Sơnăm 1982, bơngai tơdăm Nguyễn Đăng Khoa mơ̆t pơm ƀô̆ đô̆i lơ̆m Đại đội 14, Trung đoàn 95, Sư đoàn 307, vang iung tơblăh tơ̆ kơdrăn tơblăh Campuchia tơ̆ dêh char Preah Vihear, tơjê̆ hăm tơring sơlam teh đak Thái Lan. Hloh 40 sơnăm hlôi kơtĕch, ƀok oei hơdơ̆r nhen dang ei kơ rim ‘măng tơblăh păng rim bôl boăl tơkơ̆l.

Lơ̆m tơdrong hơrih sa rơngei hiôk hian, jơhngơ̆m đon ƀlŏk hơdơ̆r păng jơhngơ̆m đon pơngơ̆t kơ bôl boăl tŏk bŏk đom tơ̆ kơdrăn tơblăh hlôi pơm ăn ƀô̆ đô̆i so Nguyễn Đăng Khoa ưh kơ hreh. Sơnăm 2002, ƀok iung năm jang tơchă kơting ƀô̆ đô̆i lôch dŏng teh đak. Groi teh hlôi tơplih kơtang kơ yuơ mir pơgar, pơlei pơla păng lơ hơnih jang ming man. Mă lei gơnơm tơdrong hơdrin đơ̆ng ƀok, lơ hơnih tơchă kôch akŏm hlôi đei sơkơ̆t hơdăh nhen pơkôl Dúi Dù, pơkôl Me, păng mă kăl ‘noh tơdrong năm tơchă 5 kơl ƀô̆ đô̆i lôch dŏng teh đak găh Sư đoàn 968 chơ brŏk grong ƀŭ tơ̆ dêh char Bình Phước (so).

Ƀok Khoa tơbăt, tơdrong jang năm tơchă đơ̆ng ƀok ưh khan lăp kơ yuơ ‘mêm kơ eng hơdrô̆ bôl boăl, ƀlŏk hơdơ̆r kơdrăn tơblăh mă oei pơ đĭ đơ̆ng hơpo. Nhen lơ̆m ‘măng năm tơchă nhap ƀô̆ đô̆i lôch dŏng teh đak Trương Công Thanh lơ̆m sơnăm 2013, ƀok Khoa hơnơ̆ng hơpo ƀôh păng pơm ăn jơhngơ̆m ƀok oei ưh kơsơ̆n dơ̆ng ưh kơ sŭk. Ƀok năm truh tơ̆ Hơnih bơ̆jang vei lăng Bơngai jang-Ƀô̆ đô̆i rơka păng Tơpôl apŭng Tây Sơn, dêh char Bình Định (so) vă apĭnh jet gia păng đei ăn hô sơ kơ ƀô̆ đô̆i lôch dŏng teh đak đei hơnăn ‘noh “Thanh”, hăm dôm tơdrong oei tim mă băt kơnăl. Mă lei, hăm jơhngơ̆m đon lui kơjăp, ƀok hlôi lăng hơlen dôm tơdrong, chă pơtêng lăng hơnăn rim ƀô̆ đô̆i lôch dŏng teh đak găh Trung đoàn 94 lôch răm lơ̆m khei ‘năr ‘noh năm tơchă ƀôh oh drŏ nglo kơ ƀô̆ đô̆i lôch dŏng teh đak vă chă apĭnh găh khei ‘năr mơ̆t pơm ƀô̆ đô̆i, khei ‘năr lôch răm. Dôm tơdrong vă jê̆ ƀlep păng ƀok hlôi tơchă ƀôl bôl boăl kơdih sơ̆.

Tơroi tơbăt găh tơdrong kơdih hlôi păng tŏk bŏk jang, Ƀô̆ đô̆i so Nguyễn Đăng Khoa hơlŏk tơroi.“Tơdrong mă ‘noh hlôi pơm ăn kơ ba ưh kơ sŭk kơna ba mă hơdrin iung jang, ưh kơ đei bu athei ba ră mă lei kơdih ba ‘meh vă đĕch. Ba jang tơdrong ou ‘noh ba tôch kơ lăp đon, ƀôh lơ̆m jơhngơm đon ba hiơch jơhngơ̆m, mă đơ̆ng tŏ dăh mă ‘mi, mưh kơtơ̆ng ang ‘noh ba oei tơ̆ hnam ưh kơsŭk ôh. Tơdrong jang năm tơchă ba chă pơrô̆ hơvơn ‘nhŏng oh lơ̆m khul, pơma dơnuh, chă pơrô̆ hơvơn ŭnh hnam hơnih oei sa ăn ŭnh hnam, sơng khul năm tơchă lŏk ƀô̆ đô̆i lôch dŏng teh đak tơring hơtăih brŏk, lơ̆m khei ‘năr ‘noh ưh khan chă oei lơ̆m hnam đe ăn asong oei ôh”.

