̆ hop akŏm, Thủ tướng Phạm Minh Chính pơma tơƀôh dôm tơdrong jang đei ‘lơ̆ng hơiă khei ‘năr âu ki, mă loi ‘nŏh hơnơ̆ng hơmet ming anih jang chinh trĭ, hơmet ming anih vei lăng păng khul jang kiơ̆ trong pơjing Khul kơdră pơgơ̆r tơring 2 tăl; hơmet ăn Hop akŏm ‘măng mă 14 kơ Đảng; bơ̆ jang dôm tơdrong tơchơ̆t gĭt kăl nai đơ̆ng Anih tơm Chinh trĭ; bơ̆ jang kiơ̆ trong tơgŭm vei lăng sơđơ̆ng ‘lơ̆ng tơdrong arih xa tơpôl nhen tơjur, ưh đei iŏk jên hŏk, sut pơđĭ hnam hiăh hiok...

Thủ tướng teh đak pơma hơdăh, gơ̆h jang đei dôm tơdrong ‘nâu ‘nŏh gơnơm đơ̆ng tơdrong vang jang hơdoi ‘lơ̆ng đơ̆ng Quốc hội păng Khul kơdră teh đak. Anih chĕp kơ̆l Đảng kơ Quốc hội, Khul kơdră teh đak mât 1 ƀơ̆r đon, vang jang hơdoi hrơ̆ch ‘lơ̆ng. Yoa thoi noh, hăm tơdrong jang tôch lơ mă lei hlôi bơ̆ jang tôch ‘lơ̆ng.