Lơ̆m dôm năr âu, tơ̆ Hơnih bơ̆jang kơ teh đak Tơring gĭt kăl Phú Quý ling lang đei dôm bơngai jang tơgŭm năm tơgŭm kon pơlei. Kŭm hăm dôm buăl mơlôh nai, Mai Nguyễn Anh Khoa, hŏk tro lăm 11A3, hnam trưng hŏk jăl 3 Ngô Quyền tŏk bŏk pơtho, tơgŭm kon pơlei pơm hla ar, yua tài khoản chih hơnăn lơ̆m điện tử; pơm bơ̆n hla ar lơ̆m kơmăy kơsô̆,... Khoa roi tơbăt, oh jĭ bơngai jang tơgŭm tơ̆ âu 2 giĕng kơ ‘nâu păng đĭ tơgŭm đei hloh 10 hô sơ. Tơdrong jang ưh kơ pơmat mă lei athei mă hơlen lơ, tơdăh ưh athei pơm dơ̆ng đơ̆ng blŭng, hiong jơ.

Lu nhôn tơgŭm đe ƀok, yă tăh dôm tơdrong roi tơbăt lơ̆m kơmăy kơsô̆, vă năm tơ̆ anih mong jên iŏk jên tơgŭm rim khei. Găh lơ tơgŭm dôm tơdrong ƀơm truh hla ar chih măt ŭnh hnam, hơlen lăng hăm trŏ kơ ŭnh hnam dơnuh hin ưh vă sa jên tơgŭm đơ̆ng tơring gĭt kăl.

Băt hơdăh jăl jang blŭng a đơ̆ng tơdrong bơ̆jang khŭl kơdră chĕp kơ̆l tơring 2 tăl gô tơƀơ̆p dôm tơdrong pơmat tat, yua thoi noh, kơdră chĕp kơ̆l tơring gĭt kăl hlôi vei kơjăp ‘lơ̆ng păng pơm tơdrong drơ̆ng lăp lơ lơ̆m bơ̆jang. Ƀok Đỗ Thái Dương, Bí thư Đảng Tơring gĭt kăl Phú Quý roi tơbăt, truh dang ei tơring gĭt kăl hlôi sơđơ̆ng pơgơ̆r păng hơnơ̆ng hơmet tôm khŭl jang, mă loi ‘noh jĭ tơ̆ dôm hơnih oei ưh kơ măh. Tơring gĭt kăl pơjing đei khŭl jang tŏ sĕt bơngai, bơ̆jang đei yua; rim kang ƀô̆, bơngai jang kơ teh đak athei mă tơpă jing bơngai pơvih ăn kon pơlei.

Mĭnh tơdrong tơm đơ̆ng tơring gĭt kăl ‘noh jĭ pơjing 1 khŭl kang ƀô̆ tơpăt, jang hơgei vă pơm tơdrong ‘lơ̆ng ăn dôm sơnăm đơ̆ng rŏng dơ̆ng, hơtŏk tơiung tơring gĭt kăl tơ̆ hơnăp kơnh.

Tơring gĭt kăl Phú Quý băt hơdăh, mŭk drăm đak dơsĭ hơnơ̆ng vei hơnăp jang tơm, tơklep hăm tơmang lăng, tĕch mơdro - pơvih pơvăn. Hơdrin truh sơnăm 2030, iŏk yua jô̆ păh lăp kơ̆l bơngai đei 77 triệu hlak jên, pơting hăm sơnăm 2025 tŏk 1,22 ‘măng; Kơsô̆ ka hơdang rôp yâu iŏk đei 30.000- 35.000 tấn 1 sơnăm... Truh dang ei, lơ̆m tơring gĭt kăl đei 1.740 tong duk ka hăm 7.566 ‘nu bơngai jang, lơ̆m noh đei 634 tong duk ka kŏng suơ̆t đơ̆ng 90CV tơ̆ kơpal. Mĭnh khŭl jang ka bơ̆jang tôch kơ đei yua, tơklep hăm tơgŭm dŏng iŏk, dŏng sar bar păng vei lăng tơdrong pơm tơm đak dơsĭ, achon đak dơsĭ.

