Năr 5/8, Anih jang vei lăng kon pơlei dêh char Gia Lai hlôi pơtruh hla bar tơroi ăn Jơnŭm pơgơ̆r ming man dôm tơdrong kăp gĭt kơ teh đak tơ̆ dêh char, chih akŏm tơdrong hơmet ăn Ming man jăl trong kơdou hrenh Quy Nhơn - Pleiku. Kiơ̆ chih tơroi ou, dêh char Gia Lai hlôi kơchăng ăn tơdrong ming man lơ̆m khei 10 sơnăm ou. Hăm tơdrong ming man trong Kơdou hrenh Quy Nhơn - Pleiku, dêh char pơgơ̆r rim anih jang oei lơ̆m anih jang ming man ou chă hơlen tơring teh, vă jô̆ hơlen lăng; pơtruh nơ̆r hơmet mă trŏ ƀlep ah trong hơ̆ng An Khê vă da ƀiơ̆ tơdrong krang, khei năr păng jên asong ming man tŏ sĕt hloh.

Tơdrong ming man jăl trong kơdou hrenh Quy Nhơn - Pleiku hơtaih pơhlom 125 km, jăl găn dêh char Gia Lai, trong să ăn 4 tong gre yak hơdoi, kơdou hrenh truh 100 km lơ̆m 1 jơ; tơdrong man trong hơ̆ng, gơng, anih tơbang gah trong nơnăm athei mă tơnăp hơgei păng anih pơdơh. Kơsô̆ jên asong ming man pơhlom 43.734 tih hlj, lơ̆m noh dêh char Gia Lai pơkăp asong 1.250 tih hlj iŏk đơ̆ng jên mong kơ tơring păng dôm kơsô̆ jên tơgŭm nai ăn tơdrong hrŭ 'mong iŏk teh ming man jăl trong.