‘Nâu đei lăng jĭ tơƀôh gĭt kăl lơ̆m hơdrin hơnhăk cheh phe ‘lơ̆ng Robusta Việt Nam gơh mơ̆t hlom hloh lơ̆m anih tĕch mơdro Hàn Quốc kŭm nhen tơpôl cheh phe ‘lơ̆ng apŭng plĕnh teh. Kiơ̆ tơdrong kĭ pơkăp, 2 grŭp jang drơ̆ng nơ̆r jang hơdai tơlĕch dôm tơdrong jang pơtrŭt tĕch mơdro, tơroi băl kơtơ̆ng ang tĕch mơdro, tơgoăt hơdai anih mơdro sa, tơgŭm hơtŏk tơiung kơjă kăp gĭt cheh phe ‘lơ̆ng. ‘Moi kiơ̆ jang hơdai âu, Grŭp jang cheh phe Buôn Ma Thuột hơmĕng cheh phe ‘lơ̆ng đei dơ̆ng tơdrong hiôk gơh tĕch lơ̆m dôm hơnih tĕch mơdro, hơnih mơdro huch cheh phe ‘lơ̆ng hloh păng bơngai răt yua Hàn Quốc.

Lơ̆m tơdrong jang kăl, hơnăn cheh phe ‘lơ̆ng MISS EDE kŭm kĭ pơkăp Hla ar chih tơƀlŏk jang hơdai hăm Coffee Myungga – cheh phe ‘lơ̆ng kơ Hàn Quốc đei hloh 35 sơnăm hơtŏk tơiung.

Jang hơdai akŏm lơ̆m tơdrong hơtŏk tơiung tôm tơdrong kơjă kăp gĭt Robusta ‘lơ̆ng kơ Việt Nam, đơ̆ng rơih iŏk tơmam, hơtŏk tơiung tơmam trŏ lăp hăm bơngai răt yua Hàn Quốc truh tĕch mơdro sa tơ̆ dôm hơnih mơdro huch cheh phe ‘lơ̆ng hloh, hơnih tĕch le ‘lơ̆ng hloh păng dôm hơnih tĕch mơdro lơ̆m điện tử.