Lơ̆m jơ năr chơt hơiă Kach mang khei 8 păng Quốc khánh 2/9, pơgê (20/08), tơ̆ Hơnih Hop akŏm tơm kơ Teh đak, Lêh tơbăt 80 sơnăm năr pơjing Khŭl kơdră teh đak (28/8/1945 - 28/8/2025) đei pơgơ̆r tih. Tơƀlŏk dơ̆ng jơhnơr hơrih gĭt kăl, Thủ tướng teh đak Phạm Minh Chính tơroi rơđăh: ‘Năr 28/8/1945, Khŭl kơdră teh đak chĕp kơ̆l pơgia teh đak Việt Nam Dân chủ Cộng hoà hlôi tơlĕch Nơ̆r roi tơbăt tơ̆ hơnăp kon pơlei lơ̆m teh đak kŭm nhen đĭ đăng lơ̆m apŭng plĕnh teh găh tơdrong pơjing Khŭl kơdră teh đak ‘nao păng roi tơbăt hơdăh hơnăn 15 ‘nu bơngai jang yua đơ̆ng Kơdră Hồ Chí Minh pơm Kơdră chĕp kơ̆l, tơƀôh ăn tơdrong pơjing đei đơ̆ng Khŭl kơdră teh đak Cách mạng mă blŭng lơ̆m prăt jơhnơr hơrih rơbâu sơnăm pơjing teh đak păng vei teh đak đơ̆ng hơdrĕch hơdrŭng.

Lơ̆m prăt 80 sơnăm, yak hloh lơ jăl jang pơmat tat, gleh hrat păng ƀĕnh long nol, mă lei hăm tơdrong chĕp kơ̆l gơh hơgei đơ̆ng Đảng, Khŭl kơdră teh đak kiơ̆ rim jăl jang hlôi tơƀôh rơđăh jơhngơ̆m đon khŏm jang ‘lơ̆ng, hơdrin tih, bơ̆jang kơtang, kŭm hăm kon pơlei, khŭl lĭnh lơ̆m teh đak iŏk đei dôm jơnei tih tên, đei tơdrong ‘lơ̆ng gĭt kăl lơ̆m đĭ đăng rim tơdrong jang. Kăl kơ lăng truh, Khŭl kơdră teh đak akŏm bơ̆jang kiơ̆ kơtang, đei yua trong jang proh hơmet khŭl jang chĭnh trĭ tŏ sĕt bơngai, bơ̆jang đei yua, ‘lơ̆ng păng pơjing tơdrong jang khŭl kơdră chĕp kơ̆l tơring 2 tăl păng Hơtŏk tơiung tôm tơdrong teh đak. Pơma pơgơ̆r tơ̆ jơ pơm lêh, Tổng Bí thư Tô Lâm athei păng ‘meh vă dôm bơngai tang măt hơnơ̆ng vang yak hơdai kŭm Khŭl kơdră teh đak yak kơjăp hơnhăk teh đak yak mơ̆t lơ̆m chăl ‘nao - Chăl jang tŏk pơdrŏng pran, hơgei, hơnŭk hơnoa kơ hơdrĕch hơdrŭng.