Dêh char Đắk Lắk dang ei đei dang 41.000 hek tar sầu riêng, hăm plei tơchĕng hơdrol sơnăm ‘nâu iŏk đei dang 400.000 tấn, tŏk lơ pơting hăm dôm sơnăm hơdrol. Plei lơ yak hơdai hăm kơhret găh plei ‘lơ̆ng, mă loi ‘noh jĭ ƀơ̆t lơ tơring pơtăm sầu riêng tơ̆ dôm dêh char tơ jê̆ tŏk bŏk huŏng lơ̆m tơdrong “hŭt jên ăn hơdrol”, ưh kơ vei sơđơ̆ng pơkăp ‘lơ̆ng, ƀơm ưh kơ ‘lơ̆ng lui ngeh đơ̆ng tơmam.

Yă Nguyễn Thị Thành Thực, Kơdră chĕp kơ̆l Jơnŭm vei lăng Kŏng ti AutoAgri akhan, sầu riêng Đắk Lắk oei rơkăh teh lơ vă hơtŏk tơiung, khŭl kơdră păng anih jang kơpal kăl kơ bơngơ̆t truh mã số tơring pơtăm: “Mã số tơring pơtăm ‘noh jĭ hơnăn, jĭ mŭk drăm kơ bơngai pơtăm, mă lei hlôi đei ƀôh lơ anih mơdro sa iŏk yua mã số tơring pơm kơnê̆, hlôi tơ̆ Trung Quốc đe pơdơh mã số đơ̆ng bơ̆n, bơ̆n hiong răm. Ĭnh athei khŭl kơdră tơring, rim anih jang kơpal athei pơjing hơnăp jang 1 sơnăm athei hơmet pơ ‘lơ̆ng, pơjing đei dôm yơ mã số tơring pơtăm”.

Anih vei lăng găh Choh jang sa păng Cham char dêh char Đắk Lắk hlôi jang hơdai hăm Grŭp jang Sầu riêng dêh char păng dôm anih mơdro sa, hơp tak xăh, tŭn pran hơlen lăng tơdrong ‘lơ̆ng, iŏk tơmam tơblang hơdăh kơsô̆ rơkăh, pơkăp ưh kơ yua dôm kơchơ̆t kơ̆m, mă loi ‘noh jĭ vei lăng kơhret kơchơ̆t vàng ô păng cadimi.

Ƀok Lê Anh Trung - Kơdră chĕp kơ̆l Grŭp jang Sầu riêng Đắk Lắk - roi tơbăt: “Grŭp jang hlôi jang hơdai hăm dôm anih tơchĕng hơlen kŭm hăm dôm anih mơdro sa, hơp tak xăh iŏk tơmam vă băt hơdăh tơring Đắk Lắk ‘noh tơring sơđơ̆ng pơm tơdrong ‘lơ̆ng đon lui vă đei tơdrong hiôk lơ̆m tĕch mơdro đơ̆ng sầu riêng Việt Nam păng tĕch tơ̆ teh đak đe. Lơ̆m trong jang rơgoh nhôn tŏk bŏk pơtho dôm anih mơdro sa jang hơdai hăm Anih vei lăng ‘long pơtăm pơjing tơdrong hơgăt chơ̆m điêm tơchă băt anih pơm tơlĕch 1 trong tôch kơ ‘lơ̆ng. Đơ̆ng noh gô tơ jur tơdrong ƀơm truh hơlen lăng, vei lăng. Jơ năr pơm hla ar tĕch tơ̆ teh đak đe gô hrĕnh hloh”.

Grŭp jang kŭm pơtho tơtă kơ kon pơlei ‘nĕ kơ tĕch plei oei kơ sĕ dêh ƀơ̆t tam mă truh khei ‘năr phĕ, veh ver ưh kơ pŭn ai đei pơgơ̆ kơjă dăh mă ưh kơ đei lui ngeh. Dôm anih mơdro sa, hơp tak xăh đei athei pơkăp pơm kiơ̆ tơpăt dôm tơdrong pơkăp sơđơ̆ng ‘lơ̆ng, trong tăh hơmet păng đei tôm jên hu vă veh ver tơdrong hŭt jên ăn hơdrol, pơm hiong răm ăn kon pơlei choh jang sa.

Vă sầu riêng Đắk Lắk tơpă đei anih dơ̆ng lơ̆m apŭng plĕnh teh, kăl kơ bơ̆jang hrơ̆ch đơ̆ng pơm tơlĕch, ki thuơ̆t ‘lơ̆ng, tơchă băt rơđăh truh vei lăng kơjăp trong tĕch mơdro. Khŭl kơdră tơring, anih mơdro sa păng bơngai pơtăm athei vang tơgŭm pơjing tơmam sầu riêng tơpă, kơjăp ‘lơ̆ng, kĕ pơjei lơ̆m apŭng plĕnh teh. Hăm tơdrong vang yak hơdai đơ̆ng khŭl kơdră anih jang kơpal, tơdrong hơdrin đơ̆ng kon pơlei jang chŭn mir păng anih mơdro sa, Đắk Lắk tŏk bŏk đĭ jơhngơ̆m vei kơjăp hơnăn sầu riêng sơđơ̆ng ‘lơ̆ng, ƀrư̆ ƀrư̆ pơih să anih tĕch mơdro, tơgop tơƀôh hơdăh anih dơ̆ng đơ̆ng sầu riêng Việt Nam lơ̆m hla kak tơmam đơ̆ng choh jang sa đei tĕch tơ̆ teh đak đe.