Iŏk đơ̆ng blŭng khei 7/2025, Anih vei lăng kon pơlei xăh Ia Băng, dêh char Gia Lai kơchăng pơgơ̆r lơ hop akŏm kon pơlei, roi tơbăt tơdrong vă tơmât jên jang, chă mơ̆ng nơ̆r pơma đơ̆ng kon pơlei. Đơ̆ng rŏng kơ ‘nŏh, pơjing khul hơlen hrŭ ‘mong jên teh, vang jang hơdoi kơjăp hăm Anih vei lăng tơdrong tơmât jên jang kơ dêh char păng anih jang ki thuơ̆t vă hơtâp jrăng tơ̆ teh vă pơm trong lơ̆m khei 8/2025.

Ƀok Nguyễn Trường Sinh, Kơdră vei lăng kon pơlei xăh ăn tơbăt, hăm hơnăp jang ‘nao, xăh vang jang hơdai lơ̆m tơdrong hrŭ ‘mong jên teh, chưk pơ ‘ngoăih teh, tơgŭm ăn tơdrong jang gơ̆h bơ̆ jang hrĕnh ƀiơ̆: “Trong jang đơ̆ng Anih vei lăng kon pơlei dêh char bơ̆ jang thoi noh, kiơ̆ nhôn ‘nŏh tôch lăp. Hăm dôm km trong năm klĕch, nhôn gơ̆h kơchăng pơma nuh hăm kon pơlei, bơ̆ jang kŭm hiôk hian ƀiơ̆. Lơ̆m noh, Anih vei lăng kon pơlei dêh char oei tôch tơtăm, pơtho tơƀôh ăn dôm anih vei lăng tơdrong jang păng anih roi tơƀôh adrin jang hơdoi hăm xăh vă nhôn tơlĕch jang tơdrong hrŭ ‘mong jên teh, chưk pơ ‘ngoăih teh gơ̆h hrĕnh, lăp hlŏh păng pơjing tơdrong drơ̆ng nơ̆r vang tơgŭm lơ hlŏh đơ̆ng kon pơlei.”

Oei tơ̆ xăh Mang Yang, tơring đei 10,3km trong gre kơdâu hrĕnh Quy Nhơn – Pleiku vă năm klĕch, đei hlŏh 400 unh hnam đei teh vă thu iŏk, lơ̆m noh đei dang 22 unh hnam athei athei pôk hnam oei tơ̆ plei hle. Ƀok Võ Lê Xuân Thiện – Kơdră vei lăng kon pơlei xăh Mang Yang tơroi, xăh hlôi pơjing Khul hơlen hrŭ ‘mong jên teh păng anih vei lăng tơdrong jang tơ̆ xăh, vang dăr hơlen, chih jô̆ păng pơjing trong hrŭ ‘mong jên teh: “Đơ̆ng rŏng kơ hrŭ ‘mong jên teh, chưk pơ ‘ngoăih teh, hăm 22 unh hnam athei pơjing dơ̆ng hnam oei tơ̆ anih nai, nhôn hlôi hơmet đang teh vă ăn đe sư tŏk oei trŏ hăm tơdrong hơgăt bơih. Teh đei pơjao vă pơm hnam oei jê̆ trong gre kơdâu hrĕnh ‘năi, kơna kŭm hiôk hian ƀiơ̆ mưh tơlĕch jang.”

Tơdrong jang pơm trong gre kơdâu hrĕnh Quy Nhơn – Pleiku jĭ tơdrong jang pơm trong gre gĭt kăl kơ teh đak, kơjung truh 125km kơdâu klĕch dêh char Gia Lai. Tơdrong jang âu đei jên jang hlŏh 43.700 ti, tơchĕng adrol vă pơm ƀât hơtuch sơnăm 2025 păng man đang lơ̆m sơnăm 2029. Trong gre ‘nâu kơdâu klĕch 17 xăh, phường kơ dêh char Gia Lai, ƀơm truh tơ̆ hlŏh 3.000 unh hnam đei teh vă pơm trong. Lơ̆m noh đei kơhrĕng unh hnam athei pôk hnam oei tơ̆ nai dơ̆ng.

Ƀok Nguyễn Tự Công Hoàng – Phŏ Kơdră vei lăng kon pơlei dêh char Gia Lai pơma hơdăh, hrŭ ‘mong jên chưk pơ ‘ngoăih teh jĭ tơdrong jang tôch pơmat tat, athei tơlĕch jang mă ‘lơ̆ng lăp hăm yăn âu. Dêh char hlôi hơmet jên vă bơ̆ jang, atŭm hăm ‘nŏh pơgơ̆r bơ̆ jang kiơ̆ trong tơgŭm hơdrô̆, iŏk vei lăng anih sir kôch teh păng anih mong râm rek, vang sek tơlang hrĕnh, lăp đon kon pơlei păng tơdrong đei tơ̆ yăn âu tơ̆ rim tơring. Kiơ̆ đơ̆ng noh, tơdrong hrŭ ‘mong jên teh, tơgŭm, pơjing dơ̆ng anih oei xa ‘nao athei bơ̆ jang mă ‘lơ̆ng, ‘moi kiơ̆ tơdrong ‘mĕh vă tôch tơgăl đơ̆ng kon pơlei ‘năi.

Ƀok Nguyễn Tự Công Hoàng pơma: “Khul kơdră tơring athei jur dăr lăng, chih hơdăh: đei dôm yơ unh hnam kăl pơjing ming anih oei xa ‘nao, đei dôm tŏ pơsat athei kôch hơtŏk, ƀŭ hơmet ming tơ̆ nai, hơlen năng kon pơlei hơpơi ‘mĕh vă kiơ, vă oei xa ƀât yơ đơ̆ng noh pơjing anih oei xa tơ̆ noh, athei lăng kiơ̆ tơdrong ‘mĕh vă đơ̆ng kon pơlei tơ̆ yăn âu. Đơ̆ng rŏng kơ drơ̆ng nơ̆r bơih ‘nŏh athei thuê anih roi tơƀôh vă chih pơjing trong pơm anih oei xa ‘nao, chih tơmât lơ̆m hla ar chih găh tơdrong jang pơm trong gre kơdâu hrĕnh Quy Nhơn – Pleiku. Đĭ đăng dôm tơring oei xa ‘nao đei chih tơroi hơdăh ‘nŏh gô đei jên pơjing. Inh athei tơdrong ‘nâu jăh bơ̆ jang mă hrĕnh.”

Tơdrong hơmet ‘lơ̆ng tơdrong jang ăn ƀôh đon pơhnŏng chinh trĭ tôch ai đơ̆ng dêh char Gia Lai mưh tơlĕch jang tơdrong jang pơm trong gre gĭt kăl, pơih trong vă tơguăt tơring, tưk tơiung tơdrong jang mŭk drăm, tơpôl tơ̆ tơring tơ̆ hơnăp kơnh.