Yă Rơ Chăm H’Phít, Bí thư Đảng xăh Ia Khươl, roi tơbăt, kon pơlei lơ̆m tơring hơmĕng Gia Lai gô hơtŏk tơiung pran kơtang. Dang ei dêh char đĭ đei đak dơsĭ kơna tơmam ‘lơ̆ng kơ groi kông să tih gô đei hơtŏk ‘lơ̆ng:

“Đơ̆ng rŏng kơ tơmơ̆t hơdai, tơdrong hơdai đơ̆ng groi kông păng teh choh jang sa tôch kơ să gô hơdai hăm đak dơsĭ ‘noh dêh char Gia Lai gô đei tơdrong jang kơjăp găh logistic lơ̆m choh jang sa, tĕch tơmam đơ̆ng choh jang sa tơ̆ teh đak đe, mŭk drăm đak dơsĭ... Ĭnh akhan tơdrong jang hơdai âu gô pơih trong ăn 1 Gia Lai tơdrong hơtŏk tơiung ‘nao”.

Ƀok Nguyễn Danh, 1 ‘nu bơngai tơklep hloh 40 sơnăm hăm Gia Lai, lăng ƀôh tơdrong tơmơ̆t hơdai Gia Lai păng Bình định gô tơtĕnh hơmet pơ ‘lơ̆ng dôm tơdrong pơgăn ăn tơdrong hơtŏk tơiung. Dôm tơmam pơyua ăn hơtŏk tơiung ŭnh hơyuh rơgoh, kơmăy kơmŏk pơm tơlĕch tơ̆ groi kông Gia Lai, gô năm tơpăt đơ̆ng tơnŏk đak dơsĭ kơ dêh char kiơ̆ trong gre kơdâu hrĕnh gô đei ming man. Lơ tơmam kŭm hăm gre vih vơ̆t hiôk. Ƀok Nguyễn Danh pơma:

“Ƀơ̆t tơmơ̆t hơdai Gia Lai gô pơtruh tơmam, ŭnh hơyuh pơm tơlĕch păng gơh tĕch tơ̆ teh đak đe kiơ̆ tơnŏk đak dơsĭ, klĕch 2 hơnih cham gre păr dăh mă klĕch ‘măng jang sơlam hăm dôm teh đak Đông Dương pơm đei lơ kơjă kăp gĭt găh pơm tơlĕch, găh tĕch tơ̆ teh đak đe păng hơdai hăm hơtŏk tơiung tơdrong jang logistic kơ dêh char ‘nao ‘moi kiơ̆ dôm trong Bắc – Nam ‘moi kiơ̆ trong gre kơsô̆ 1 păng trong Hơlĕch - Pơmơ̆t klĕch trong gre kơsô̆ 19.”

Kiơ̆ chih jô̆, dêh char Gia Lai ‘nao đei hơgăt teh să hloh 21.000 km², kơsô̆ kon pơlei vă jê̆ 3,6 triệu ‘nu - oei lơ̆m grŭp dêh char đei teh să păng kơsô̆ kon pơlei lơ hloh lơ̆m teh đak. Kơdră Anih vei lăng kon pơlei dêh char, ƀok Phạm Anh Tuấn pơma hơdăh, vă jăh hơtŏk dôm tơmam ‘lơ̆ng, tơmam bri - đak dơsĭ, dêh char gô akŏm lơ̆m 3 tơdrong jang tơm gĭt kăl: tơplih đơ̆ng đon tơchĕng vei lăng jing pơvih pơvăn, đơ̆ng bơ̆jang jing pơcheh hơgei păng iŏk kon pơlei - anih mơdro sa pơm tơm lơ̆m rim tơdrong jang.

“Dêh char Gia Lai ‘nao jĭ tơklep đơ̆ng 2 tơring teh đei tơdrong joăt joe, ƀĕnh tơdrong jang kach mang ang hơdăh, joh ayŏ ‘lơ̆ng hơiă. Mă loi ‘noh jĭ jơhngơ̆m đon tơgoăt tơgoăl păng hơ pơi ‘meh yak tŏk pran kơtang vang hơdai 1 jơhngơ̆m bơ̆jang kơtang hrơ̆ch jơnei yua kơ 1 khei ‘năr tơ̆ hơnăp kơnh hơtŏk tơiung ‘lơ̆ng”.

 Ƀok Hồ Quốc Dũng – Bí thư Anih jang Đảng dêh char Gia Lai - roi tơbăt, dêh char khŏm bơ̆jang kiơ̆ tơdrong hơgăt jang tŏk 8% lơ̆m sơnăm ‘nâu, pơm tơdrong ‘lơ̆ng vă jăl jang 2026–2031 iŏk đei kơsô̆ tŏk 2 kơsô̆:

“Đơ̆ng rŏng kơ tơmơ̆t hơdai dêh char ‘noh tơdrong jang mŭk drăm kơ dêh char Gia Lai ‘nao dang hloh 250 rơbâu ti, đei pơđĭ hloi 1 tơring groi kông tih să, 134km đak dơsĭ, 1 tơring tơmăn ‘lơ̆ng rŏ, 2 tŏ cham gre păr, tơnŏk đak dơsĭ, đei trong gre treng, trong teh... Akŏm tôm dôm tơdrong hiôk ‘lơ̆ng, tơdrong oei đei dơ̆ng ‘noh pơm liơ hơdrin hơtŏk dôm tơmam pran vă hơtŏk tơiung dêh char Gia Lai jing 1 anih jang tŏk kơ tơring".

Đơ̆ng dôm tơdrong kăl nhen tơdrong pơih găh trong nơnăm, nhen cham gre păr, tơnŏk đak dơsĭ, trong gre treng, trong nơnăm..., truh tơdrong đei lơ đơ̆ng teh - mŭk drăm: đak dơsĭ , tơmăn, groi kông, dêh char Gia Lai ‘nao hơmĕng gô pơm hơnăp jang chông ba jang tŏk tơring Tŏk bŏk - Tây Nguyên lơ̆m jăl jang đơ̆ng rŏng dơ̆ng.