 Tơring gĭt kăl dang ei đei 1 hơnih hơmet duk thŏng an, 4 hơnih pơvih pơvăn tơgŭm; Tơnŏk trăp hơla 1.000 tấn, đei kĕ ming 150 tong duk ka; hơnih pơdơ̆ng veh ver kơ kial hơbŭt đei tơmơ̆t jên jang pơm keh đang (jăl jang 2), akŏm jên tơmơ̆t jang hloh 446 ti hlak jên. ‘Nao âu, hơlen lăng 1,2 tơdrong jang tơ̆ achon đak dơsĭ Phú Quý nhen: hơnih pơdơ̆ng duk thŏng nan veh ver kơ kial hơbŭt; hơnih ming man tơdrong jang tơ jră tơsa hơlih jih đak dơsĭ păh tu achon đak dơsĭ... Kơdră Anih vei lăng kon pơlei dêh char Lâm Đồng Hồ Văn Mười roi tơbăt:

Ĭnh akhan tơdrong tơchơ̆t đơ̆ng Anih tơm vei lăng găh Choh jang sa păng hơtŏk tơiung tơring tơrang hơdrol sơ̆ dang ei ‘noh Anih tơm vei lăng găh Choh jang sa păng Cham char tơchơ̆t pơm tơnŏk âu tôch kơ gĭt kăl. ‘Ngoăih kơ tơdrong veh ver kơ ‘mi kial hơbŭt ăn kơ rơbâu tong duk thŏng an ka mưh đei tơdrong truh kial hơbŭt ‘noh ‘nâu oei jing tơnŏk pơvih pơvăn lơ ăn tơdrong hơtŏk tơiung mŭk drăm đak dơsĭ.

Hăm lơ tơdrong đei yua ‘lơ̆ng lơ̆m rôp yâu ka, rong, iŏk răt păng pơm tơlĕch ka hơdang, Thủ tướng teh đak hlôi kĭ ăn Tơdrong jang pơjing achon đak dơsĭ Phú Quý jing Hơnih iŏk jang, pơvih pơvăn tơgŭm tơdrong jang ka, hơdai hăm tơchă dŏng sar bar tơ̆ đak dơsĭ. Tơdrong tơm đơ̆ng tơdrong jang, truh sơnăm 2030, pơjing achon đak dơsĭ Phú Quý jing Hơnih iŏk jang, pơvih pơvăn tơgŭm tơdrong jang ka, hơdai hăm tơchă dŏng sar bar tơ̆ đak dơsĭ kơ tơring păng pơđĭ lơ̆m teh đak.

 Pơma pơgơ̆r Hop akŏm Đảng bộ Tơring gĭt kăl Phú Quý ‘măng mă I, jăl jang 2025 – 2030 âu ki, ƀok Y Thanh Hà Niê Kđăm, Bơngai jang lơ̆m Khŭl chĕp kơ̆l pơgơ̆r Trung ương Đảng, Bí thư Anih jang Đảng dêh char Lâm Đồng pơma hơdăh, pơjing tơring gĭt kăl Phú Quý hơtŏk tơiung pran kơtang, hơdai kơjăp đơ̆ng hơtŏk tơiung mŭk drăm hăm vei sơđơ̆ng teh đak, sơđơ̆ng teh đak hăm mŭk drăm, jĭ hơnih tơgŭm kơjăp ăn achon đak dơsĭ Trường Sa. Tơring gĭt kăl đei dôm tơdrong jang mŭk drăm đak dơsĭ hơtŏk tơiung, mă loi ‘noh jĭ rôp yâu, pơm tơlĕch ka hơdang, tĕch mơdro - pơvih pơvăn tơgŭm tơdrong jang ka tơring Hơlĕch Pơbăh teh đak păng yak truh kơ tơring Đông Nam Á; hơtŏk tơiung pơvih pơvăn duk thŏng nan, tơklep hăm vei lăng cham char păng tơmang lăng kơjăp. Ƀok Y Thanh Hà Niê Kđăm athei:

Hăm dôm tơdrong đei yua, tơmam lơ păng tơdrong ‘lơ̆ng hơiă đơ̆ng kơdih, Phú Quý hlôi sơng đei lơ kon pơlei sơnăm mơlôh đơ̆ng anih kơdrơ̆m tih truh vă hơrih sa, pơjing tơdrong jang sa, kŭm nhen bơ̆jang đơ̆ng hơtăih lơ̆m lơ tơdrong jang. Tơring gĭt kăl kăl kơ bơngơ̆t truh, pơm tơdrong hiôk, vei sơđơ̆ng anih jang kăl păng tơlĕch iŏk yua ‘lơ̆ng bơngai jang âu, druh tom hăm trong jang hơtŏk tơiung ‘nao kơ rim tơring achon đak dơsĭ, pơtrŭt jơhngơ̆m đon tơplih ‘nao, pơcheh hơgei kơ pơđĭ tơring gĭt kăl.

Lơ̆m chăl jang tŏk đơ̆ng hơdrĕch hơdrŭng, Phú Quý tŏk bŏk hơnơ̆ng hơtŏk lơ̆m tơdoă, tơgĕch iŏk đơ̆ng ‘ngoăih vă pơjing tơgăl jing hơnih jang mŭk drăm đak dơsĭ, hơtŏk tơiung hrĕnh, kơjăp, jing anih kơdrơ̆m kơ loăi IV lơ̆m sơnăm 2025.