Chih iŏk lơ̆m jăl jang âu ki, Tơdrong jang 8 găh tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông păng groi kông đei lăng ‘noh jĭ 1 hơyak năm ‘lơ̆ng ƀơ̆t đei jên jang păng tơdrong jang hơdrô̆ ‘măn ăn pơtrŭt hơtŏ băl drŏ nglo hăm drŏ kăn. Mă lei, kiơ̆ kơ Tiến sĩ Phạm Thái Hưng - bơngai joăt jang roi tơƀôh tơdrong jang tơgŭm, tơdrong hơdrin âu oei tam mă tôm. Ƀok tơblang hơdăh, Tơdrong jang 8 dang ei lăp đei dang 1,4% akŏm jên jang kơ pơđĭ dêh char, ‘noh đei dôm tơdrong jang tih păng tơdrong jang iĕ nai. Kơsô̆ jên klăih song thoi noh ‘noh tŏ sĕt dêh vă pŭ iŏk hơnăp jang tih. Tiến sĩ Hưng pơma hơdăh: “tam mă lăng truh dăh mă ưh kơ hơdăh găh tơgep hơtŏ băl drŏ nglo hăm drŏ kăn.”

Tơdrong ‘nâu tơlĕch ăn 1 long nol tih, yua kơ tơdăh lăp răp gô lơ̆m 1 tơdrong jang hơdrô̆ iĕ hăm jên jang ưh kơ lơ, ‘noh tơdrong jang pơtrŭt hơtŏ băl đơ̆ng drŏ nglo hăm drŏ kăn tơ̆ tơring kon pơlei kon kông păng tơring groi kông hơnat kĕ jang đei jơnei nhen hơmĕng. Tơ̆ tơpă yan âu ‘noh, Tiến sĩ Phạm Thái Hưng akhan kăl kơ đei tơdrong tơplih găh gơh jang lơ̆m jăl jang truh. Ƀok pơma hơdăh, tơdăh bơ̆n ưh kơ tơplih trong jang, ‘noh hơnat gơh iŏk đei tơdrong hơgăt hlôi tơlĕch ăn lơ̆m tơdrong jang hơtŏ băl drŏ nglo hăm drŏ kăn. Ƀok athei ‘noh: Tơgep pơm hơtŏ băl drŏ nglo hăm drŏ kăn lơ̆m đĭ đăng dôm tơdrong jang tih, dôm tơdrong jang iĕ păng dôm tơdrong đơ̆ng tơdrong jang. Kiơ̆ kơ ƀok, ‘nâu ưh khan lăp jing hơnăp jang đơ̆ng hơdrô̆ Trung ương Khŭl vei lăng Drŏ kăn Việt Nam dăh mă đơ̆ng tơdrong jang 8, mă athei jing hơnăp jang ‘lơ̆ng , athei “mơ̆t jrŭ lơ̆m rim hlak jên jang, rim tơdrong jang” đơ̆ng pơđĭ tơdrong jang.

Vă tơdrong tơgep pơm hơtŏ băl drŏ nglo hăm drŏ kăn ưh khan lăp dơ̆ng ƀơ̆t tơ̆ trong jang dăh mă nơ̆r pơma, Tiến sĩ Phạm Thái Hưng tơlĕch athei đei pơtho hơdăh đơ̆ng dôm anih tơm, anih jang pơgơ̆r bơ̆jang kiơ̆ tơdrong jang, hăm tơdrong vei lăng hơdai đơ̆ng Anih jang Vei lăng Tơdrong jang. Ƀok pơma hơdăh akhan, kăl kơ tơplih ‘nao trong jang tơlĕch jang 1 trong tơpă ‘lơ̆ng păng ƀlep hăm yan âu.

“Hơlen lăng dơ̆ng tơring păng bơngai tơgŭm hơdrol. Hăm dôm tơdrong jang nhen hơtŏk ‘lơ̆ng kĕ jang păng roi tơbăt, kăl kơ tơplih trong đơ̆ng trong băt hơdăh kiơ̆ tơring mơmat tat dêh hloh jing băt hơdăh kiơ̆ bơngai hơdăh kăl kơ tơgŭm; Hơtŏk ‘lơ̆ng  đei yua roi tơbăt. Kăl kơ hơtŏk loi dơ̆ng păng pơtrŭt jang kơmăy kơsô̆, mă lei gĭt kăl hloh ‘noh jĭ athei vei sơđơ̆ng jên, tơmam jang tơpă ăn dôm khŭl roi tơbăt kiơ̆ lơ̆m tơpôl”.

