Đak glung Ea Tuôr pơyan ou đak ƀĕnh, đak ro ngơ ngĭn găn hloh tơmo rơna dom. Tơ̆ hơla yơ̆p’long Tơngiơ kơhrĕng sơnăm, ƀok Y Wer Ktul, Thôn trơng ƀuôn Tuôr, tơring Hòa Phú chhôk hơ iă kơ yuơ pơlei ƀok tŏk bŏk tơplih ‘nao tĕnh koăng. Kon pơlei lơ̆m pơlei hlôi joăt hăm jang mir pơgar chehphe, tiu, dang ei hlôi băt iung jang tơmang pơhiơ̆ pơlei pơla joăt joe kơ bơngai Êđê. Hăm trong jang hle, kon pơlei chă jang sa răh, adoi vei răk tơƀak mong hloi tơdrong oei sa joh ayŏ joăt joe sơ̆ ki kơ pơlei, vă jơva chĭng chêng, tơdra la boa hơri vơvak păr jơ̆p lơ̆m bri kơdrơ̆ng Tây Nguyên."Mă blŭng bơnê kơ Teh đak hlôi tơgŭm djru ăn kon pơlei nhôn. Găh tơdrong hơgrop tơring, hơmŏ lơ̆m khei năr kơnh khul kơdră tơring, kơdră dêh char lăng ba tơmơ̆t jên ming man trong nơnăm vă kon pơlei chă yơ yak hiôk hian păng ming man pơnơ̆t đak vă kon pơlei măh mai đak ăn tơruih ‘long pơtăm păng atŏk tơ iung tơmang pơgiơ̆. Pơjing rơvơn ăn kon pơlei mơ̆t jang lơ̆m chơkơi Drai Nur, chơkơi Gia Long, vă hŏk pơhrăm dih băl trong jang tơmang pơhiơ̆. Hơpơi kơdră tơring hơnơ̆ng chă tơgŭm kon jên ăn atŏk tơ iung tơmang pơhiơ̆, vă tơmoi năm tơmang lăng ƀôh pơlei bơ̆n roi năr roi atŏk tơ iung pơdrŏng ‘lơ̆ng liĕm”.

Lơ̆m mă ŭnh hnam thôn trơng Y Wer mơdŭk ming hơmet hnam pơtăm joăt joe sơ̆ ki đơ̆ng yă dơnơm pơsư̆ ăn păng pơm hơnih sơng hơvơn tơmoi tơmang pơhiơ̆, ‘noh hơtăih kơ ‘noh dang ƀar pêng jĭt hơyak, ŭnh hnam mŏ H’Belly Êban jei hlôi pơjing hơnih jang homestay lơ̆m pơbŭng hnam pơtăm joăt joe sơ̆ ki. Mŏ H Belly tơbăt, homestay kơmŏ ou mă kăl chă pơvih pơvăn ăn tơmoi teh đak đe. ‘Măng blŭng, mŏ tơchĕng jang tơmang pơhiơ̆ tôch mơmat tat, mă lei mưh iung jang ‘noh lăng jei ưh kơ măh mơmat mơ̆n:“Bơnê kơ Teh đak pơjing rơvơn ăn kơ nhôn đei sơng hơvơn tơmoi lơ̆m teh đak păng tơmoi teh đak đe. Homstay Kathy ‘meh tơroi tơbăt ăn rim răih bơngai, tơroi ăn rim bơngai bu đei hnam pơtăm ‘noh bơ̆n vei lăng mă kơjăp, pơm homstay tơƀôh tơbăt ăn tơmoi năm tơmang pơhiơ̆ băt tơdrong oei sa joăt joe kơ hơdrung Êđê bơ̆n. Vă kôn mon kon sou bơ̆n băt păng vei răk kơjăp tơdrong oei sa joăt joe đơ̆ng mĕ ƀă yă ƀok bơ̆n pơsư̆ ăn ‘noh hnam pơtăm, dui brai vai tanh khăn, nơ̆r hơdrĕch hơdrung bơ̆n. Ba hơ iă dêh đei sơng hơvơn tơmoi teh đak đe tŏk ngôi lơ̆m homstay Kathy, đe sư hŏk pơhrăm nơ̆r Êđê, hrŭk hơbĕn ao hơdrung bơ̆n”.

