Mĭnh khei đơ̆ng rŏng kơ bơ̆ jang kiơ̆ trong khul kơdră pơgơ̆r xăh ‘nao đei tơlĕch, jơhngâm đon bơ̆ jang tơ̆ Anih pơm hla ar ăn tơpôl xăh Mang Yang đei ƀôh tôch tơnăp. Kăn ƀô̆, bơngai jang sơng iŏk, pơm hơmet hla ar, tơl tơblang nơ̆r apĭnh păng pơtho tơƀôh ăn kon pơlei pơm hla ar. Ƀok Võ Lê Xuân Thiện – Kơdră vei lăng kon pơlei xăh Mang Yang, ăn tơbăt hô sơ tôch lơ, mă lei kăn ƀô̆ xăh đĭ druh kiơ̆ tom, jang ‘lơ̆ng bơih: “Kơsô̆ hla ar hô sơ tŏk lơ, hlŏh 1.000 blăh hô sơ. Dôm hô sơ đei pơm trŏ năr pơkăp ngăl, kon pơlei tôch hơiă. Blŭng a bơ̆ jang ‘nŏh jang răh, hŏk răh dôm trong jang vă đei trong hơmet pơ ‘lơ̆ng.”

Đơ̆ng rŏng 1 khei bơ̆ jang kiơ̆ trong Khul kơdră pơgơ̆r tơring 2 tăl, dôm anih pơm hla ar ăn tơpôl tơ̆ Gia Lai hlôi bơ̆ jang sơđơ̆ng ‘lơ̆ng. Khul kăn ƀô̆, bơngai jang adrin yak hlŏh pơmat tat, druh kiơ̆ tom tơdrong jang ‘nao hăm tơdrong jang roi lơ pơting hăm adrol ki.

Kiơ̆ tơdrong roi tơbăt tơ̆ Trang pơm hla ar vei lăng kơ teh đak ‘năr 1/8, dêh char Gia Lai dang ei dơ̆ng mă 3/34 dêh char, plt găh tơdrong Pơvih ăn kon pơlei păng anih tĕch mơdro mưh pơm hla ar vei lăng, pơvih pơvăn, hăm 76,86 điêm. Găh noh dơ̆ng, dêh char kŭm dơ̆ng mă 6/34 găh kơsô̆ hla ar hô sơ vei lăng đei iŏk pơm, hăm 128.246 blăh hô sơ, lơ̆m noh kơsô̆ hla ar hô sơ nôp trư̆k tuyê̆n đei 76,9%. Ƀok Lê Dũng Linh – Kơdră Lăm hơmet ming păng vei lăng tơdrong pơm hla ar, Anih pơvih ăn Anih vei lăng kon pơlei dêh char Gia Lai – ăn tơbăt, tơ̆ hơnăp kơnh, dêh char vă hơnơ̆ng hơtŏk tơdrong iŏk yoa kơmăy rơgei vă tơgŭm ăn kăn ƀô̆, hơtŏk tơdrong pơtâp pơhrăm, roi tơbăt... vă hơtŏk ‘lơ̆ng tơdrong đei yoa đơ̆ng khul kơdră pơgơ̆r tơring 2 tăl:

“Nhôn vă hơnơ̆ng pơtâp pơhrăm găh dôm trong pơm hla ar vei lăng gĭt kăl mưh lơ hla ar hô sơ ‘nao đei dơ̆ng, tơklep hăm pơgơ̆r pơma đam đơ̆ng dêh char păng xăh vă sek tơlang dôm tơdrong pơmat tat, tơhlăk tăk. Đơ̆ng rŏng kơ pơtâp pơhrăm, ‘nŏh dêh char vă hơlen năng kiơ̆ 2 kênh. Mă 1 ‘nŏh trư̆k tuyê̆n hăm kơsô̆ đei chih răk lơ̆m kơmăy, mă 2 ‘nŏh pơgơ̆r ăn khul jur dăr lăng. Kiơ̆ đơ̆ng chă hơlen năng ‘nŏh, nhôn vă hơnơ̆ng pơtho pơhrăm tơgŭm ăn dôm tơring oei tơƀâp tơhlăk tăk. Tơdrong ‘nâu gô pơdui đunh truh đĭ sơnăm 2025. Lơ̆m sơnăm 2026 ưh jor gô đei trong rơih hơmet kăn ƀô̆.”

