Mŭk drăm tơpôl dêh char Đắk Lắk hơnơ̆ng iŏk đei lơ tơdrong ‘lơ̆ng. Anih vei lăng kon pơlei dêh char Đắk Lắk ăn tơbăt, hơdai hăm tơdrong jang tŏk ‘lơ̆ng đơ̆ng anih jang kơmăy, ming man, choh jang xa, jang ‘long, rong ka hơdang păng tĕch mơdro tơ̆ teh đak đe, anih rong kon tơrong kơ dêh char kŭm chă đei dơ̆ng đon hơmĕng đơ̆ng rŏng kơ jĭ hơbŭh đei tang găn ‘lơ̆ng. Mă loi, tơdrong jang sut pơđĭ hnam hiăh hiok ăn bơngai tơnuh đei tơlĕch jang ‘lơ̆ng. Truh dang ei, đĭ đăng kơsô̆ hnam vă man tơgŭm hlôi đei tơlĕch man, hlŏh 6.900 tŏ hnam đei man đang păng pơjao ăn kon pơlei, jang đei 78% khei ‘năr hơgăt, adrin jang đang adrol kơ ‘năr 15/8.

Kiơ̆ ƀok Tạ Anh Tuấn, Kơdră vei lăng kon pơlei dêh char Đắk Lắk, mă đơ̆ng thoi noh ră, vă jang đei đon pơhnŏng jang tŏk mŭk drăm lơ̆m dêh char truh 8% lơ̆m sơnăm, tơdrong vă jang tŏk truh 8,64% lơ̆m 6 khei hơtuch sơnăm, oei jing tơdrong tôch pơmat tat. Vă jang đei tơdrong ‘nâu, blŭng a athei hơmet pơ ‘lơ̆ng dôm tơdrong tơhlăk lơ̆m tơdrong jang đơ̆ng khul kơdră tơring 2 tăl; hơmet pơ ‘lơ̆ng dôm tơdrong ưh kơlăp, găn trong lơ̆m dôm tơdrong jang tih, păng hơtŏk tơdrong tơlech jên jang kơ teh đak.