
Ƀơ̆t lơ̆m pơgê blŭng a đơ̆ng rŏng kơ tơmơ̆t hơdai dêh char, kơdră chĕp kơ̆l dôm anih jang găh Anih vei lăng Choh jang sa păng Cham char dêh char Đắk Lắk (‘nao) hlôi pơgơ̆r ‘măng hop akŏm vă klăih song ăn tơdrong jang, hơnăp jang, drơ̆ng 1 nơ̆r jang hơdai tơdrong jang. Dôm tơdrong tơm nhen dăr hơlen tơdrong jang oei đei, tơgŭm hơdrol hơmet pơ ‘lơ̆ng dôm hơnăp jang kăl, hơnơ̆ng tơgŭm pơm tơlĕch, vei lăng tơmam drăm păng cham char hlôi đei vei kơjăp, vei sơđơ̆ng kơplăh bơ̆jang pơgơ̆r ‘lơ̆ng, ưh kơ đei pơdơh.

Ƀok Mai Vũ Quốc Bảo, kang ƀô̆ Anih Vei lăng Tơdrong ‘lơ̆ng tơmam Choh jang sa, Bri ‘long, Ka hơdang - hơdrol ki ‘noh bơ̆jang tơ̆ dêh char Phú Yên (so), tơroi:
“Hăm jơhngơ̆m đon hơmet tôm ‘lơ̆ng ăn tơdrong jang. Năr blŭng a năm jang tơ̆ 1 hơnih jang ‘nao, đei tơdrong hơmet ăn đơ̆ng anih jang pơm tơdrong hiôk oei sa, năm vih vơ̆t kŭm nhen hơnih bơ̆jang, truh dang ei ĭnh gơh bơ̆jang hloi tơdrong jang pơm lăp hăm ‘meh vă đơ̆ng kơdră chĕp kơ̆l kơpal kŭm nhen tơdrong jang joăt jang”.

Ƀok Đỗ Tuấn Hưng, Kơdră Anih Vei lăng Tơdrong ‘lơ̆ng tơmam Choh jang sa, Bri ‘long, Ka hơdang dêh char Đắk Lắk, roi tơbăt, đơ̆ng rŏng tơmơ̆t hơdai anih jang sơng iŏk dơ̆ng 8 ‘nu kang ƀô̆ đơ̆ng Phú Yên tŏk tơ̆ Đắk Lắk bơ̆jang. Truh dang ei, dôm bơngai hlôi sơđơ̆ng găh hơnih oei sa, hơmet ăn tôm jơhngơ̆m đon, khŏm bơ̆jang lơ̆m tơdrong ‘nao.
“Nhôn hlôi hop akŏm vă tơlĕch jang, klăih song jang hơdăh rim bơngai găh dôm lăm ‘nao kơ anih jang tơtĕnh băt hơdăh tơdrong jang, vei sơđơ̆ng ‘lơ̆ng, tơdrong jang 6 khei hơtuch sơnăm ưh kơ đei hiơ̆ hyĭn”.

Yă Đặng Thị Thuỷ, Phŏ Kơdră Anih vei lăng Choh jang sa păng Cham char dêh char Đắk Lắk pơma hơdăh, lơ̆m anih jang gô jang hơdai kơjăp, tơtĕnh hơmet tôm bơngai jang, pơvei tơdrong jang sơđơ̆ng păng akŏm bơ̆jang kiơ̆ dôm tơdrong jang, trong tơlĕch jang pơyua ăn hơtŏk tơiung mŭk drăm - tơpôl kơ dêh char đơ̆ng rŏng kơ dêh char tơmơ̆t hơdai.
“Nhôn hlôi ling lang tơgop lơ̆m tơdrong pơjing tơdrong jang hơtŏk tơiung kơ anih jang vei lăng choh jang sa, tơgĕch yua dôm tơdrong ‘lơ̆ng găh lơ tơmam vă hơnhăk anih jang vei lăng choh jang sa păng cham char hơtŏk tơiung rơgoh, kơjăp ăn kơ dêh char ‘nao. Păng ‘nâu jĭ khei ‘năr kăp gĭt vă hơmet dơ̆ng anih jang vei lăng choh jang sa - cham char kiơ̆ trong ‘nao păng ‘lơ̆ng hăm cham char”.
Viết bình luận