Tơdrong jang kơ ƀok Khoa ưh khan lăp hơnăp jang đơ̆ng kơdih mă oei jing lang să jơhngơ̆m đon ‘mêm kơ eng, ƀlŏk hơdơ̆r tôch bach. Ƀok Đặng Quang Dũng, bơngai hlôi vang năm atŭm hăm ƀok Khoa lơ̆m prăt vă jê̆ 20 sơnăm, tơbăt:“Ƀok Khoa bơ̆ jang lơ̆m Khul bô̆ đô̆i brŏk vih hơrih sa tơ̆ pơlei pơla ‘noh iung jang hơdoi hăm khul Ƀô̆ đô̆i apŭng so păng tơring vă năm tơchă kơting ƀô̆ đô̆i lôch dŏng teh đak kôch chơ brŏk grong ƀŭ tơ̆ pơsat teh đak. Ŭnh hnam kơ dôm ƀô̆ đô̆i lôch dŏng teh đak tơring hơtăih truh jei hơnơ̆ng năm tơchă ƀok Khoa vă vang năm tơchă kơting ƀô̆ đô̆i lôch dŏng teh đak”.

Lơ̆m hloh ƀar jĭt sơnăm, ƀok Nguyễn Đăng Khoa hơnơ̆ng tơgop jơhngơ̆m iung năm tơchă kơting bôl boăl. Dôm tơdrong tơgop đơ̆ng ƀok Khoa hlôi đei Đảng păng Teh đak ƀlŏk hơdơ̆r hôn bơnê. Sơnăm 2019, ƀok đei Kơdră chĕp pơgơ̆r Teh đak pôk ăn Mê đai Jơnei dơ̆ng mă Pêng kơ yuơ iŏk đei jơnei kơtang lơ̆m ‘măng iung tơblăh, vang iung tơblăh tơgŭm ăn kĕch mang Campuchia. Tơjê̆ ou hloh, lơ̆m sơnăm 2023, ƀok hơnơ̆ng đei sơng iŏk Hla bơar pôk bơnê đơ̆ng Yŏng Khul ƀô̆ đô̆i vei lăng sơlam teh đak kơ yuơ iŏk đei jơnei kơtang lơ̆m bơ̆ jang năm tơchă, kôch akŏm păng sơkơ̆t hơdăh hơnăn rim kơting ƀô̆ đô̆i lôch dŏng teh đak jăl jang 2017-2022.

Kiơ̆ đơ̆ng yă Trần Thị Ngọc Mai, Kơ iĕng Kơdră chĕp pơgơ̆r Hơnih vei lăng kon pơlei tơring Bình Khê, dêh char Gia Lai, Ƀô̆ đô̆i so Nguyễn Đăng Khoa ưh khan bơngai đei tơgop tih tên, bơngai kon pơlei ‘lơ̆ng, mă oei jing bơngai mih ma oei sa ‘lơ̆ng hơ iă hloh kơ dôm kang ƀô̆ sơnăm mơlôh tơ̆ tơring.“Ma Khoa jĭ bơngai ‘lơ̆ng, pơm jŭk yŭk trong hơlou ăn jơhnơr mơlôh kiơ̆ yok rok jơ̆ng, dôm tơdrong jang mă ma jang ‘noh tơƀôh hơdăh jơhngơ̆m đon lăng tông nông gia hăm bôl boăl tôch tơnăp. Hloh đơ̆ng tơdrong ou hlôi pơm ăn lang să jơhngơm đon ‘mêm kơ eng păng hơnăp jang hăm kon pơlei pơla, jơhngơ̆m đon ‘mêm tôch bach hmach tôch kơ dih hăm dôm bơngai hlôi nuih mơng pran kơtang plang ăn pham lĕch sĕch huŏng kơ yuơ tơdrong pơm tơm, rơngei hiôk hian kơ hơdrĕch hơdrung. Bơ̆n jĭ tôch pŭn ai păng hưch hanh hơmanh bơnê hloh dơ̆ng tơdrong rơngei hiôk hian, tơdrong pơm tơm kơdih mă bơ̆n tŏk bŏk đei iŏk yoa sa hơpăh dang ei, păng bơ̆n kăl đei hơnăp jang, hơrih sa lơ liơ mă tơgăl, ‘nĕ đei tơdrong lao đon hăm tơdrong plang ăn pham lĕch sĕch huŏng đơ̆ng mĕ ƀă yă ƀok bơ̆n đơ̆ng sơ̆”.

 Tơdrong jang 20 sơnăm năm tơchă bôl boăl đơ̆ng ƀô̆ đô̆i so Nguyễn Đăng Khoa ‘noh tơƀôh hơdăh jơhngơ̆m đon ‘lơ̆ng kơjăp kơ nơ̆r pơma pơkăp kơ bơngai ƀô̆ đô̆i, kơ jơhngơ̆m đon ‘mêm kơ eng dih băl bôl boăl ưh kơ lai yơ dơ̆m kiơ̆ khei ‘năr dăr sơnăm. Ƀok hlôi păng tŏk bŏk tơ̆k ăn pla ŭnh pơm hơtŏk jơhngơm đon ƀlŏk hơdơ̆r, vă dôm kôn mon kon sou nuih mơng gơh hơgei kơ hơdrĕch hơdrung, mă đơ̆ng hlôi tơkơ̆l tơ̆ tơ̆ yơ jei đei brŏk vih hăm groi teh kơ mĕ ƀă yă ƀok bơ̆n.