Tơpă yan âu hrei ‘nâu, tơ̆ lơ tơring, bơ̆n đei pơjing đei dôm khŭl roi tơbăt, hơmet ăn aloa pơre nơ̆r... mă lei iŏk yua đơ̆ng tơdrong roi tơbăt oei tam mă ‘lơ̆ng. Tơdrong tơm pơm ăn găh lơ ‘noh jĭ yua đơ̆ng ưh kơ măh jên jang vă pơvei păng pơgơ̆r. Tiến sĩ  Phạm Thái Hưng kŭm lăp tơƀôh hơdăh akhan Anih tơm vei lăng Jên hu tam mă tơmơ̆t jên tơgŭm âu lơ̆m Tơdrong tơchơ̆t 55, pơm ăn rim tơring ưh kơ đei jên vă tơlĕch jang, mă loi ‘noh jĭ tơ̆ tơring hơtăih hơtŏ. Ưh kơ dơ̆ng tơ̆ noh, ƀok oei tơƀôh dơ̆ng dôm tơdrong ưh kơ ‘lơ̆ng lơ̆m tơdrong jang pơhrăm:

“Tơdrong jang pơhrăm găh hơtŏ băl đơ̆ng drŏ nglo hăm drŏ kăn dang ei tŏk bŏk huŏng lơ̆m tơdrong rơkăh hai, ưh kơ măh hai, rơkăh dôm tơdrong hơlơ̆k hơle, trong jang, ưh kơ măh dôm tơdrong hlôh vao yan âu, dôm trong pơcheh hơgei. Kăl kơ tơplih jing hơtŏk ‘lơ̆ng kĕ jang kiơ̆ tơdrong tơplih yua kơ dôm tơdrong pơhrăm hơdrô̆, tŏ sĕt, vă tơpă hơmet ăn khŭl kang ƀô̆ rim tơring gơh tơgep roi tơƀôh đei yua lơ̆m tơdrong jang rim năr”.

Găh tơdrong tơm rim tơdrong kăl kơ tơgŭm hơdrol tơ̆ hơnăp kơnh, hơdai hăm tơdrong hơnơ̆ng tơlĕch jang đei yua dôm tơdrong jang găh vei lăng jơhngơ̆m pran rơneh, Tiến sĩ Phạm Thái Hưng athei pơih să dơ̆ng dôm tơdrong nhen gơh yua đak rơgoh păng pơm rơgoh, mă loi ‘noh ‘măn ăn drŏ kăn păng hơioh. Kiơ̆ kơ ƀok, ‘nâu jĭ ‘meh vă kăl hloh, ƀơm kơtă truh jơhngơ̆m pran păng tơdrong ‘lơ̆ng hơrih đơ̆ng grŭp bơngai pơmat âu, mă loi tơpă yan âu hrei ‘nâu oei jing 1 long nol tih tơ̆ lơ tơring groi kông, tơring hơtăih hơtŏ.

Vă dôm tơdrong tơlĕch ăn gơh yak mơ̆t lơ̆m yan âu, Tiến sĩ  Phạm Thái Hưng krao hơvơn Trung ương Khŭl vei lăng Drŏ kăn Việt Nam kăl kơ chăng jang hơdai kơjăp hăm Anih vei lăng Tơdrong jang tơm teh đak păng dôm anih tơm, anih jang ƀơm truh, vei sơđơ̆ng tơdrong tơm hơtŏ băl drŏ nglo hăm drŏ kăn đei tơgep 1 trong ‘lơ̆ng păng tơpă lơ̆m dôm tơdrong jang ‘nao. Tơdăh ưh kơ tơgep đei, ‘noh kăl hloh pơvei 1 grŭp bơ̆jang hơdrô̆, dăh mă gơh tơlĕch ăn lơ̆m tơdrong jang hơtŏk tơiung bơngai jang nhen 1 trong jang trŏ lăp păng ‘lơ̆ng.