Tơ̆ plei Bu Ndrung, xăh Đức An, dêh char Lâm Đồng, lơ thơ̆ oei hăt man pơkĕh hnam ‘nao ăn ‘nhŏng Điểu Phạm Dương (bơngai M’Nông). Đơ̆ng juăt kiơ̆ man hnam ăn kơ đe lơ sơnăm, ‘nhŏng Dương “roi tơƀôh” găh hnam tôch hiôk chơt đơ̆ng kơdih, đei man hăm tơdrong tơgŭm đơ̆ng Anih tơm vei lăng công an păng unh hnam vang tơnôm tơnăi kon jên hai: “Hnam ‘nâu đei man kiơ̆ đon tơchĕng pơm thoi yơ đơ̆ng kơ dih inh, hnam xă 77m2. Tŏk bŏk ‘nŏh hnam gŏ păng lăm sơng tơmoi đei 2 tŏ kơƀang, đơ̆ng rŏng kơnh đei jên răt tivi ming ƀât doh. Hnam gŏ jĭ anih ngôi, sŏng xa hơdai kơ unh hnam. Oei ‘măng ‘nŏh pơih lĕch tơ̆ rŏng, đei hloi hnam chă pơyơ̆ng hơdrô̆”. 

Hơnơ̆ng đei măt tơ̆ dôm anih đe man hnam nhen thoi 1 ‘nu bơngai “dăr lăng”, Ƀok pơgơ̆r pơlei Điểu Khuy, tơ̆ plei Bu Ndrung, xăh Đức An, tơroi, kon pơlei tơ̆ âu tôch mât 1 ƀơ̆r đon: “Đei Đảng, Teh đak pơngơ̆t, tơgŭm ăn ‘nŏh kon pơlei nhôn hơđơ̆ng jơhngâm păng tôch hơiă. Mih ma duch nă nhôn tơ̆ plei Bu Ndrung âu, mưh đei tơdrong tih ‘nŏh hơnơ̆ng năm ngôi, vang tơgŭm băl tôch hơiă. Pơtih gia nhen man hnam; bu rơhơi ‘nŏh vang tơgŭm kŏng, bu đei tơmam ‘nŏh tơgŭm ăn tơmam”.  

Tơ̆ tơring kăn kư̆ kăch mang xăh Nâm Nung, lơ hnam hiăh kŭm đei tơplih hăm lơ hnam ‘nao man kơjăp. ‘Nhŏng Y Kram tơ̆ plei Ja Rah akhan “Đĭ chăl arih lăp pơm hnam 1 vât đĕch, đei teh đak tơgŭm kơna athei adrin man hnam mă kơjăp ‘lơ̆ng ƀiơ̆”: “Mưh pơm hnam, mă đơ̆ng pơmat tat ră mă lei athei adrin pơm mă kơjăp vă kon sâu gơ̆h hơđơ̆ng jơhngâm oei xa; yoa pơm hnam ‘nŏh vă yoa truh đĭ chăl arih. Inh adrin tŏk iŏk dơ̆ng jên, gô đơ̆ng rŏng kơnh jang xa kla dơ̆ng ăn kơ ‘nhŏng oh. Unh hnam pơmat tat, đei Teh đak tơgŭm 60 triu; ‘nhŏng oh, mih ma duch nă vang tơgŭm ăn ‘nŏh gơ̆h đei hnam thoi âu. Sơnăm âu ki chĕh phe kŭm đei yă, chă mong măi dôm sơnăm ‘mơ̆i mă man đei hnam ‘nâu”.

Oei mŏ H’Monh kŭm ưh kĕ ôn jơhngâm đon chơt hơiă mưh đei hnam ‘nao: “Đĭ đei hnam oei, ưh pă hli ‘mi hnăt, tŏ hang bơih, inh tôch hơiă păng hơđơ̆ng jơhngâm choh jang xa vă rong ‘me kon hơ ‘lơ̆p hŏk pơhrăm. Inh vă adrin jang xa, mong, ‘mơ ‘met jên 2,3 sơnăm dơ̆ng vă kla ăn ‘nhŏng oh, mĕ ƀă vang tơgŭm ăn inh pơm đei hnam kơjăp thoi âu”. 

Hơtăih kơ ‘nŏh ưh đei dang yơ, unh hnam linh so Y Choi oei pơgơ̆r at tŏk hnam hăm jơhngâm đon tôch chơt hơiă. Lơ̆m hnam man kơjăp ‘lơ̆ng, hue tơ̆ dơnâu đak Nâm Nung tôch rơngơp, linh so Y Choi chơt hơiă tơroi: “Adrol kơ man hnam, inh oei oăi tơ̆ hnam so hiăh hiok pơm đơ̆ng sơnăm 1989 sơ̆, vă păk hloi bơih. Đei teh đak tơgŭm jên man hnam păng tơgŭm ăn inh tŏk iŏk jên đơ̆ng anih mong jên tơgŭm tơpôl kơna inh man đei hnam kơjăp thoi âu. Unh hnam nhôn tôch hơiă, ‘nă hla. Inh bơnê kơ Đảng, teh đak tôch lơ”.

Sơnăm 2025, tơring sơlam kơ dêh char Lâm Đồng (Đắk Nông adrol ki) tơgŭm jên sut hŭt hnam hiăh hiok ăn 1.755 unh hnam. Anih tơm vei lăng Công an kŭm tơgŭm ăn dêh char jên man 500 tŏ hnam ăn kon pơlei. Đơ̆ng tơlĕch jang tơ̆ yăn âu, yă H’Thương – tơ̆ xăh Nâm Nung, dêh char Lâm Đồng, ăn tơbăt: "Inh ƀôh đơ̆ng Trung ương truh tơ̆ xăh, Tơdrong jang sut pơđĭ hnam hiăh hiok âu tôch đei yoa. Tơ̆ âu, nhôn chă hơlen năng, pơgơ̆r man trŏ khei ‘năr, lăp hăm tơdrong hơgăt. Thủ tướng teh đak ƀôh, băt kon pơlei kon kông ưh đei hnam oei kơjăp ‘lơ̆ng, kơna tơlĕch jang hloi. Dang ei đĭ truh pơyan ‘mi bơih, pơngơ̆t ăn kon pơlei, Thủ tướng athei bơ̆ jang mă ‘lơ̆ng trŏ khei ‘năr hơgăt vă kon pơlei mât oei tơtom, hiôk sơđơ̆ng, ‘lơ̆ng hơiă”.

Đơ̆ng dôm trong jang tôch trŏ păng tơdrong vang tơgŭm đơ̆ng rim anih jang chinh trĭ, dôm bơbŭng hnam ‘nao oei tơplih ăn lơ hnam so hiăh hiok, hơnhăk ba tơdrong chơt hơiă, đon hơmĕng găh 1 tơdrong arih xa hiôk sơđơ̆ng, ‘lơ̆ng hơiă, phĭ tơtŏ dơnŏ ‘lơ̆ng ăn rơbâu unh hnam kon pơlei tơ̆ Lâm Đồng. Tơdrong mât 1 ƀơ̆r đon, tơgŭm băl đơ̆ng kon pơlei oei ƀôh hơdăh tơ̆ rim hnam ‘nao man, vang tơgop pôk hơtŏk jơhngâm ‘mêm băl, tơƀôh hơdăh đon lui đơ̆ng kon pơlei hăm Đảng păng Teh đak. “Jơhngâm đon chơt hơiă đơ̆ng dôm bơngai tŏk oei tơ̆ hnam ‘nao” oei lang xă tơ̆ jơ̆p pơlei pơla”