Sơnăm 2021, tơ̆ thôn 3, xah Ea Bung đei lơ tơdrong tơgar hơbong pơchoh đak. Minh ƀar unh hnam kon pơlei bơ̆t găn hloi hơbong pơchoh đak hlôi yua atŭm vă jê̆ 30 sơnăm kơ ou, pơm ăn lơ unh hnam tơ̆ hơla ưh kơ mah đak ruih noh 'long pơtăm ưh đei yua. Tơdrong tơgar pơdui đunh, dôm unh hnam hlôi 'nhăk băl năm tơ̆ xah vă sek tơlang tơdrong tơgar, mă lei ưh kĕ đang păng tơdrong tơhĭl đơ̆ng dôm unh hnam roi kơtang hloh. Truh ah năr 3/7 ou ki, đơ̆ng rŏng 2 năr jơnŭm pơgơ̆r xah 'nao đei tơ-iung pơjing, dôm unh hnam kon pơlei pơtoi pơm hla bar păng dui băl năm truh tơ̆ xah vă tơkêng. Đơ̆ng rŏng tơmơ̆ng nơ̆r tơroi đơ̆ng 2 pah, đe kơdră xah Ea Bung păng đe kang ƀô̆ pơgơ̆r jang hlôi năm truh tơring, pơm jang kơtă hăm rim unh hnam păng tơlĕch trong pơrơngei 'lơ̆ng. Đơ̆ng rŏng 2 jơ, rim tơdrong tơhĭl đei pơklaih hơmet 'lơ̆ng, 4 unh hnam drơ̆ng nơ̆r asong băl hơbong pơchoh đak păng atŭm băl hơmet ming hơbong đak vă đei đak mah ruih ăn 'long pơtăm. Bơngai đei na ah hơtuch hơbong đak, yă Lê Thị Liên, oei tơ̆ thôn 3 tơroi: “Đe kơdră xah adoi tơnăp, tơguăt hăm kon pơlei, hmach bơnê kơ đe kơdră xah tơgŭm ăn kơ nhôn, vă kơ nhôn gơh hiôk hloh, dang ei pă đei tơdrong kiơ bơih, pơchoh đak nhen da hia bơih”

Tơdrong tơgar pơdui đunh 4 sơnăm đei sek tơlang tam mă truh 2 jơ, noh jing gơnơm đơ̆ng trong jang 'nao  – tơguăt hăm kon pơlei, kơchăng băt hơdah tôm tơdrong, kơtă năm truh tơring đei tơdrong vă pơma dơnuh, tơmơ̆ng nơ̆r tơroi păng chă trong pơklaih. Kiơ̆ kơ ƀok Đỗ Duy Toại – Kơdră Anih jang vei lăng pơlei xah Ea Bung, kơtă đơ̆ng rŏng kơ jơnŭm pơgơ̆r xah đei tơ-iung pơjing kiơ̆ pơkăp 2 tăl, tôm anih jang chinh trĭ xah hlôi hăt hot chih akŏm tơdrong jang “100 năr pơtơm pơm jang”. Lơ̆m noh, mă kăl ră hơdah gah trong jang: tơrĕk truh tơring, tơguăt hăm kon pơlei, iŏk kon pơlei pơm tơm.

Xah hlôi pơjing đei dôm khul pơm jang kơtă năm truh 3 thôn đei lơ tơdrong ưh kơ 'lơ̆ng gah teh, sơđơ̆ng tơpôl vă tơƀơ̆p pơma dơnuh, tơmơ̆ng nơ̆r tơroi păng pơklaih rim tơdrong mă hơdah:  “ 'Nguaih kơ tơdrong pơm jang tơ̆ anih jang noh athei năm truh tơring kon pơlei vă tơmơ̆ng kon pơlei tơroi thoi yơ, dôm tơdrong blĕk kơ đon mă đơ̆ng đunh tam đei sek tơlang pơklaih noh athei pơm keh đang hloi. Lơ̆m 22 năr pơm jang noh xah hlôi pơm jang hăm 3 thôn. Noh jing tơguăt hăm kon pơlei vă sek tơlang tơdrong kăl, hơdah năm truh tơ̆ kon pơlei jing tơdrong kăp gĭt hloh. Oei nhen hơdrol ki hơnơ̆ng oei pơm jang minh hơnih gô kon pơlei năm truh tơroi đang kơ noh pơtơm băt tơdrong...”