Tơring Hoà Phú đei pơjing ‘moi kiơ̆ hơgrop 3 tơring Hoà Phú, Hoà Khánh, Hoà Xuân, hơgăt teh să hloh 109km2, măt bơngai kon pơlei vă jê̆ 50.000 ‘nu, jĭ groi teh oei sa đunh đai tai sơnăm kơ rim pơlei bơngai Êđê, đei đak kroong Sêrêpôk păng đei rim đak glung tih, đei rơvơn tih tên găh atŏk tơ iung tơmang pơhiơ̆. Đơ̆ng rŏng hơgrop, proh hơmet dơ̆ng hơnih bơ̆ jang, tơring hlôi sơkơ̆t hơdăh năm truh hloi hăm kon pơlei vă mơ̆ng kon pơlei pơma tơbăt jơhngơ̆m đon hơpơi ‘meh vă lơ liơ ... păng gloh loi hloh ‘noh vang chă pơma dơnuh dih băl tơchă trong atŏk tơ iung mŭk drăm hăm dôm tơdrong hlôi đei. Ƀok Đỗ Xuân Hiếu, Kơ iĕng Kơdră chĕp pơgơ̆r Hơnih vei lăng kon pơlei tơring Hòa Phú tơbăt:“Khul kơdră chĕp pơgơ̆r tơring dang ei ‘noh khul kơdră iung jang ăn kon pơlei, tơplih ăn gôchang kon pơlei truh ‘noh khul kơdră iung năm tơchă kon pơlei, hơnih mơdro sa hloi. Chă apĭnh jet gia vă băt hơdăh kon pơlei, hơnih mơdro sa ‘meh vă lơ liơ vă kơ bơ̆n pơjing đei trong jang tơgŭm djru, pơjing dôm trong pơprŏ jang, tơdrong vă jang trŏ lăp hăm jơhngơ̆m đon hơpơi ‘meh vă đơ̆ng kon pơlei.”

Atŭm hăm atŏk tơ iung tơmang pơhiơ̆, tĕch mơdro, lơ̆m jăl jang ‘nao ou, Hơnih Đảng tơring Hoà Phú jei sơkơ̆t hơdăh tơplih kơtang hơmet ming jang mŭk drăm ‘noh iung jang hơnih jang kmăi kmŏk-tơ iung pơjing ming man, vă pơjing đei hơnih jang kmăi kmŏk pơm tơlĕch tơmam drăm chăl hle gơ̆h hơgei. Kiơ̆ đơ̆ng noh, hrôih yak hloh lơ̆m lăp gơnang găh choh jang sa nhen hrei ou, păng pơjing hơyak pran kơjăp vă đei jing hơnih kơdrơ̆m kmăi kmŏk pơm tơlĕch lơmam drăm lơ̆m sơnăm 2035 kơnh.

Ƀok Phạm Tiến Hưng, Bí thư Đảng tơring Hoà Phú, dêh char Dak Lăk tơbăt, hăm rim trong pơchoh ăn păng trong iung jang kăl găh jang kmăi kmŏk pơm tơlĕch tơmam  drăm, tĕch mơdro, choh jang sa kmăi kmŏk hơgei, tơring Hoà Phú hơdrin pơm tơjur iŏk yoa kon jên bơ̆ jang đơ̆ng dêh char, Trung ương, yak truh đei kơ dih kon jên bơ̆ jang, đei jing hơnih jang pran kơtang tŏk mŭk drăm kơ dêh char Dak Lăk: “Tơdrong mơmat tat hloh kơ tơring Hòa Phú ‘noh pơm lơ liơ lơ̆m 5 sơnăm kơnh găh trong hnam, tơdrong hơrih sa kơ kon pơlei kăl đei tơplih kơtang, vă tơƀôh hơdăh tơdrong tơ iung pơjing khul kơdră chĕp pơgơ̆r 2 kâp đơ̆ng Trung ương ‘noh trŏ lăp hloh păng jơnei hloh.”

Đơ̆ng mĭnh tơring choh jang sa, Hoà Phú hrei ou tŏk pơjing hơyak blŭng ăn đei jing tơring kơdrơ̆m jang kmăi kmŏk pơm tơlĕch tơmam drăm-tĕch mơdro ‘lơ̆ng hơ iă hloh, jĭ tơring tơm găh Pơbăh kơ dêh char Dak Lăk. Tơdrong ou ưh kơ jor oei đei lơ tơdrong mơmat tat hrat hrĭn, mă lei hăm jơhngơ̆m đon hơpơi ‘meh vă atŏk tơ iung kơtang, tơdrong kơrŭn đĭ ai đơ̆ng khul chinh trĭ păng hăm tơdrong lăp đon kơtang đơ̆ng kon pơlei, Hoà Phú tŏk bŏk pơm hơtŏk jơhngơ̆m lui kơjăp lơ̆m tơdrong iŏk đei jơnei kơtang đơ̆ng trong bơ̆ jang Khul kơdră chĕp pơgơ̆r ƀar kâp, trŏ lăp, tơtom păng lăp đon kon pơlei.