

Pơyan ou lơ pơrang jĭ hli hlơt tơ̆ kon tơrong, kon kơlap ƀônh chă tơpoh kơtang lang să. Lơ̆m tơdrong ou, dêh char Dak Lăk tŏk bok akŏm atŏk kơtang rim trong jang tang găn pơrang jĭ vă vei lăng năng tông sơđơ̆ng ăn rong kon tơrong, sơđơ̆ng hơrih sa ăn kon pơlei. Hla bơar chih tơbăt đơ̆ng Hơnih vei lăng Rong kon tơrong păng jang Pơgang vei lăng kon tơrong dêh char Dak Lăk tơbăt, tơdrong pơrang jĭ lơ̆m dêh char tơpoh kơtang lang să. Tơring găh Hơlĕch dêh char ( dêh char Phú Yên so) hơnơ̆ng đei ƀôh pơrang jĭ klak chroh nhŭng châu Phi pơrăm, pơm ăn hơnih jang păng kon pơlei măh pơlôch hŭt nhŭng jĭ vă tang găn tơpoh lang să. Lơ̆m 6 khei blŭng sơnăm, lơ̆m dêh char hlôi đei 6 ‘nu bơngai lôch kơ yuơ kŏ vơnh kăp, tơƀôh hơdăh tơdrong hơmơt pơrang lang să jĭ kŏ vơnh tôch kơtang. Yă Đặng Thị Thủy, Kơ iĕng Kơdră chĕp pơgơ̆r Hơnih vei lăng Choh jang sa păng Cham char dêh char Dak Lăk tơbăt: Atŭm hăm atŏk kơtang ƀet bơ̆ng, pruih pơgang pơlôch sơmach jĭ, hơnih bơ̆ jang kơ dêh char hlôi vei lăng kơjăp dăr lăng hơlen gre chơ pơdŭ, hơnih ƀuh kăt, tĕch mơdro kon tơrong, kon kơlap; adoi pơtho ăn rim ŭnh hnam rong kon tơrong jang kiơ̆ chă rong kon tơrong rơgoh ‘lơ̆ng sơđơ̆ng sinh hŏk, ôp rơgoh hơdroong, rơgoong kon tơrong, ƀôh rôih păng hơmet keh đang rim hơnih đei pơrang jĭ pơrăm.
Viết bình luận