Atŭm hăm trong pơm jang 'nao, Ea Bung adoi oei đei lơ tơnap tap. Anih jang xah dang ei đei ming man ăn 30 kang ƀô̆ pơm jang, dang ei athei akŏm jê̆ 70 'nu pơm jang, lơ̆m kơplah tơmam drăm kơmăi kơmŏk pơm jang tam mă đei asong tôm. Ƀok Nguyễn Văn Phú – Phŏ Kơdră Anih jang vei lăng kon pơlei xah, pơgơ̆r gah hanh chinh kŏng tơroi: “Mă mônh noh kơmăi kơmŏk, đương truyên păng minh ƀar tơdrong juăt jang dang ei tam mă đei tôm. Atăm dơ̆ng, kang ƀô̆ lơ̆m khei năr pơkăp tam mă đei pơtho pơhrăm gah pơm jang... Trong tơlei unh hơyuh so asong unh ưh kơ mah noh hăp hơnơ̆ng kơ tơpăt CP, pơrăm kơtă truh tơdrong pơm jang, hiong jơ kon pơlei păng kang ƀô̆ lơ̆m pơm jang”

Dôm tơdrong tơnap tap ou hlôi đei xah tơroi kơtă lơ̆m 'măng pơm jang hăm Kơdră Anih jang vei lăng kon pơlei dêh char Đăk Lăk ah năr 23/7. Tơdrong đei măt tơtom đơ̆ng đe kơdră dêh char ưh hơdrô̆ tơƀôh tơdrong tơmơ̆ng, tơguăt hăm tơring, mă roi sơkơ̆t hơdah tơdrong kơchăng hơbĕch hơbal đơ̆ng jơnŭm pơgơ̆r tơring 2 tăl: xah tơguăt hăm kon pơlei, dêh char tơguăt hăm xah. Tơdrong mă ou oei pơjing đei jơhngơ̆m pran 'nao ăn jơnŭm pơgơ̆r tơring, tôm atŭm tơrĕk kơ kon pơlei. Ƀok Tạ Anh Tuấn, Phŏ Ƀĭ thư Tĭnh uy, Kơdră Anih jang vei lăng kon pơlei dêh char Đăk Lăk tơroi: “Nhôn tŏk bŏk pơgơ̆r Anih jang Khua hŏk păng Kŏng ngê̆ hơlen lăng tôm kơmăi kơmŏk păng tơdrong jang tơplih kơmăi kơsô̆ kơ dêh char, vă đei trong asong jang dah mă hơmet ming. Gah unh hơyuh noh pơgơ̆r Anih pơm jang ăn Anih jang vei lăng kon pơlei dêh char pơm jang hăm anih jang unh hơyuh vă asong mah unh hơyuh ăn tơdrong pơm jang kơ tơring. Tơring ayơ đei kon pơlei hơrih jang xa, đei pơm jang noh athei đei unh hơyuh teh đak păng athei đei tôm hơyuh điê̆n thuăi di đŏng vă tang găn tơklah hăm tơring klŭng hŭt”

Đơ̆ng rŏng hloh 3 giĕng pơm jang kiơ̆ pơkăp jơnŭm pơgơ̆r tơring 2 tăl, kon pơlei Ea Bung tŏk bŏk băt hơdah tơdrong tơplih 'nao đơ̆ng jơnŭm pơgơ̆r tơring – ưh hơdrô̆ jing jơnŭm pơgơ̆r đei hơmet 'lơ̆ng, mă tơplih hloi trong pơm jang, tơdrong tơlĕch jang. Rim tơdrong tơnap tap đei pơklaih, rim tơdrong tơroi đơ̆ng kon pơlei tơtom đei tơmơ̆ng chih akŏm... jing dôm tơdrong bơ̆ng pang hơdah ăn tơdrong trŏ ƀlep kơ jơnŭm pơgơ̆r tơring 2 tăl  – ah mă pơtơm jơnŭm pơgơ̆r bot 'lơ̆ng, tơguăt hăm kon pơlei păng pơm jang kơyuơ kơ kon pơlei hloh.