Tơbăt 78 sơnăm Năr linh jĭ rơka, linh lôch tang ăn teh đak pơgê 24/7, tơ̆ Hà Nội, Anih tơm jang Nội vụ jang hơdoi hăm Anih tơm vei lăng khul linh teh đak, Anih tơm vei lăng Công an, Anih vei lăng kon pơlei plt Hà Nội păng dôm anih jang đei ƀơm truh pơgơ̆r Tơƀâp 250 ‘nu bơngai đei kŏng, bơngai arih lơ̆m chăl tơblăh sơ̆ arih xa gơ̆h hơgei lơ̆m teh đak. Dôm bơngai tang măt jĭ đe kăn ƀô̆ kră jang kăch mang, kăn ƀô̆ adrol kơ iung tơblăh, bơngai lăng ƀôh rim tơdrong chăl dŏh sơ̆ vang pơma nuh, pơđou dơ̆ng tơdrong kơtang nuih mơng đơ̆ng hơdrĕch hơdrung, roi tơƀôh dôm tơdrong tơplih ‘nao lơ̆m chăl jang tŏk hrei ‘nâu.

Pơma tơ̆ jơ tơƀâp, Tổng Bí thư Tô Lâm tơƀôh đon bơnê tôch ai hăm vă jê̆ 1,2 triu ‘nu linh lôch tang teh đak – dôm bơngai kon gơ̆h hơgei hlôi hŭt hơkâu, chu lôch tang ăn teh đak. Tổng Bí thư pơma hơdăh, Đảng, Teh đak ling lang tơrek truh tơdrong jang tơgŭm ăn bơngai đei kŏng păng athei dôm anih tơm, anih jang kơpal, tơring tơrang hơnơ̆ng hơlen năng, chih pơkĕh, bơ̆ jang mă ‘lơ̆ng tơdrong tơgŭm ăn bơngai đei kŏng, tơgop tưk tơiung jơhngâm đon "Nhă đak ƀlŏk kơtu" lơ̆m tơpôl.