Truh dang ei, Gia Lai hlôi hơmet đang khul kơdră pơgơ̆r đơ̆ng dêh char truh tơ̆ xăh. Atŭm hăm ‘nŏh hơtŏk tơdrong klăih song hơdăh 1.060 tơdrong jang ăn xăh. Anih vei lăng kon pơlei dêh char asong ăn dôm tơring gơ̆h pơjing anih jang bơ̆ jang lơ tơdrong đei: vei lăng tơdrong tơmât jên jang ming man, hrŭ ‘mong jên, chưk pơ ‘ngoăih teh, pơih xă teh pơyoa ăn teh đak, pơtruh đak yoa păng dôm tơdrong pơvih pơvăn kăl nai.

Ƀok Phạm Anh Tuấn- Kơdră vei lăng kon pơlei dêh char Gia Lai ăn tơbăt, kiơ̆ đơ̆ng băt hơdăh dôm tơdrong tơhlăk tăk, truh âu kơnh dêh char vă tơgŭm ăn 1 xăh đơ̆ng 1–3 ti hlak jên vă răt hơmet tơmam, kơmăy kơmŏk; tơlĕch tơdrong tơgŭm hăm kăn ƀô̆ ‘nao đei athei jur jang tơ̆ tơring, hơdai hăm pơtho pơhrăm, hơtŏk đon rơgei; atŭm hăm ‘nŏh set hơlen tơlĕch trong athei khul jang đơ̆ng dêh char jur tơgŭm ăn dôm xăh, phường oei pơmat tat, vă pơm ‘lơ̆ng gơ̆h kơchăng, bơ̆ jang hơbĕch hơbal păng đei yoa mưh bơ̆ jang tơdrong jang kơ teh đak.

Ƀok Phạm Anh Tuấn pơma hơdăh: “Găh khul kơdră pơgơ̆r tơring 2 tăl ‘nŏh blŭng a ‘nŏh athei pơvih mă ‘lơ̆ng ăn kon pơlei păng anih tĕch mơdro ‘mơ̆i, pơm ‘lơ̆ng vă anih pơm hla ar ăn tơpôl gơ̆h bơ̆jang sơđơ̆ng ‘lơ̆ng, đei đon tơnăp, pơvih pơvăn ‘lơ̆ng hơiă. Păng mă 2 ‘nŏh athei jê̆ kon pơlei, băt hơdăh păng sek tơlang tơtom dôm tơdrong ‘mĕh vă tôch tơgăl đơ̆ng kon pơlei păng anih tĕch mơdro. Đĭ đăng tơdrong jang đơ̆ng dêh char păng dôm tơring athei tơplih mă ‘lơ̆ng đơ̆ng vei lăng jing pơjing tơdrong hiôk hian, pơvih pơvăn, tơplih ‘nao, jang rơgei, iŏk kon pơlei păng anih tĕch mơdro pơm tơm, pơjing tơdrong ‘lơ̆ng ăn kon pơlei păng anih tĕch mơdro.”

Mă đơ̆ng oei đei lơ tơdrong tơhlăk kăl đei hơmet pơ ‘lơ̆ng, lơ tơdrong athei bơ̆ jang mă ‘lơ̆ng hlŏh dơ̆ng, mă lei dôm tơdrong jang đei blŭng a đơ̆ng khul kơdră pơgơ̆r tơring tơ̆ Gia Lai ăn ƀôh, dêh char oei năm trŏ trong. Kŭm hăm tơdrong kơchăng đơ̆ng tơring, tơmât hơdai hơnăp jang ăn rim bơngai, rim anih jang, oei đei hloi tơdrong vang yak hơdoi tôch ‘lơ̆ng đơ̆ng Anih vei lăng kon pơlei dêh char. Gơnơm thoi noh, tơdrong bơ̆jang tơ̆ dôm xăh roi tŏk ‘lơ̆ng lơ̆m rim năr, dar dĕh pơm tơplih ‘lơ̆ng ăn lơ̆m tơdrong vei lăng tơring.