'Măng hop akŏm đei pơdah trư̆k tuyê̆n truh 34 dêh char, pơlei oei lơ̆m Trung ương, 3.321 xah phương, anih jang tơm lơ̆m jơ̆p teh đak. Thủ tướng ră hơdah, tơrĕk đơ̆ng tŏ 'mi kial tơplih roi năr roi kơ dêh, tơnap kơ băt hơdrol; hăm 'mi kial kơsô̆ 3 (Wipha) sơnăm ou, mă rim jăl jang, rim tơring hlôi kơchăng tơlĕch jang tang găn păng tơjră, tơroi tơbăt vă kon pơlei kơchăng tang găn păng tơjră hăm 'mi kial, vă da ƀiơ̆ răm. Mă lei, 'mi kial tơhlu truh Nghệ An 'noh 'mi kial tôch kơtang pơrăm tih tên.

Thủ tướng pơgơ̆r, asong tơdrong jang păng pơgơ̆r tang găn păng tơjră 'mi kial pơrăm hăm pơkăp "hơdah bơngai, hơdah tơdrong jang, hơdah sơnong jang, hơdah khei năr jang, hơdah đei jơnei, hơdah tơdrong pơgơ̆r jang", vă đơ̆ng noh hơlen sơkơ̆t trŏ tơdrong đei ƀôh. Thủ tướng adoi pơgơ̆r jơnŭm pơgơ̆r tơring 2 tăl pơm jang tơnăp tơdrong jang tang găn păng tơjră 'mi kial pơrăm păng chơ chă tơgŭm dŏng sar bar.