Jăl jang ou ki, lơ̆m khei ‘năr tơdrong lơ̆m apung plĕnh teh, tơring păng tơ̆ Ƀiển Đông đei lơ tơdrong ưh sơđơ̆ng; jĭ hơbŭh Covid-19 pơrăm kơtang, khul ƀô̆ đô̆i lơ̆m Đang ƀô̆ Khul Ƀô̆ đô̆i dêh char Dak Lăk oei tơklep kơjăp hăm dôm tơdrong yan ou, iung jang keh đang rim tơdrong jang đei Hơnih tơm Ƀô̆ đô̆i vei lăng sơlam teh đak,  Quân khu 5 păng Hơnih Đảng dêh char Dak Lăk pơjao ăn. 

Mă hơdăh, khul ƀô̆ đô̆i đei tơ iung pơjing kiơ̆ trong “hơbĕch hơbal, koăt, pran kơtang”; rim khul kơdră chĕp pơgơ̆r đảng, khul đảng lơ̆m Đang ƀô̆ ling lang lăp kơjăp tơ iung pơjing khul pran kơtang găh chinh trĭ, jơhngơ̆m đon; chĕp pơgơ̆r, pơrô̆ jang kiơ̆ keh đang rim trong tơlĕch jang kăl, hơmet ming khul hơbĕch hơbal, koăt, pran kơtang; atŏk kơtang jang kiơ̆ khoa hŏk kmăi kmŏk, tơplih kơsô̆.

Lơ̆m jăl jang, Đang ƀô̆ Khul Ƀô̆ đô̆i dêh char Dak Lăk hlôi tơtom pơjing, pơtruh ăn, hơgrop khul chĕp pơgơ̆r Đang ‘lơ̆ng hơ iă hăm proh hơmet ‘lơ̆ng kơ rim hơnih bơ̆ jang; pơjing, hơmet ming, tơmơ̆t dơ̆ng păng jang kiơ̆ kơjăp dôm tơdrong tơchơ̆t, tơdrong pơkăp pơgơ̆r hop akŏm đảng tơ̆ rim hơnih. Rim trong jang “Đang ƀô̆ rim hơnih puăn ‘lơ̆ng”, “Chi ƀô̆ puăn ‘lơ̆ng, pêng ưh” đei tơlĕch jang kiơ̆ jơnei.

Vang năm Hop akŏm, Đại tá Trần Minh Trọng - Kơ iĕng Kơdră chĕp pơgơ̆r Đảng Quân khu V hôn bơnê kơtang dôm tơdrong jơnei tih tên mă Đang ƀô̆ Khul Ƀô̆ đô̆i dêh char Dak Lăk iŏk đei lơ̆m jăl jang ou ki; adoi nhen bơ̆ jang hơmet ăn Hop akom tih păng pơgơ̆r keh đang 12 hop akŏm Đảng ƀô̆ jăl jang 2025 – 2030 păng tơ iung pơjing Tơdrong tơchơ̆t Hop akom tih jăl jang ou. Vă jang kiơ̆ keh đang Tơdrong tơchơ̆t hlôi tơlĕch ăn, mă kăl lơ̆m khei ‘năr hơgrop hơnih bơ̆ jang, Kơ iĕng Kơdră chĕp pơgơ̆r Đảng Quân khu V athei Đảng ƀô̆ Khul Ƀô̆ đô̆i dêh char akŏm lơ̆m mĭnh ƀar tơdrong jang kăl hloh tơ̆ hơla ou:“Akŏm chĕp pơgơ̆r, pơtho pơhrăm kơchăng kơtang kĕ iung tơblăh kơ khul ƀô̆ đô̆i dêh char; vei kơjăp ‘lơ̆ng trong jang kơchăng iung tơblăh, trŏ lăp hăm tơdrong pơkoel đơ̆ng tơdrong jang lơ̆m dôm tơdrong ou to. Iung jang hơdoi kơjăp hăm rim khul ƀô̆ đô̆i lơ̆m dêh char lơ̆m tơdrong hơlen băt hơdăh, tơdra hơdrol, chă hơlen ƀlep tơdrong păng tơtom iung tơjră jơnei keh kong hăm dôm tơdrong đe pơm glăi, vei kơjăp sơđơ̆ng, sơđơ̆ng tơpôl. Pơgơ̆r pơhrăm bơ̆ jang tang găn hơlou lơ̆m tơring atŭm hăm iung jang tang găn hơlou lơ̆m kon pơlei kơjăp kơtang; jang keh đang trong pơprŏ jang atŏk tơ iung mŭk drăm-tơpôl atŏk hăm bơ̆ jang tang găn hơlou păng trong jang đĭ đăng kon pơlei vang vei lăng sơđơ̆ng.”

Ƀok Nguyễn Đình Trung, Bí thư Đảng dêh char, Bí thư Đảng ƀô̆ Khul ƀô̆ đô̆i dêh char Dak Lăk tơbăt, Tơdrong tơchơ̆t kơ Hop akom tih đei sơkơ̆t hơdăh hăm trong jang “Hơtŏ dih băl-Tơgoăt mĭnh nơ̆r-Gơh hơgei-Tŏk kơtang-Atŏk tơ iung” păng hơnăn “Kiơ̆ yok rok jơ̆ng joăt joe khul ƀô̆ đô̆i dêh char Dak Lăk Nuih mơng; akŏm tơ iung pơjing Đang ƀô̆ rơgoh ‘lơ̆ng, pran kơtang; khul ƀô̆ đô̆i dêh char pran kơjăp iăp kơtang tôm tong, tơnăp ‘lơ̆ng, gơh hơgei; hơdrin iung jang keh đang ‘lơ̆ng tơdrong bơ̆ jang vei lăng teh đak, vei lăng sơđơ̆ng dơ̆ng kơ jăp Teh đak Việt Nam xã hội chủ nghĩa lơ̆m chăl hle”. Ƀok Nguyễn Đình Trung athei pơđĭ lơ̆m Đang ƀô̆ iung jang hloi Tơdrong tơchơ̆t Hop akŏm tih. “Akŏm chĕp pơgơ̆r, pơrô̆ jang păng jơhngơ̆m pran iung tơjră; vei kơjăp jơhngơ̆m đon ‘lơ̆ng, hơrih sa hơ iă; jang kiơ̆ hơtŏ dih băl, tơgoăt tơgoăl, lăp mĭnh ƀơ̆r đon; mĭnh jơhngơ̆m, mĭnh đon, kơrŭn đĭ ai iung jang keh đang Tơdrong tơchơ̆t Hop akoưm tih tơlĕch ăn. Khul kơdră chĕp pơgơ̆r ‘nao hrôih tơ iung pơjing, tơlĕch jang kiơ̆ trong pơprŏ jang pơgơ̆r hop pơhrăm, jang kiơ̆ Tơdrong tơchơ̆t Hop akom tih truh hăm đĭ đăng kang ƀô̆, đang viên, ƀô̆ đô̆i lơ̆m khul Ƀô̆ đô̆i dêh char; tơ iung pơjing tơdrong tơlĕch jang hơdăh vă tơlĕch jang kiơ̆ kơjăp. Rim hơnih jang kơrŭn đĭ ai chă pơrô̆ hơvơn rim bơngai lơ̆m khul, đoàn viên kơrŭn jơhngơ̆m pơting dih băl jang pran kơtang, hơdrin jang keh đang ‘lơ̆ng rim tơdrong jang mă Tơdrong tơchơ̆t Hop akŏm tih hlôi tơlĕch ăn”.