Hơdrol kơ noh, tơ̆ thôn 5 (xah Lộc Quảng so), dang ei noh xah Bảo Lâm 1, dêh char Lâm Đồng đei ƀôh khul nhŭng kơ minh unh hnam lôch kơlih pơlŏ tŏ, hŭt xa hơna, ưh kơ jăng. Anih jang kơpal tơ̆ tơring tenh kuăng iŏk hơlen pham, păng băt đei khul nhŭng ou ƀơm virus jĭ klak chroh nhŭng châu Phi noh hlôi pơkăp soh lê̆ kiơ̆ tơchơ̆t tang găn, păng tơjră pơrang jĭ. Lâm Đồng dang ei đei hloh 1 triu 300 rơbou tŏ nhŭng. Vă vei sơđơ̆ng ăn tơdrong jang tang găn, păng tơjră pơrang jĭ klak chroh nhŭng châu Phi, Anih jang vei lăng kon pơlei dêh char Lâm Đồng pơgơ̆r rim anih jang đei tơrĕk Anih jang vei lăng kon pơlei dôm xah, phương, anih jang tơm lơ̆m dêh char dah kơchăng pơgơ̆r jang kơjăp  tơdrong jang tang găn, păng tơjră pơrang jĭ; hơvơn jơnŭm jang vă hơmet tơtenh dôm anih hơbuh pơrang, ưh đei lê̆ pơrang tơpoh lang să.

Hla bar pơkăp đơ̆ng Anih jang vei lăng kon pơlei dêh char ră hơdah: Kơdră Anih jang vei lăng kon pơlei dôm xah, phương, anih jang tơm chiu pŭ sơnong jang tơm kiơ̆ khôi luơ̆t pơkăp mưh pơhơi pơhŏ, ưh tơnăp hăm sơnong pơgơ̆r jang, lê̆ đei jĭ klak chroh nhŭng châu Phi hơbuh lang să lơ̆m tơring pơrăm tih tên gah mŭk drăm.