Dang ei lơ̆m teh đak đĭ đei 741 hơnih jĭ klak chroh nhŭng châu Phi tơ̆ 31 dêh char, pơlei tơm. Hơdrô̆ tơ̆ Đắk Lắk, jĭ đĭ đei ƀôh tơ̆ 14 ŭnh hnam găh 9 pơlei; athei soh hŭt 130 tŏ nhŭng. 7 xăh, phường lơ̆m dêh char oei đei jĭ, lơ̆m noh 3 xăh Dliê Ya, Krông Năng păng Tam Giang jĭ tam mă hloh 21 năr. Hơmơt jĭ klak chroh nhŭng châu Phi đei ƀôh roi tŏk, mă loi ‘noh jĭ tơ̆ dôm tơring đei akŏm rong lơ, ƀơm ưh kơ ‘lơ̆ng truh tơdrong jang rong nhŭng, hơnih pơtruh tơmam sa păng cham char.

Tơ̆ hơnăp tơdrong đei ƀôh pơmat tat păng đei hơmơt kơ lanh să, ‘năr 25/7, Anih vei lăng kon pơlei dêh char Đắk Lắk hlôi đei Hla ar athei dôm anih jang păng khŭl kơdră tơring tơlĕch jang kơtang, hrơ̆ch 1 ‘măng dôm trong jang tang găn jĭ lơ̆m dêh char.

Lơ̆m dêh char Đắk Lắk dang ei đei hloh 1,2 triệu tŏ nhŭng. Đơ̆ng blŭng sơnăm truh dang ei, Đắk Lắk hlôi pơgơ̆r ƀet bơ̆ng hơnơ̆ng ‘măng mă 1 ăn kơ kon tơrong. Mă lei, 1,2 tơring oei đei kơsô̆ ƀet bơ̆ng tŏ sĕt, mă loi ‘noh tơ̆ nhŭng păng iĕr bip.

Yă Đặng Thị Thủy, Phŏ Kơdră Anih vei lăng găh Choh jang sa păng Cham char dêh char Đắk Lắk roi tơbăt: Hơdai hăm tơdrong tŭn pran ƀet bơ̆ng, pruih pơgang, anih jang kơpal dêh char kŭm vei lăng kơhret tơdrong chơ chuĕn, et ƀuh, tĕch mơdro kon tơrong; hơdai hăm pơtho rim ŭnh hnam pơm kiơ̆ vei rong sơđơ̆ng ‘lơ̆ng, pơm rơgoh hơdrong rong, chă ƀôh hrôih păng hơmet pơ ‘lơ̆ng dôm hơnih đei jĭ.

“Hăm tơring lơ̆m dêh char hrei ‘nâu tôch kơ să, nhôn hơtŏk loi dơ̆ng tơdrong jang pơgơ̆r đơ̆ng dôm anih jang, mă loi ‘noh jĭ ‘nhŏng oh kang ƀô̆ ki thuơ̆t tơ̆ dôm anih jang athei roi tơbăt tơtom ăn Anih jang vei lăng, jang tơgŭm ăn kơdră chĕp kơ̆l Anih jang vă pơgơ̆r tơtom. Tơdrong jang âu nhôn tơgŭm hơdrol. Kang ƀô̆ anih jang athei tơgŭm kơtă ăn xăh, vang yak hơdai hăm kang ƀô̆ xăh. Mưh kang ƀô̆ xăh jang đang tơdrong jang ‘noh kŭm hơdai hăm anih jang bơ̆jang đang tơdrong hơgăt.”

Oei tơ̆ dêh char Gia Lai, đơ̆ng hơtuch khei 6 truh dang ei, lơ̆m dêh char hlôi chih iŏk 5 anih đei jĭ klak chroh nhŭng châu Phi hăm akŏm kơsô̆ hloh 300 tŏ nhŭng đei soh hŭt. Tơdrong hŭt nhŭng lôch tơ̆ đak krong, đak glung pơm ăn ‘mê̆ ‘mach đei chih iŏk tơ̆ lơ tơring nhen Bình Hiệp, Bình An, Hòa Hội, Tuy Phước Bắc, Hoài Ân, Ân Tường păng Bồng Sơn… Tơdrong ‘nâu tŏk bŏk pơm hơtŏk hơmơt kơ tơpoh lanh jĭ klak chroh nhŭng châu Phi jơ̆p jang. Giĕng âu ki, rim khŭl jang kơ phường Hội Phú (Gia Lai) hlôi athei prăt măng iŏk hơtŏk nhŭng lôch tơ̆ đak glung păng ƀŭ kơlơ̆p kiơ̆ blep trong tang găn jĭ.

Ƀok Vũ Mạnh Định - Kơdră Anih vei lăng kon pơlei phường Hội Phú roi tơbăt. “Anih vei lăng kon pơlei phường hlôi athei khŭl lĭnh kŏng an hơlen lăng, vei lăng tơdrong chơ chuĕn nhŭng lơ̆m tơring, pơih lăng camera tơchă dôm bơngai hŭt nhŭng tơ̆ đak glung Hội Phú. Tơdăh chă ƀôh athei sek phak kơhret. Mă 2 ‘noh jĭ athei khŭl pơgơ̆r ƀô̆ đô̆i ăn kon pơlei, lĭnh iŏk hơtŏk nhŭng lôch, pruh pơgang pơlôch pơrang, soh hŭt truh 1 jơ kơmăng mă đang; roi tơbăt kơ dôm ŭnh hnam kŭm hăm kon pơlei vang tang găn jĭ”.

Tơ̆ hơnăp tơdrong pơmat tat, đơ̆ng ‘năr 16/7, dêh char Gia Lai hlôi pơjing dôm hơnih răp găn vei lăng jĭ tơ̆ kon tơrong lơ anih jang tơ̆ 4 hơnih tơtŏ tơ̆ rim trong gre tih ‘noh: Bình Đê, Song An, Ia Khươl păng Ia Le. Dôm hơnih răp găn gô bơ̆jang hơnơ̆ng vă vei lăng kơhret tơdrong chơ chuĕn kon tơrong păng tơmam đơ̆ng kon tơrong mơ̆t lĕch lơ̆m dêh char.

Hơdai hăm ‘noh, anih jang kơpal kơ dêh char tŏk bŏk tơlĕch jang hrơ̆ch lơ trong jang tang găn jĭ nhen hơlen lăng vei rong kon tơrong, dăr lăng ket ƀuh, hơtŏk loi dơ̆ng pruh pơgang pơlôch pơrang, tơgŭm hơmet ‘lơ̆ng hơnih đei jĭ tơdăh đei păng tŭn pran tơdrong jang roi tơbăt hơtŏk ‘lơ̆ng đon hlôh vao lơ̆m tơpôl.