Tơ̆ hop akŏm, tang măt ăn dôm anih jang mŭk drăm Việt Nam păng Trung Quốc hlôi pơma đam gah trong jang hơtŏk păng vei sơđơ̆ng, kơjăp tơdrong tĕch tơmam drăm ăn teh đak đe lơ̆m khei năr truh. Lơ̆m noh, rim anih jang mŭk drăm Việt Nam hơpơi 'meh đei iŏk tơgŭm tơtom dôm tơchơ̆t gah kih thuơ̆t, tơchơ̆t 'nao gah rơgoh 'lơ̆ng tơmam drăm xa đơ̆ng Trung Quốc. Atŭm hăm noh đei kênh tơroi tơbăt hơnơ̆ng vă tơtom hơmet pơm jang.

Gah Trung Quốc, lơ anih jang mŭk drăm akhan, Gia Lai athei tơrĕk hloh dơ̆ng gah sơđơ̆ng tơmam drăm tĕch, tơdrong 'lơ̆ng păng tơdrong pơm tơlĕch 'lơ̆ng sơđơ̆ng vă hơtŏk kơjă kăp gĭt. Yă Lư Lệ Phương, Kơdră jang tĕch răt kơ Anih Asong jang Ving Ƀăk Ƀô̆ (dêh char Quảng Tây, Trung Quốc), ăn tơbăt: "Hăm anih jang mŭk drăm Trung Quốc, noh tơrĕk truh tơring pơtăm păng pơm tơlĕch tơmam drăm đơ̆ng gah Việt Nam. Đei lơ tơmam drăm phara băl. 'Năr ou, truh tơ̆ ou, inh hơpơi 'meh chă hơlen lăng tơring pơm jang kơ Việt Nam tơlĕch jang thoi yơ, vei lăng pơkăp pơm jang tĕch răt tơmam ăn teh đak đe. Mưh 'meh hơtŏk tơmam drăm tĕch ăn Trung Quốc 'noh athei hơlen, pơm tơlĕch 'nŭng tơmam drăm mă hơdah 'lơ̆ng”

Tơ̆ hop akŏm, rim pah drơ̆ng nơ̆r gah pơjing kênh tơroh kơtă, vă tơjur ƀiơ̆ tơdrong pơm kơdranh đơ̆ng anih jang ou to, atŭm hăm noh hơtŏk jang hơdoi gah logistics. Yă Nguyễn Thị Diễm Hằng, Kơdră tơm kơ Anih jang Vinanutrifood Bình Định ăn tơbăt, dang ei hlôi đei lơ anih jang mŭk drăm Việt Nam pơm jang tĕch lơ tơmam drăm ăn Trung Quốc păng băt hơdah dôm tơchơ̆t đei tơrĕk. 'Nou jĭ tơdrong hiôk tih tên vă hơtŏk tơring pơtăm tơmam drăm trŏ tơchơ̆t tơ̆ Gia Lai: “Nhôn hlôi băt hơdah tơdrong kăp gĭt hloh noh tơdrong hơdah đơ̆ng vei lăng tơring pơtăm truh tơ̆ hnam kơmăi pơm tơlĕch tơmam drăm. Kăp gĭt hloh kơ bơ̆n noh tĕch dôm tơmam mă Trung Quốc đe kăl. Nhôn iŏk yua AI, tơmơ̆t chih akŏm dư lĭu kơ dôm tơdrong tơm đơ̆ng Trung Quốc, dôm tơdrong pơkăp gah pơyan jang hrôih, khei năr iŏk yua tơguăt hăm tơring pơm jang tơ̆ Việt Nam vă hơ-'nhăk dôm tơmam drăm trŏ pơyan păng tôm tơmam kăl tĕch răt lơ̆m tơring”

Lơ̆m hop akŏm, hlôi đei 7 hla bar pơkăp jang hơdoi đei kĭ pơm jang đơ̆ng anih jang mŭk drăm Gia Lai păng anih jang mŭk drăm Trung Quốc. Ƀok Nguyễn Tuấn Thanh, Phŏ Kơdră Anih jang vei lăng kon pơlei dêh char Gia Lai sơkơ̆t hơdah, dêh char tŏk bŏk oei akŏm keh đang dôm tơdrong pơkăp vă pơm trong hiôk hloh ăn anih jang mŭk drăm, lơ̆m noh đei dôm anih asong jang teh đak đe păng anih jang mŭk drăm Trung Quốc: "Dêh char Gia Lai tơrĕk akŏm keh đang ming man trong nơnăm lơ̆m jơ̆p dêh char, dôm anih jang kŏng ngĭp, tơdrong hơmet 'lơ̆ng hla bar hanh chinh gah asong hơmet ming, thuê̆, haih kuan. Hăm Gia Lai, rim anih jang mŭk drăm, anih asong jang gô đei asong trong jang hiôk vă pơm jang đei jơnei păng hơtŏk kơjăp sơđơ̆ng"

Dang ei, Gia Lai đei jê̆ 1 triu ha teh choh jang hăm dôm tơring juăt jang tih să. Lơ̆m noh, kaphê jing 'long pơtăm tơm, hăm hloh 107.000ha, đei yua rim sơnăm hloh 333.000 tơ̆n. Rim hơdrĕch 'long pơtăm nhen sâu riêng, tiu, găr sơlơ̆k, kơsu, prit, chăn hroi, ƀum ngô, gao tuak, hơmrĕ... adoi đei đơ̆ng minh ƀar rơbou truh dôm jĭt rơbou ha, pơtrŏ hăm dôm tơchơ̆t tĕch ăn teh đak đe.